MASI CHAWLH

Zawngtah tuvu hma daih atanga ke chat tan tawh kha exam pui chawlh a’n nih meuh chuan biang leh  ban zawng zawng nen a khakin a khak tlur tawh thin. Chat kha fak lo mah i la kan zak lem lo. Tun hnua ka ngaihtuah let leh hian kha’ng kan chat karah te khan hlimna a bet tel em ni aw, ka ti hial thin, kan hlim thei em mai si a.

Exam zawh tlaiah kan lehkhabu hluiin thlawhder kan siam a, kan thlawhder siam a thlawh bo rualin kan nun hlui pawh chu a thlawkbo ve nghal
thin- deuhthaw. Fail loh chuan. Kan fail hlauh erawh chuan thiante lehkhabu hlui lei emaw, dil emaw a ni leh mai. Exam zawh ni kha chuan Rinawma te tengtere kung kha a va han rim thei tehreng tak. A rah leh rah loh lam a ni lo, kan lawn ngei ngei. A hnah pawh ei duh tur khawp khan kan rawp thin tlat.

Tun lai angin(hmmm) intihhlimna changkang tak tak a tam lo; Mahse kan hlim tho. Mahni ina kan tih peih reng reng loh, video(vcr) kan en theihna tur a nih  vanga kan tih kha a va tam em. Video en tura kan inhlawhna ve angreng deuh atana lung(boulder) kan zawn tuma pi Chemi lung duh lai kan lo la ngawt erawh kha chu a fuh vak lo. Kan intih tlangval ve fe tawh hnu thleng khan kan hel zak zak thin.

 Kan video enna thin Pu Kapa lah khan vawih a haw thei em em mai lehnghal a. Kan vawih miah loh tum pawh khan a hnar a len vut vut a, ‘hmm in vawih leh tawh a ni maw, a’n tia. Thiante beng bulah ‘i vawih em’ kan inti ru sa sa thin. Pu Kapa ke hnuai hiattu a kan tan fuh tum erawh kha chuan kan intithei thin teh e. Kan tui chawi hlawh emaw, kan lung thiar hlawh emaw hmangin shaolin kungfu te, Comando te leh Rambo te kan han hawh a, khatih laia kan hlimna lakah kha chuan tun hnu, ‘engkim’ ka tem tak hnua ka hlimna hi chu  tehkhin tham ah pawh ka ruat lo.

Kan intihhlimna leh kan inkawmkhawmna nuam ber pakhat chu buk sak kha a ni bawk tak e. Buk sak chu sual zirna bul, tiin thenkhatin sel thin mahse, a nawmna leh  hlimna min thlen nasatzia ka ngaihtuah hian ka sual zir chhuah, iskut kuang zuk kha chu pawi tham vakah ka ngai ta lo.

A khat tawkin bai lem kan chhuang a, buhfai thawh leh chi chauh thawh pawh khan puar takin kan ei ho dial thin. Kan buka kan titi leh kan rorel tam ber kha  krismas hman dan tur a nih avangin kan phurin kan va han hlim thei em. Kan thurel pawh a ropui thei narawh e. Urlawk zanah dar 12 thleng tal tlaivar tur, tih te leh cheng hnih theuh thawh a, chow lei tur tih vel te kha a nia. A ai ropui kan hre lo a, kan mamawh lo, kan hlim em mai si a.

Kan rilrua lian leh kan enghelh ber pakhat chu bawng thlah kha a ni. Krismas bawng a lo thleng tawh em, tih kha kan inzawt awl lo a. Kan bawngthlah chak tawh lutuk khan Upate’n krismas bawng an lei har kan dem thu leh lei hma deuh se kan tih thu te kha kan thu lohzia hre miah loin kan sawi ve chiam a. Khatih lai, kan lungawi loh deuh lai pawh khan kan hlim em em si.

Krismas bawng a lo thleng, tih thawm a rik rualin a ki a tha em, tih riin a zui nghal a. Krismas bawng ki tha deuh kan neih kuma kan phur theihzia leh a ki bul emaw, a ki thlep emaw kan neih kuma kan hnual theih zia te, chuti chunga mahni krismas bawng na na na chu tan a nat thin si zia te tak kha aw.

Zingah bawng thlah turin kan han insawm khawm a, ‘ni-no’(magnifying glass) kan theihnghilh ang tih mawlh kan hlau thin. Nawhalh te chu awm bawk mahse bawng thlahna ah chuan ‘ni-no’ hmang ngeia iskut kuang leh thil dang tan kha a krismas boruak bik tlat.

Veng dang bawng thlah an lo awm ve a, kan inhmuh tawh chuan competition ropui lutuk kha tanin a awm zui tawh mai thin. Veng dang bawng leh kan veng bawng kan han insiktir a, tan a va na duh tehlul em. Engtin tin emaw chaklo tawh tura kan ngaih hnuah a’n chak leh hlauh mai tum te kha aw. Ka aw neih zawng pawh hian au chhuak i la, ka lawmna a la hrilchhuak zo lo hial ang.

Mihring hi chak chang leh chak loh chang nei thin kan ni ang bawk hian kan veng bawng pawhin hneh loh tawn chang a nei ve fo a. Chutiang hunah chuan U Lal-enga kan ngai vawng vawng thin. Kan zingah khan U Lal-enga kid hlui emaw, a bawng huaizia leh ki thatzia emaw sawi tur hria pakhat tal kha kan awm ve ziah tlat. U Lal-enga bawng chuan ngam loh a nei lo, a ki veilam hmawr tlemin a kawi deuh a, a hmangthiam a sin aw, an han tia. Mit tla dawna en chungin kan lo ngaithla kar a. A ke khing hnih vawrin a kheng thiam, an han tih phei chuan amah U Lal-enga chawp chuan insik thiam leh huai turah kan ngai tawh mai a ni. Khatih lai khan keini ang rual mipa naupang kha chuan kan ngaisang vekin ka hria.

Kan bawng a chakloh chang pawha inhnialah tal kan chak thin kha kan vanneihna a ni awm e. Veng dang nen mahni veng bawng ve ve kan infaksiak a, kan veng bawng, kan lo sit ruk deuh pawh chuan chutiang hunah chuan fakna a dawng tam ve thin mawlh mawlh khawp mai. A chang phei chuan keimahni sawi ngei chu kan awih zui a, kan bawng chu kan hmu tha ve leh viau mai thin.

Tlai lamah tlangsam par ngei mai awrhtir hnuang chungin kan han chhawm haw a. A thlunna tura kan thlun laiin upa tu emaw berin ben thak thak pahin in thlah puar tha hle mai, a sa in ei teuh dawn nia, a’n tih phei kha chuan kha aia lawman tha kha a awm ang tih kan ngaihtuah tawh lo. Kan hlim em mai si a.

Tlangthing phurh ni tak te kha a sin nuam thei chu. Kan thlantui luang ngiah ngiah ah khan hlimna a rawn luangliam chhuak ve thin ni hialin ka hria. Lam hnai deuh ami kan phurh tum phei kha chuan, kei chu vawi li ka kalna a ni tawh, te kha kan tia, kan tlan liam leh puat puat mai a, nun kha a nuam thin.

A hun a lo thleng a, masi kawrmawi nen thian zahoin thla kan han la a, thlalak chhuah hun tur beiseina nen kan han thlir leh veng veng mai a, hlu ve tak a ni. Chutah kan bawng thlah sa chu kan thing phurh sa bawkin kan han chum so buah buah mai a, hma lam thui tak kan thlir duh tawh lo- School luh lam a lang hnai tlat!