Thursday, 24 November 2011

CHUMI ZAN REH TAKAH CHUAN


Dithlifarfem ah dai a far ri kauh kauh a, chhun lama an lam khawmsa, iskut leh awmpawng kuang an hum far a, thenkhatin an lo tankai mek bawk a. Chumi zan reh tak chu an ta a ni a, an tan chuan kumkhata zan awmchhun a ni, pawh ti i la  a mawhlo hial ta ve ang. Exam pui chawlh an hman tik ata- ni nang, zirtirh bu an keu atang tawh khan he zan lo thleng tur hi an thlir a, an nghak a, an nghakchhuak ta. An tana Lalthar lo pian hun tur chu.
            An buk thehlep tak chu thlifim vawt tak maiin ri miah si loin a chhem che dar dar
a; Anmahni phuloa lian kawrchung lum leh lukhum phiar phawkphawhraw tak tak an khum nen chuan an meihawl thuk lem neihchhun chu an kil bial laih a, tuma’n tawng zai an rel lo. Chumi zan reh takah chuan Lal thar alo piang dawn tih an hria a, chu chu an lo hmuak a ni. An zinga upa leh hotu chan chang deuh ber, he buk an sak hlim atanga thawnthu leh thlahrang sawi tur hre thei ber pawh chuan chu zan reh tak mai han tibuai turin a rawl a chhuah lo a, kut khur hlau hlau chungin an meihawl thuk te takte chu a ai ve mai mai a ni. An kep silai leh an iptea halpuah leh eng hlo hlo emawni an ah pawlh te pawh chu phawrha hal pawh an tum chuang lo. An masi kawrmawi hak avanga an hlim phulhlut hun a la thleng chiah bawk si lo.
          An tum ber chu dar 11 thleng tal tlaivar ve ila, tih chu a ni mai; Chu pawh chu- dar sawm rik hmain an muthlu leh vek dawn tih pawh an inhre ngei ang, mahse rilru thianghlim takin chu bukteah chuan an tana Lal lo piang chu lo hmuah ve an tum miau a ni. Hemi zan kher phei hi chuan  an buk sakna bulah vawkpuiin no a nei hlauh mai lehnghal a, 12 thleng hial pawh an tlaivar thei mahna. Nakinah chow pocket li an lei kha an siam ang a, chumi hnu ah an bukteah chuan Lal thar chibai buk turin an lo nghak tawh mai dawn a ni.
        Nichin lawka zaikhawmna hmun atanga an hawn,  chhangban kan dai duk tawhte chu an meilum neih veah chuan an hem lum thuak thuak a, an in keih chhawk tak liam liam a, a khat tawkin an in melh kual a, hlim tih hriat takin an nui leh ver ver thin. An nuih zawnga an biang chat, thip deuh that that thin leh an buk kawngka chunga an arsi lem khai in then che leh lap lap te pawh chuan an riru a la peng vaklo niin a lang; Chu hun chu an tan chuan Christmas a ni satliah lo a, ‘Masi’ ngat a ni- chu chu an tana Lal lo pian hun a ni tih pawh an hrechiang ve hle.
       
      Hun a kal a, kum a vei a, kan naua te pawh an lo puitling a, thil pawh a danglam zo ta- thil pakhat danglam ve ngailo chauh lo chu !!

        Khawilai pucca building chawng thumna nge chhawng lina zawk atang emawni in rual u deuh tana rimawi ni ve miahlo tur, anni tana music ni si chu a rawn ri thum vung chhuak hlurh hlurh a, hmeichhe nui ri awr awr karah harhfimlo tih hriat tak, teng zeta tawng lawng lawng ri hriat tur a awm reng bawk a. Chu chu hmana buktea Lalthar hmuak tute tho kha an la ni.
        Chu zan chu an ta a ni a, an tan chuan kumkhata zan awmchhun a ni, pawh ti ila a mawhlo hial ta ve ang. December thla a lo det tik ata- ni nang, kumtluana an nghah a ni zawk ang. An nghak a, an nghakchhuak ta, an tana Lal lo pian hun tur chu- ni nang, an festival neih ve chhun chu.
        Chumi zan bengchheng tak maiah chuan tumah reng an in ngaichanglo a, an zinga naupang ber leh ngawichawi ber thin meuh pawh chuan meng sen ram chungin, ‘bawihi, zawnga kha lampui tawh suh ka ti che a ni lo’m ni,’ a ti vin ve that that ta mai. Meihawl thuk lem an mamawh tawhlo a, kawchhung lam tihlumna erawh an mamawh hle- vawt ti fal bik ni awm taka kilkhata lo inkherh ngawng ngawng tawk lah bo lo.
        Tu’nge sawisel ang a, tu’nge rawn hau tehlul ang, Christmas urlawk zan an hmang ve a ni mai a-ni lo, an life an enjoy ve a ni mai a, hetiang zanah tu’nge ti lo bik. Thenawmte’n an rawn hau ang maw, veng lehlamah pawh an play ri chhuaih chhuaih a lawm. E’nge zanin te chu bengchhen zan a lawm lee.
        An duh leh tum ber chu zankhuaa ruih tur leh kuahlum tur awm se tih chu a ni mai; Chu pawh chu kar loah an chahthlaksan vek dawn tih hriatsa reng, a nihloh leh buai tawk chu an awm ngei ang; Mahse hemi zan berkher hi chuan an zingah mi pakhat a tel ve tlat a, buai miahlo pawhin an tlingtla ve thei mahna.
        Harhfim loa phul bual bual te, a kel rawl a kel rawla an hla play lo zaipui ta ruah ruah tawk te an kat nuk a. A khat tawkin no an pal keh in a ri leh chhuaih thin bawk a, tumah inngaihsak chuang loin an tawng lawng lawng hlawm a. Lo inti taurau a lo inthlem mek tawk lah bo lo. Chu zan bengchheng takah chuan
        Chu zan bengchheng leh ri nuaih nuaih karah chuan ri ve miah lo, ri bengchheng ber ai pawha ring zawk si a awm a, chu reh ri chu hmanah khan a lo ri tawh a, thawm bengchheng leh zurui au rawl satliah mai maiin a hliah ve theih a ni lo a, rik duhna hmun leh rik duhna hun pawh a nei lo a, krismas zaikhawmna hmun emaw, thalai sahawk party na hmun  emaw a thliar lo; a ri reng mai a ni; A la ri zel rih dawn ni pawh in a lang.
        Khawilai party thawm satliah mai maiin a hliah theih a ni lo ang bawkin khawilai bukte reh taka awm vangin a ri chu a ring zual chuanglo a, a ngai reng a ni. Min hmangaih avanga kan tana a inpekna thawm reh leh chiang tak mai hre fiah tur erawh chuan he tisa beng ni lo, kan thinlung benga kan ngaihthlak a ngai thung a ni. Eng mi pawh ni ila, engpawh ti ila, AMAH chu vawiin ah nen naktuk ah nen chatuan thleng pawhin a danglam dawn si lo a.
      Kan Christmas lo hman liam tawh zawng zawng, a then chu tuihnai vaklo pawh a ni ang, khatih lai zawng zawng te pawh khan thawm reh tak chu kan hnenah tihrikin a awm reng a, kan lo hre duhlo mai thin a lo ni. Kumin krismas-ah chuan keimahni thawm nilo, A hmangaihna thawm reh leh mawi tak kha ngaithla ila, tichuan kan thinlung zan reh takah Lal Krista alo piang ve thei ang.

No comments:

Post a Comment