Friday, 3 June 2011

TUKIN KA RILRU.

        Vawiin chu khua a lum lehpek hle mai. Khaw vawt nuam tak kan beisei ngamlo chung leh khaw lum tuar tura kan inring sa deuh chung pawh hian duh ai chuan a lum mah mah zel mai zawng a nih hi. Hetianga a'n lum huam huam chang hi chuan kan naupan lai (ehh) kuthleiin thingkung kan lo kih ve ringawt te kha ka inchhir ve tep thin.
        Hetianga tun ang huna khua a'n lum viau hi chuan kan beisei neih chhun chu 'ruahsur se aw' tih hi a ni mai a. Chupawh chu kan khawvel sik leh sa buai zo tawh ah hian kan beisei thlawn fo mai. A dur khup khup a, a uap em em a, a veng leh duak a, a lum leh em em thin.

Thursday, 2 June 2011

KA TAWNGTAINA

Aw LALPA,


Nun awmzia ka hriat hmaa nunna min pein


Kawng a awm tih ka hriat hmain min hruai a


Hmangaihna awmzia ka hriat hma leh ka hriat loh lai pawha min hmangaihin


Ka bo tih inhrelo khawpa ka bo laiin min zawng thin


Ka rin loh lai che pawhin ka ring leh ang che tih i ring tlat a


Ka chau a ni tih inhrelo khawpa ka zawi hnuin thahrui min pe a


Ka khawhar zia hrelo khawpa ka nun a ruah laiin nangin min kan thin


Kawngdikloah chaktakin ka tlan a ni tih ka hriatloh lai pawhin
Aw LALPA, nangin i kutchaka min chelhdingin


Ka hriat ngailoh kawngtha min zawhtir zawk si


Thim hnuaia ka awm laiin eng min pe a


Hlauhnain min chim laiin min muan thin


Buaina leh mangannain min chim laiin ngaihtuahna thar min pe a


Kawngdika ka kal theih na'n ka ke i ni a


Thil tha ka tih theih na'n ka kut i ni si


Aw LALPA, nanglo chu tu'nge ka belh ang?/