Saturday, 28 May 2011

A TLAI ZO TA

          A tukhuma namtu chuan a nam nat em avangin kawngpuiah chuan a bawkvak phei dawrh a, diktak chuan chupa chuan a nam pawh niloin a beng a ni mah zawk e.  A vunchhia thian mawlh mawlh chungin a lo tho chhhuak a, a meng kun lap bawk a. A hmelah chuan a thiam vena te, dikna a neih vete chu chhete mahin a tilang lo a, a nachang lah a hre hek lo. A bul vela lo thlirtute mitmeng leh hmelah pawh chuan amah chhan tumna leh a thlavang hauhna reng reng a lang lo. Thenkhat chuan an lo khawngaih ve deuh pawh a ni mahna; Mahse an tilang chuang lo.
        A sam pheng leh bal zet te, a kawrfual tawp leh hlui tak mai, thler hniang tawh mai te leh a ke, pheikhawk bun ngailo tih hriat taka bal dum khak tak mai te chuan a mitmeng, khawngaih thla la tak mai leh tleirawl dangte mitmeng a duhawmna ang tho awm vete chu a hliahkhuh zo a ni mahna. A nih loh leh a bengtupa kuta rangkachak zungbun hrawl tak mai te, a car tle zur maite chuan amah chhantu turte a hnawttiau zawk pawh a ni ta ve ang.
       Hetiang thil hi a vawikhat tawnna a ni lo. Nikhua a hriattirh ata eizawnna leh thiltha tihtur a hriat ve chhun chu ‘kut dawh’ a ni a, a neitute hriatloh laia thil han lak mai te hi ‘ruk’ a tling lo. A nu, la naupang tak, eichhiat vanga hrisello leh bawrhsawm tak nen chuan eitur an mamawh a, chutianga nun chu an eitur hmun ve dan tura khuanu ruat a ni miau si!
        Kum hnih a nih pawhin a nu in a la pua a, chu chu a chakloh leh chawrche vang mai bakah chutia tih chuan an eizawnna ‘kut dawh’ kawngah tlemin an hlawk ve phah deuh a ni. Ei ni eh nghei ni inzat rengin a lo thanglian chho a, hriselna lamah chuan beisei tur sang tak a neilo.
        Kum thum a tlin chuan amahin ei a zawng thei tawh a, a nu pawh a chhawk zangkhai ve deuh. A kutdawhna te’n an pekduh loh vanga chil han chhakkhum maite hi atan thil mawilo a ni hran hlek lo. Anmahni hnampui aiin hmel danglam deuh pute chu an eizawnna atan an tangkai zawk, tih te a hrechho zel a. Mipa leh hmeichhia an kaldun hian a mipa zawk hnena kutdawhin a hlawk zawk tih te, a hmeichhia zawk dila an lo chhawn that vakloha ngenngawl deuh hian an mipa kalpuite an tawrhhlelhawm thei tithe pawh a hria a. Rin aia tam an pek tuma dil nawn leh chiam pawh hian tih fuh leh tih fuhloh tum a awmthei tithe pawh vawiina mi pakhatin cheng sawm a pek hnu lawk a a ben thal thuai dan atang hian  a zirchhuak ngei ang, amah tak hian a zirchhuak tih inhre tak maw?
         An chenna chhehvela inchhawng sang tak tak ngir khep khup te, lirthei insulpel zut zutte chu a awt lo, a duh leh duh loh chu a hrelo, a la ngaihtuah ngailo hrim hrim a ni. Chu’ng thil ni theilo tawp ngaihtuah ai chuan a nu nena an eitur atta per hnih tal neih theih dan tur chu ngaihtuah a tul zawk thin si a.
         Neihnun hmel tak tak, neih ui tak tak te, neih vakloh hmel, belhfakawm tak tak si te a tawng thin a, a tan chuan thil mak a ni lo. Puar khawpa ei chu thlahlel ve bawk thin mahse a nu nen ni khata vawikhat tal chaw ei chu a thlakhlelh ber a ni. Anu lo chu he khawvelah hian mihring ngaihtuah a nei lo- tluk a ni!
        An chenna kawtthlerah chuan anmahni ang bawka dinhmun chhia an inbawk hrang ve far a. An chenna chu ‘in’ tia han chhal tur a awm lo. Puan an inzar hliah tawk tawk a ni ber. Mahse chu hmunah chuan mihring an cheng a, hringnun an chhiar ve a ngai a,. Chhungkua- nu, pa leh fate, thenawm khawveng then leh rual te pawh an awm ve a. Chu laiah chuan an hringnun chu an chhiar ve a ni.
        Kan nau-i pawh chuan chumi nia ben leh ih a tawh mai mai te chu hre awm pawh a lang loin a chenna lam pan chuan hlim takin a rawn zuang tum phei alh alh a. An chenna chu mi pangngai inti te hian chenna tlakah kan ngailo a ni maithei; Mahse chulai hmuna chengte tan chuan chulai hmun tluka an thla ngamna hmun dang a awm lo. Chulo rengah kan nau-i chu engvangin nge a hlim loh tehlul ang, vawiinah a nu nena an ni hnih, ni thum ei lai tur a hlawhchhuak tlat a lawm.
        Rilru hlim tak chungin thil a ngaihtuah kual a, chu’ng an chhehvela milian leh mi hausa ho nundan te chu a thiam tawkin a’n thlir ve a. Hringnun hi an hriatthiam ve tak tak a ring thei lo. Eitur duh tawk an nei a, ruahsur leh nisaah ngaihtuah buai ngai miahloin in ropui tak tak an nei a, ngaihtuah tur tak tak an neilo a, nuamchenin an leng mai mai niin a hria. An nun chu ho a ti a, a khawngaih deuh bawk.
        Chutia rilru hlim taka inngaihtuah chung chuan an chenna chu a va hnaih zel a, thil chu pangngailo riauin a hria a. Anu chu a lo awmlo a, an thenawmte bungbel neih ve chhun te chu hmanhmawh taka paldarh ang mai hian a lo let niaih a. A’n hawiphei leh deuh chuan chulai vela chengho chu an lo bial laiha hmanhmawh takin a tlanphei ve nghal a.
         A thilhmuh chuan a barakhaih hle. A naupan tet atanga kut a dawh pui thin, a thian, naupang dangte’n an velh dawn pawha chhan thintu, a nu tih loh he khawvela a thian tha ber, a thianpa chu thichhawngin a lo let reng mai chu niin.
        Kutdawha an chuahdun thin lai te kha a ngaihtuahchhuak a, a tap a a nui deuh bawk a. Vawikhat chu pa pakhat fel deuh main an la ei ngai reng reng loh thil thlum tui deuh a thianpa chu a pe a, a thianpa chuan midang hriatlohin a pe ve a nih kha. Khami tuma tui an tihzia, an hlimzia leh dam man awm an tihzia te kha..                                         Vawikhat motor-in a su tur pawh he a thianpa ngei hian thihhuamin a lo chhanchhuak tawh bawk a ni. Khami tum khan a thianpa khan rawn bawhphei lo sela chuan a thi chiang ngawt ang.
        Chutiang vel ngaihtuah chung chuan a thianpa lam chu a pan ruak ruak a. A thianpa chu chau takin a lo thaw hrawp hrawp a, a chatthla tep tawh ang. Anni tan damdawiin kal te chu van vawihkhum tum ang hlauh a ni si. An sir kawngpuiah chuan hmansen loh pawisa akin mi an vei suau suau a, mahse chu’ng mite chuan chulai kawngsirah chuan mihring an awm ve a ni tih hre awm pawhin an awm lo.
       Chu chu a ni, hringnun an tih ve chu. Mahni tanghma haiin, tumah an in ngaihsak lo a, anni’n an neih chuan midangin neilo mahse pawi an ti lo. An dam chuan midang thih chu pawi an ti miah lo, chutiang mihring tenawm chuan kawngsira mi rethei te te, neih neilo, mahse inhmangiah tawn tak tak te chu hringnun pawh hrethiam ve lo turah an la han ngai ta dah a nia!!
       A thianpa mitah chuan a han en a, ani chuan a lo en ve a. Chumi mitkhap karte maiah chuan thil a lo hriatthiam ngai loh kha hrilhfiahin a awm ta. Ni e, a thianpa chuan an han in entawn vang vang a, thil chu a chiang uar uar mai a ni. Tukina kutdawh tura a chhuah dawn khan thei tui tak hawnsak a intiam a, mahse khatih lai te pawh khan a thianpa chuan thei tui deuh hawnsak ai chuan ama bula awm tur khan a duh zawk a lo ni. A thianpa mitah chuan amah mamawh ngawih ngawih hmel a zu hmu thei a. Thil dang ni lo, amah ngei chu a mamawh a ni.
        A lo hre ve riai ruai tawh a, tv a a en atang te pawhin hmangaihna chungchang chu a lo hre ve tawh thin. Mahse a taka a hmuh chu nula leh tlangval inngaizawng, nula sum mena meng leh tlangval rusum thlak tum mena meng leh khawsa te an ni thin si. Kutdawh, ti a hmusit tute mit leh chezia ngeiah chuan ‘hmangaihna kut dawh’ a hmu thin a ni.
        A hmuh lai ngeiin a thianpa chu a chatthla mek a ni- a va rang awm teh thut em. Nimina an bawlhhlawh hai naah a ke kha chu a tipem ngei a, vawiin ah pawh a vakchhuak peihlo a nih kha; Mahse nizanah pawh tv an la enho reng sia.
       A in ngaihtuahchhuak thut a, a nuin a naupan deuh laia damdawi hming a sawi pakhat kha e’nge kha….. ‘paracetamol’!! Damdawi dawr lam panin a tlan nghal a, a neihchhun vawiin nilenga hahtaka mi kut hial tuar khawpa a hlawhchhuah chuan paracetamol chu a va lei ta a ni.
       A let leh chuan mi chu an lo tam leh zual tawh a, a inhnawh lut tawlh tawlh a, ‘hei damdawi ka…’ a thianpa chu a lo leng awrh awrh a,  a rawn melh tawk tawk a, a rawn hmuh chuan tlemin hlim hmel a pu deuh a, a tlai hman ta!
      An chhehvela motor horn ri ruai ruai te, mipui zi nuaih nuaih te chu engmah a hre tawh lo. A dawmdawi lei chu  a hum ngawt ngawt a, tlemin lo haw hma deuhin damdawi chu pe hman ta se a thianpa, a hmangaih chu a chhanchhuak hman ang em? Tunah chuan chhan rual a ni ta lo. A TLAI ZO TA !!



Tuesday, 10 May 2011

POKER

                              Zantir thlimin zingtian ka thlira
                              Zan mu lo a chhun ngui huamin ka bel
                              Hmakhua dawnloin lenrual ka khawm
                              Hlimte'n kan bel e, poker table
                              Nui hiau, seih leh hlim awrawl nen
                              Allin leh fold karthlakin
                              Damchhan tumin kaichhan kan sawm
                              'chips min lo pe' tiin
                              Hei lo liama Zonunmawi
                              Nghei lo hian ka awm ve fo
                              Thiante zarah
                           


                            Za lam tluang pheiduai zawh ho turin
                            Poker buddies lungrualna tlang kawnah
                            Mawlhmuar kan si thlu, titi vawrh na'n
                            Hlim leh lawma nui her herin
                            Zan kan tumtawi e keimahni'n
                            Tu dang ngailo, nui uar uar
                            Zingtian akva leng lo hramin
                            Laikhum belhzai rel r'u tiin
                            Hei lo liama hlim zan hi
                            Nei lo na'nge keimahnin
                            Poker ta sa sa




(ho khawp mai, mahse a hlu ti duh tan chuan hlu ve khawp ang)
                         
                            

Saturday, 7 May 2011

LUNGAWILO

Ka chak a, ka ban a, ka tlan
Ka nei a, ka ei a
Ka nghei leh tho si
Hlun ka zawng a, un ka hmu a
Nuih ka duh a, ka ngui a
Hmui ka duh a, ka ruihchilh a
Nuam zawngin ka zuan a
Ka tla sil leh thin
Neih chakin ka bei a
Ka hmu ta cheng a
Ka lungawi chuang si lo
khawvel ka thlir a,
ka lungawi thei lo a
Chhuahsan ka zuam si lo
Kumhlun tur awmlohna ah hian
Nunhlui ka thlir a
Ka ngai a
Tuna ka lungawiloh lai ngei pawh hi
Nakinah chuan
Ka la ngai ngei ang.

PU KHUMA THLAHRANG



         Thlahrang hi ka lawm vak lo. Ka hlau chu ka ti chiah lo a, ka nello  a ni.Miin an han sawite pawh hian ka ngaithla tha duh vaklo thin; Mahse ka puin ‘Pu Khuma thlahrang’ min hrilh erawh hi chu hlau teh mah i la ka ngaithla kham theilo. A ziah hialin ka’n ziakchhuak teh ang.
        Ka pu leh pu Khuma chu Mizoram khawthlang lam, khawlian lo tak atanga lo chawrchhuak dun an ni a, naupan tet atanga inkawmngeih, inzui rawt mai thin an ni. Rambuai laite pawh khan vai sipai kapin an lo hmanhlel dun ve hle tawh a ni awm e.
       Tuna thlahrang kan sawi tur hi amah Pu Khuma thla niloin Pu Khuma thlahrang tawn leh hriat, amah chhaihbuaitu, ka pu hnena a hrilh, ka pu in min hrilh chhawn leh a ni a, ‘Pu khuma thlahrang’ tiin ka vuah ve ta ngawt a ni.
       Amah Pu Khuma hi a boral tawh a, hemi a thih tum pawh hian thlarum leh thla-ai vangin lumen puitute pawh an thlabar hle nghe nghe a ni. Hetih hun lai hian naupang se en rual awm vel chu ka ni ve tawh a, hrechiang chiah loin Pu Khuma thlahrang chungchang chu kan sawi nasa ve thei hle. Kan sawi tam ber chu, Pu khuma thlahrangin inriak tlangval ho a bawh tih te, archhiar a zen tih te leh inriak tlangval ho pawh riak rei ngam loin an inpu chhuak tih te a ni hlawm. Engpawh nise naupang titi niloin amah ngeiin ka pu hnena a thlahrang tawn chanchin a sawi hi i ngaithla tawh teh ang.
     “Khawsak awlsam zawkna um avang leh lusun khawhar avangin hmun hrang hrangah ka pem kual a, ka nupuiin min boralsan hnu phei chuan awmhmun ngaia awm reng kha ka theilo a ni ber mai. Khaw hrang hranga ka awm kual hnuah Khawzawlah ka pem a, hetah hian a ni thil mak tak mai leh ka nunkhua chawkbuai em em tu ka tawn tak ni.
       Khawzawlah chuan mi in malding pakhat hlui tawh lam hi luahin ka’n parawl ve leh ta a nih chu. Ka luahtirh zan chuan thenawm khawveng ho an lo chuangkai nak nak a, hawih an hawmin keipawh ka tlangnel ve deuh nghal mai. Hlim takin kan inkawm khawm a, hriatloh Karin hun a lo kal ve duak duak a. Leng hawn hun awm velah chuan an tin ta hlawm a. Awmhmun sawna khawthar kai chan chang ngang ka ni bawk a, ka mut a chhuak lo hle mai. Bathlarah te chuan ka’n hawi vel a, thlamang lai a nih avang leh khua a hnim deuh avangin thui phei zawng a hmuh theih loh.
       Chutia ka tawi ka tawi lai chuan keimahah hian tunhma lama ka la hriat ngai reng reng loh, hlauh ruk deuhna a ni ta ber ang chu, ka tirilah hian engin emaw mi tham tlat mai a. Ka sawi tawh ang khan parawl, mahni tal tal a tal thang ka ni a, hetiang hlauhna ang chi hi chu ka hre ngai lo hrim hrim a ni. Ka nupui thi ta kha ka ngai em em a, a thla tal hi hmu i la, te ka ti fo thin. Thlahrang leh thlarau hlauhna lam hi ka hre ngailo reng reng a; Mahse zanina ka awmdan chu a dang tlat !
        Ka sawithiam dan ber chuan, kha inchhungah keimah chauhin ka awmlo tih kha ka hria a ni ta ber awm e. Ka hnungchhawn lam apiangah hian ‘awm’ hi a awm zel mai a, thawm a nei lo a, mahse ka hnunglamah a awm tih hi chiang em em in ka hriain ka mitthla thei tlat a ni. Hnungzangah tang a vak cham cham mai. Ka hlau chu ka ti phal chiahlo; Mahse a nuam lo.
        Chianglo hlaua patling tlan ngawt thu awm lo, pawngsen tlaivar ngawt thu awm hek suh, chak lo tak chung chuan ka mu ta nge nge a. Ka mu fel chauh tih chuan kawl a rawn rum dar dar a, ruah a rawn tla phuar phuar a, keipawh chu ka lo muhil ve ta a ni ang chu- mumang ka lo nei a.
        Ka mumangah chuan vai sipaiin min lo man a, kan kut hnungkhirhin kawng chep zetah hian min lo chhawm a, kan kal chakloh deuh chuan min lo nam leh dawrh thin a. Tumkhat chu min lo nam na deuh a, ka han pe tek chu ka harh ta hlawl a, khum atang chuan ka lo tla lek lek chu niin. Ka han harhchiang a, ka khumah chuan keimah chauhin ka lo  mu hauh lo !!
        Hlauhna tak takin min tuam ta. Ka bula mu chu ka hmulo a, min si hek lo. Ka en ngam lo a, in leh pawh ka inlet ngam lo. Ka hriatna thazam(?) erawh chuan a hre chiang hle. Palian pui hi ka lam hawia saisirin ka hnungah chuan a mu ve run mai a ni. Tukhum sam a tho tha duh sang sang hle.
         Ruah a la sur cherh cherh a, khawpui a ri kal rum rum bawk a, kei erawh chu muhil thei ziazang ka ni lo. Ka inlukhup a, ka tawm tlat mai a ni. Thli a thaw vuk vuk a, ka tukverh pakhat chu a inhawng niin ka hria, a inhlap ri leh thak thin a, pawnpui kar atang chuan ka’n bih a, chtih lai tak chuan kawl a rawn phe zuai a- bangkila ka thil hmuh chu le(h) !!
        Pawnpui chu ka keu dek dek a, kawl a rawn phe zuai a, tukverh chu inhawng loin tha takin a inkalh; Mahse ka hmazawn bangkil, banphak mai ah chuan mi pakhat hi pawndum batin a lo ding zun mai a, a hmel ka’n en chiah phei zawng patling ka ni, a tih theih loh. Bangkila ding zun chu Keimah chiah chiah a ni tlat!
Phut pawh ka phu lo, a khurhin ka khur nghal a ni ta ber awm e. Ruah a sur zel a, tek te pawh a tla ri rum rumin ka hre ta, kei erawh chu ka mumal lo. Chiang taka ka hriat erawh chu khawvar dawn hnaihah ka bula mu pa chuan chiang em em in ka nakah min rawn kheuh a nih chu; Mahse chumi hnu chuan keimah chauhin ka mu leh ta a, khua pawh a var zui ve ta mai.
       Zan hmasa bera ka thil tawn ang chu ka tawng zui ta lemlo bawk a nuam ti chiahlo chungin chu inah chuan ka khawsa zui chho ta naw naw a. Khaw mipui te an felin an bengvar bawk a, thian kawmngeih tak tak pawh ka nei ta nual mai. Chu’ng zinga ka kawmngeih ber Pu Zinga chanchin hi ka’n sawi ang e.
       Pu Zinga chu kei aia U daih, ramvah hrat zet mai hi a ni a, sapelin kan chhuak dun fo mai. Nupui sun tawh ve bawk a nih avangin kan titi pawh a rual hle. Tumkhat chu sih tlan sazuk ki hreu kah tumin kan chhuak dun a, kan tumloh zawk sazuk tiat dawn lai sakhi kan kap a, kan hlim hle tho mai.
       Chumi kan ramvah haw zan chuan salu lawmna angreng atan ka inluahah a tuitling kan indun a,  kan titi pawh a tui hle. Chutia kan titi a kan tawng ring tan ta hle tihah chuan hun rei tak ka lo hriat tawh loh, he in ka luah tirh zana keimaha ‘awm’ ang kha a awm leh ta tlat mai. Mahse Pu Zinga nen kan nih avang erawh chuan hlauh zawng ka hlau lutuk lo. Pu Zinga chu zunram thiar turin a tho tuah tuah a, inthiarna pindanah a lut fel chiah tih chuan bangkil khawilai atang emaw chuan pitar pali hian miruang tih hriat tak mai hi pai deuh tawng tawng chungin an rawn zawnchhuak ta mai. Au chhuah ka tum a, ‘em a’ ka ti leh deuh a. Ka thil in in min hneh deuh vang emaw tia ka’n inthin harh pawh chuan a lang chiang ang tawlh tawlh a.
       An thil zwn chu ka khumah an nghat a, an lo kalna lamah an pilbo leh ta nghal a. Ngampa lo tak chungin ka khum lam chu ka zu pan a,  ka khuma ruang an zalh chu ka han en a, ka phu chiang kher mai. Pu Zinga ruang a ni. !
        Ring lutukin Ka ko tuarh a, inthiarna pindan lam atang chuan min rawn chhawn dut dut ang lawi a, ka  khuma ruang let reng chu ka han en a, ka chiang bawk si. Kawngkhar a ri rak a, Pu Zinga chu kekawr zipper siamtha mawlh mawlh chungin a lo chhuak a, khum bula ka lo ding ka ho lai chu min rawn en a, ‘engnge ni ta’ a ti a, ka chhanglo. Khum chu ka han en leh a- khum ruak chu.
        Mak ka ti hle a, mahse chutiang thil belhchian dawl chiahlo tur han sawichhuah chu a patling hna loin ka hria a, ka hrilh ta lem lo; Mahse ka tawng tlem tak em avang erawh chuan a ngaih chu a tha chiah loin ka hria. Rei vaklo kan thu leh ren rawn a, a lo hma ta vak bawklo nen mu turin a tin ve ta a.
        Chumi zan chuan rinloh takin engmah ka tawnglo a, ka mutui hle mai; Mahse a tuk tlaia ka thil tawn erawh chuan min nghawng na ngei mai. ‘Pu Zinga an huan mawngah thia chhar a ni. A thluak a baw nuaih a, a hmel hmuhtlak a awm lo.’ A hma zana thilthleng te nen ka han hmehbel a, mak ka ti tawlh tawlh mai.
        Ka thil tawn maksak tak tak avang leh ka thian tha ve berin min boralsan leh  tak zel avang chuan nuam ka ti thei thlawt lo a, Pu Zinga boral atanga thla khat pawh tling loah Selingah ka pem leh ta a ni. A khaw mipui felin boruak nuam hle mahse ka thil tawnin a zirloh em avangin khawzawl ka chhuahsan chu ka thaw huai mai.
       Selingah chuan mi inhnuai luahin ka inbengbel a, nuam pawh ka ti viau.  Khawpui hnaih nge nge chu khawsak pawh a awlsam ve ta deuh niin ka hria. Kum chanve lai a lo ni ta mai-khawzawl ka chhuahsanna chin pawh.
      Zankhat chu thenawm sipai chhuti te nen mi pali lain ka inluah ah chuan sipai zu kan in a, kan hlim dar dar hle. Peg hnih thum kan peg hnu chuan ka awmdan a dik ta tlat lo. Hmana khawzawla ka boruak tawn ang khan min la kiansanlo tih ka hre ta mai- ‘awm’ a awm leh tlat tawh. Lu lamah a lo kai ta deuh chiai bawk a, ngai pawimawhlo luiin ka titi lawng lawng a, a chang leh kan han zai vei thul. Nuam ve thin tak a ni- hetiang boruak hi chu.
      Pai tuang tuang chungin pawn lerah zunram thiar turin ka chhuak a, ka kawmchhak thim leh thimlo chinah chuan thingrem ang tak hi a lo inhung teh ngawt a. Rui deuh tawh nen phun nuah nuah chungin ka pan chho a, ka han en chiang chu kuang a nit lat! Mi rap deuh viau mahse ka’n panchho lui hram a, harhfimlo bawk nen ka’n inpal khut leh nghal a. Kuang bawh deuhthaw chuan ka’n tlu chho tehreng a nih chu.. Ka inthing harh a, kuang ka’n bih chuan miruang a lo let ngut mai.
       A ngaihthatthlak leh ta hauh loh mai. Pu Zinga nena kan zan hnuhnung ber te kha min ngaihtuahchhuahtir a, tuna ka thil hmuh hi hlauh lamah ka la lo a, ngaih erawh a tha mawlh lo. Kuang chhunga ka miruang hmuh chu tuna kan zu inpui mek, kan sipai chhuti-a saw a ni tlat.
Inchhung ka va luh leh chuan an lo titi nasa hlawm hle a, tu tawng mah inngaithla tawn loin au ti tih, kuk titihin an lo bei a, lo zai ngawng ngawng tawk lah bo lo. A tuk lui kal an lo rawt chu niin- ta deuh deuh chuan.
       A tukah chuan lui lam panin kan thawkchhuak ta a, nuamlo ti ru viau mah ila sawichhuah chu nuamlo ka tihzawk fe avangin ka ngawi reng a, Sipai-a erawh ka mitmei uluk hle. Lui kan thlen dawn chuan kan phur hle a, kan auin kan kuk a, kan zai thul, ‘lui pui thlen dawna kuk ruih ruih pa rawn an awmlo’ tih zawng zawng kan neih zo a ni ber e. Lui kan thleng a, engamah hmain tui dai huaina kan han ti hmasa phawt a, nawm zawng a nuam e.
        Bomb kan keng a, kan ren lemlo bawk a, a rem lai laiah kan vawmthla hmiah hmiah mai a, sangha pawh kan man ta nual mai. Chawfak hun velah chuan hmun rem laiah kan innghata, rawng kan bawl ta a. Chutia rawngbawla a then an phet laiin a thenin an lo thli sen zuai zuai bawk a, thian pahnihin kan bula li lian leh thuk tak mai chu vawm tumin an lo inpuahchah mek bawk a.
       A puak ri dur a, au ri rawih rawihin a zui nghal a, a thenin chang an lo tum thul, nuam ngei mai. ‘Chaw fak phawt ang, lut nghal zawk ang’ tih thawm a inpawlh nuaih a, sangha a lang nuaih nuaih bawk a-nuam ngei mai.
Kan sipai chhuti-a chuan li mawnga luh a chuh ta tlat mai a, a thawkchhuak zui nghal mai bawk a. Engtik laiin nge ka chet ka hre lo, a hmaah chuan ka din khalh a, ‘kal suh, a hlauhawm’ tih chiah ka sawi thei. Thian dangte chu an lo nui tlawrh tlawrh a, sawi ngaihna vak ka hre si lo. Ka tihsual lian ber chu ka lo danglui ta lo kha a ni.
       Darkar a liam a, a liam zeal , khua a thima Sipai-a chu kan la hmu chuanglo. Li mawng a thukin a zau angreng si. Tui te chu thiam ve nial nual mah ila tuitla zawnga li mawnga han che vel turin kan thiam tawk si lo. A tuk khawvar rual vel chuan engtin tin emaw kan hmuchhuak thei ta hram  a ni. Sipaia kan chan ta..
Tui ah  a awmrei avangin a khawng deuh a, a kun deuh khul bawk a, chu chu han siamrem tumin ka khupin a kawngah ka do a, ka elh ta vak a, a ri thawt a, a ka atangin tui a rawn baw hawk bawk a, ka phu chiang ngei mai.. A taksa erawh a ngil ta deuh.
      Chumi hnu karkhatna chiahah chuan a ni-zan pawh a la rei lo, ka nawmsam meuhloh avangin ka tluzal a, ka lo chhing sek a ni awm e. Ka kawngka a rawn intheh hawng thuai a, Sipaia ngei mai kha a rawn penlut ta. A tuitla hmel, dang var pup leh a heh dukchur nen khan min rawn pan chhut chhut a, Tui atanga kan lakchhuah hlim ang chiah khan a meng kuau a, a mit atangin tui a rawn luangthla nguai nguai bawk a.
Chutih lai tak chuan tek a rawn tla ri dur a, current a thim nghal hmiah bawk a. Ka sirah chuan a rawn mu ve ta a nih chu!! Ka tim sung sung mai. Chutah le- a kut vawt thlur mai chuan ka nghawngah a rawn khawih a, te chhuah ka tum leh ka thei si lo. Chumi hnuah a ruang kawi ka siamrem dawna ka tih ang khan ka kawngah a khupin a do a, ka chalah leh ka keah dawmin min han elh tak tak mai a nih chu. A tir khan ka hlauin ka rap viau a, a rei hnuah chuan ninawmin hahthlak tak a ni- Khawvar hma min elh a nih chu.
        Sipai-a ka hlauh vang pawh niloin eizawnna chhuanlama hmangin Aizawlah ka pemlut ve ta a.Dawr te kaiin khawsak a lo awmsam ta deuh bawk a, chubakah thlahrang hoin min tihbuai lohna pawh kum hial a lo vei ve ta a, ka nun pawh a nuam ve viau. Pu Zinga leh Sipai-a pawhin ka ngaihtuahna an luah reng ta lo.
       Hetia ka intih Aizawl mi hle hnu hian vawikhat chu hmelhriat hluite tlawha riak nghal turin zanah ka chhuak a, hmelhriat taxi driver ka inthlahtir a ni. Kan tluang vaklo a, a kete kan thlakin kan ding deuh sek bawk nen zan tlai tawh takah Seling dai kan thleng a. Chutah chuan a ni ‘awm’ a la awm reng a, min la kiansan lo a ni tih ka hriat tak ni. In a lo lang tan pheuh pheuh tih chuan kawngsirah hian mi pakhatin min lo phar a, driver chuan a hmulo nge a tlan tlang ta mai a. Keichu tukverhah dakin ka’n lehhawi kher a, ka rei, min lo phar tu kha tuna ka bula thu ka driver hi a ni. !
       Ka ngaih reng a tha thei lo a, driver haw tur pawh chu chelh ngial ka tum a, pawisa pekbelh hial ka tum pawhin ka chelh thei lo. Hemi tuma ka tihsual pawi ber chu ka lo chelh lui ta lo kha a ni.
Ka thlenna te nen chuan kan inhmulo rei angreng tawh bawk a, kan ti ti luam a, mut kan tum chuan dar hnih a lo ri dawn reng tawh mai. Zung turin ka tho a, chutih lai tak chuan kawngka kik ri a lo awm a, ka han hawn chuan driver kha a lo ni, ‘ ka motor a chianglo bawk si a, ka lo cham ve leh si mai ang e’ a ti a, ka thaw huai mai. Thlenin nulain chhuatah mutna min siamsaka, ka(n) mu dun ta a.
       Kawngka kik ri dawt dawtin min tiharh a, ka tho a, sana ka han en chuan dar thum a lo pel tawh a; Driver a awm hauh lo. Kawngka chhunglam atangin a inkalh a, a chhuaklo chu a ni phawt ang a. Kawngka ka hawng a, rawlthar pahnih hian hlauhthawn hmel takin ‘taxi a accident’, ‘khawiah?’ a hmun an han sawi chuan nichina min lo phartu lo dinna zawn chiah kha a ni. “Engtikah?”, ‘dar hnih vel khan pi mawiin ri rum rum a hria a, a reh leh nghal mai a, mutthilhsan a tum a, a ngaih a tha thei thlawtlo a, a fapate pahnih a zu entir a, driver chauh a chuang a, a lu a keh vek, hmuhtlak a awm lo’. “Dar hnih vel”, karei tu’nge ka mutpui kha le!!?
       He thil ka tawn hnu atang phei hi chuan zantin, khawthim dek dek atang hian min tibuai a ni ta ber mai. Hlauh zawng ka hlau tawh mawlh lo, mahse zanrei mut duh hun tawh a, Pu Zinga, driver leh Sipai-a te an han zai ruah ruah mai thin chu a ninawm ve khawp mai.
Chutiang chu a nia, ngaiah ka nei titih deuh hial tawh a; Mahse nizan ka thil tawn erawh chu ngaih han tih sam a, ngaihzam chi ziazang niin ka hrelo mai kawngi pa (Pu Khuma’n ka pu a koh dan) Chuvang a nia, zingkar karah ka rawn len chuk chuk ni.
       Nizan chu zan dang anglo tak maiin kan thlahrang ho an reh phian mai a, tawng mawilo nilo se khua lam lam a har dawn mai. Chutia reh ta hmak chu kei pawh ka awm thiamlo lek lek zu nia; Mahse mut dawnah chuan an lo lang leh ta nge nge tho a.
       Pu Zinga leh Sipai-a leh taxi driver mai bakah ka la hmuh ngai loh pakhat palian angreng tak mai hian kuang hi an rawn zawn chhuak a, Pa lian-a chu ka la hmu hauhlo na a khawzawl ka awmtirh zana ka khuma rawn mu ve kha a ni tih ka hre mai. Ka rin ang em em chuan a lo lian lo. Mi pawh hian hlauh lai leh chiang vaklo a ‘ramhuai lianpui’ an tih te pawh hi hmun ralmuangah han hmu se chutiang he hu an lo ni lo tih an hre ve ngei ang.
       Chu an kuang rawn zawn chu bang thlang lam depah an zu hung ta a. Zantin min rawn tibuaiin thlahrang hrang hrang rawn inlar mahse kuang leh miruang hmuh kher kher erawh chu ngaiah a neih theih tlat loh. Ngaihtha lo takin ka zu panthla a, kuang chhunga miruang mu ka hmuh phei chuan ka ngaih a thalo leh zual; Achhan chu kuang chhunga miruang let reng chu tu dang niloin keimah ngei  ka nit lat!”
       Khiti zawng khi Pu Khuma’n a thlahrang hmuh, tawn leh hriat a sawi chu a ni. Khimi a sawi zo khi ka pu te in atang chuan a haw chho a, a kawngka luh dawn ah, hmun rualrem lai tak lehnghalah a tlusual a, ka pawh chhawn loin a boral nghal a ni.
      Pu Khuma, a nuna thil mak tak tawngtu, thlahrang sawi tur hre em em mai chu thlahrang sawi theiin a awm tawhlo a, ama thlahrang chungchang zawk chu miin an sawi thin ta zawk a ni. Hun a awm chuan ama thla tak tak hrang chanchin kan la sawi dawn nia.