Wednesday, 16 November 2011

KHAWIAH NGE A PIAN DAWN?



(Inchhungah Mary alo lang a, krismas hla play in a lam deuh awt awt a, chutih lai tak chuan a phone alo ri a)

Mary: Hallo, awi lal Eli…

Eli: Awi merrr, nuam dawn lutuk !

Mary: Eng nge a…? han sawi teh, mawh…

Eli: Apa’n 24th zanah kan in hman a phal, kan party thei eh…
! Nuam dawn   lutuk. Nangmah leh Jo jo chiah ka la hrilh lo a, ka lo hrilh che a nih chu. Lal Jo chu lo hrilh mai rawh.

Mary: Yesss.. va nuam dawn ve.. ka va’n chak tawh. Awi ka’n hrilh nghal ang e, Lal boiha chu.

Eli: Aw lo hrilh nghal rawh, a phur leh hawrh hawrh ngawt ang. Nih photz, balance pawh ka nei lo, ka dah dawn.

Mary: Aw ba hai ! ( phone hmeh pahin a phun zui mawlh mawlh a,) awi ngati nge a tlang theih miah loh a, Lalboiha hi… Signal lah hi a… ka va’n ning tak ! SMS Pawh a tlang thei lo, ka ning… ka tah a chhuak….
   (Chutih lai tak chuan Mary phone chu a rawn ri a)
Awi, tu nge a, unknown number a inti ringawt maw le, Hallo.

Gabriel-a: Hallo Mary, Lalpa vantirhkoh Gabriel-a ka ni a, vawiinah hian Lalpa thuchah I hnenah ka rawn thlen dawn che a ni.

Mary: Eng a, Tumaw i nih a, mi bawl te i rawn tum emawni le? Ka peih ve miah lo a nia aw.

Gabriel-a: Ni lo Mary, Pathian mitirh Gabriel-a ka ni. Nang hi Pathian duhsak zawng, A mithmuh a mi tling leh tha, thianghlim i ni. Lalpa’n a awmpui che a, a awmpui zel ang che.

Mary:(Mangang takin) Awi eng nge a awmzia, ka duhlo…

Gabriel-a: Mary, hlau suh Lalpa’n a ti chak dawn che a, a awmpui zel dawn che  a lawm.

Mary: Engati nge kei kher min lo phone a, ka va’n hrethiam lo.

Gabriel-a: Mary, thil pakhat hrilh tur che a tirh ka ni, ka thusawi hi ngun takin lo ngaithla rawh. Hei krismas alo thleng leh dawn ta a, Mizoramah pawh nasa takin ropui takin an lawm leh luih luih dawn a ni; Mahse an lawm chhan ber Isua hian he ramah hian pianna hmun tur a hmu lo. Nawmsipbawl leh huau huau thinlung an pu hlawm a, Pathian thuawih inti, corps leh kohhran hruaitute lah an buai lutuk a, an thinlunga Isua piang tur chu an ngaihsak hman si lo. Chuvang chuan Isua hian pianna hmun tur a hmu lo a, I thinlung kha a duh a ni. I thinlungah khan Bethlehem bawngin a rawn hung thar leh ang a, nangmah atangin mi tamtakin Isua diktak chu an lo hre thar leh thei ang.

Mary: Awi, a va’n mak awm ve, kei te chu..  ka in hmang vak bawk si lo a, ka mizia hrim hrim te hi a !!  Thian ka ngainain thiante nen a thiltih ho leih leih te nuam ka tiin krismas zaikhawmnaah pawh ka kal ngai mang hleinem. Engtin tehlul nge keimah atang hian miin Isua an hriat theih ang?

Gabriel-a: Mary, thinlung lam entu chuan a duh che a ni. Ngaithla rawh Isua nu Mari kha a hun lai khan tuma’n Isua nu a ni ang tih an ring pha hleinem; Mahse pawn lam en lo a chhunglam entu chuan a thlang mai a ni. Chutiang chiah chuan nang pawh a thlang che a ni. Mangang suh i cousin Eli  pawh a hun alo thlen tikah chuan nangmah puitu tha tak ala ni ang.


Mary: A…. aw Gabriel, ka tlin lohzia leh fel lohzia chu ka hria a; Mahse ka thinlung chu Pathian ka pe e. A thu ang zelin ka chungah thleng rawh se.(Phone a dah a, phun zui mawlh mawlh chungin a chhuak ve ta a)


( Eli te inah Eli leh Zakaria an lo lang a)

Zakaria: Mate, Jo jo te chu i hrilh tawh maw, 24th zan chu?

Eli: Mary ka hrilh a, Jo jo chu lo hrilh ve mai rawh ka ti.

Zakaria: A that chu, anni pahnih pawh hi a… innei tawh se a tha ang, an inzui rei ve tawh e…

Eli: Kei ni pawh hi…( a nui har har a)
       (Kawngka kik ri a lo awm a, Eli, in awm emmmm?)

Eli: Awm e lo lut rawh, Lal Jo-a ni maw… mi chhe sawi chu koh aiin an hnai.

Jo jo:(lo luh pahin) E.. Zakaria pawh chu. Chhun chhunah in lo inrim leh ta a ni maw…

Zakaria: Lo thu mai mai the boiha, Mary’n a hrilh tawh che em?

Jo jo: Eng maw, min hmangaih thu  maw? ( a nui huah huah a)

Eli: Kan programme kha… a la hrilh lo che emawni le… ka hrilh nghal ang a tih kha, balance a neilo leh pek tawh a ni ang.

Jo jo: Chutiang proramme engmah min hrilh lo.

Zakaria: 24th zan chu hei Eli pa hian an ina lam a phal ve ngat a, mak rapz mawle…

Jo jo: Ehe… a tho a te hi a ni lo maw, tiger-a chu…. A va mak ve !

Eli: Umm… eng nge a phal loh bik kher ang, hetiang hunah te chuan kan hlim an duh ve tho a lawm.

Zakaria: Nia, hetiang hunah hi chuan in lak strick vak chi pawh a ni lo, bakah a theih tak tak loh a, inchhunga hlim deuha kan awm theih chuan lawm hle se a ni mai.

Jo jo: (din pahin) Kan ri huau dawn nia. Hei kalna tur ka nei a, ka rawn peng lawk mai mai a nia.

Zakaria: Aw, keini pawh chhuah kan lo tum a sin, chhuak rual i la.. I hman tawh a ni lawm ni, mate.

Eli: Hman tawh mai e, chhuak i la ni mai lawm…( an chhuak ta a)
                                                         


(C.O, C.S.M leh Corps secretary inkhawm bang an lo lang a)

C.S.M: Zanin kan secretary chu i sawi tha hle mai, khatiang kha tun lai kan mamawh a ni. I ti ve lo maw CO-pa…?

C.O: Tehreng mai, tha ka ti lutuk. Tun lai chu ka rilru ah eng eng emaw ka  gaihtuah vak vak mai a, kan secretary thusawi nen te pawh khan a inzul thei viau dawnin ka hria. Ti r’u kan inah thingpui sen hang in pahin I thu khawmuang lawk ang u hmiang…

C.S: A… keini thusawite in lo uksak ve chu a lawmawm hle mai. Ni e, in inah te pawh chuan lutkawi ila a pawi hleinem.   ( an thu a, an ti ti chhunzawm zel a)

C.O: ka han sawi tak ang khan tun lai ka rilru chu eng eng emaw  hian mi kap a, kumin krismas-ah hian thil danglam deuh lo thleng tura hriatna hi zu nei deuh tlat i a mawle…

C.S.M: Keipawh ka nia sin, kan tun lai boruak ka’n en hian Pathian hi kan ti lungnilo takzet tawh hian ka hria a, a hring a hrana hremna hi a rawn thlenlo a nih pawhin khawngaihna hun hnuhnung chhinchhiahna engemaw tak tun krismas hian a rawn thlen mai rinna ka lo nei rilru ve ngawt bawk a sin.
C.S: Kan ngaihtuahna pawh zu han inang tlang hlawm a… Zanin ka thusawia ka’n sawitel tak loh la rilru luah rengtu pakhat chu tun krismas hian Biakinah nilo khawlai ah Isua hi a piang dawn tlatin ka hria. A chhan chu khawlai ah hian amah mamawhtute an tam zawk si a. Chuvang chuan ka lo ngaihtuah mai mai a, kumin urlawk zan chu ka teichhuak anga a mamawh apiangte hnenah Isua chanchin hi ka hrilh ang, ka lo ti ve ngawt a sin.

C.O: Ngaihdan tha tak zu nia, engemaw hlawkna tak zawng a awm ngei ang, keipawhin ka zui ve ang che chu, rem i tih chuan…

C.S.M: Ka rilrem zawng tak a ni. Kan pathumin thawkchhuak ila, kawmkar leh veng kilkhawr tak tak te leh hmun hulum lai zawng zawng nen suartluan ila. Amah mamawh ngawih ngawihtute awmna chu Isua hian a thlahthlam ka ring lo, keini pawhin kan thlahthlam tur a ni lo ang.

C.S;: Min phurpui chu a lawmawm hle mai, keini aia titur awm an awm chuang hleinem. Urlawk zan chuan zanriah eikham atangin thawkchhuak ila, a zau thei ang ber hrut kan tum dawn nia. ( inthlahna thu eng eng emaw an sawi a, an tin ta a)]



(Jo jo amahin a lo lang a, phone a hmet mawlh mawlh bawk a)

Jo jo: Hallo boih, eng nge i tih a?

Mary: Aw boih, hei ka insu vel mai mai.

Jo jo: Min va’n ngaih loh hmel..

Mary: Umm… ringawt a, engvang chuan….?

Jo jo: I tawng dan kha….

Mary: I ho e mai, eng nge i tih zawk a?

Jo jo: Ka inbuatsaih vel, zanin a mi tur he he… ka chak tawh rapzz, i rawn chhuak hma thei dawn em/

Mary: Ka hrelo, ih…. Jo, englo… TTT in ka lo hrilh mai ang che.

Jo jo: Eng nge a, buaina a awm a mi? Min hmanpui peih tak tak lo a mi, sawi chiang mai rawh.

Mary: Aih boih, chutiang lam a ni lo, a…. I hrethiam lo ang, thil tih tur pawimawh deuh dang ka nei a.

Jo jo: A va in ngaihpawimawh loh thlak ve… zanin anga thil tihtur ka nei, lo tih. A tawk a nih chu !!!

Mary: Jo, i hrethiam lo a nih kha, Pathianin min thlang tawh a, Isua pian thu hi zaninah ka puanchhuah a ngai, khawiah nge min tirh dawn pawh ka hre lo.

Jo jo: Mi zawng zawng in Isua pian thu te chu an sawi vek a lawm…

Mary: Jo, I hrethiam lo a nih kha Ata ka ni tawh a, A thu ang zelin ka awm tur a ni.

Jo jo: Lo nih vel tak chu ba hai !! ( amahin a phun zui mawlh mawlh a) Va’n thing tak e aw… a ho leh ta vek mai. Zanin angah te chuan hlim takin kan awm ve ang chu tih nak laiin. Break nghal dawn !!!!!!!( chutih lai chuan a phone a rawn ri a) E he…. Tu’nge a, unknown number tih ringawt. Hallo

Gabriela-a: Hallo Jo jo, Pathian vantirhkoh Gabriel-a ka ni a, ka thusawi hi ngun takin lo ngaithla rawh.

Jo jo: Eng a.? Mi buai lai lai in, tu’nge i nih a, i va mawl ve.

Gabriel-a: Pathian tirhkoh Gabriel-a ka ni. Hlau suh la, ka thusawi tur hi lo ngaithla rawh. Tunah khan I bialnu Mary kha then i tum ti raw?

Jo jo: Engtin nge chutiang I lo hriat a, tun ah ka ngaihtuah lai mek chauh a lawm. Eng nge min hrilh duh han sawi teh.
Gabriel-a: I bialnu hi then tum suh, ani chu Pathianin a thlang a ni. Tun lai khawvel bawlhhlawh nupui pasal tur tha pawh an van tawh lai a hetiang mi i nei hi i vanneih zia inhria la, a rawngbawlna kawngah pawh theihtawpa puih tum ang che.

Jo jo: Aw le.. ka hrethiam ta e, ka tum ang e.( Kawngka kik pahin Eli a lo lut a)

E li: Lal Jo, i awm maw, chhuahpui turin ka rawn sawm dawn che.

Jo jo: E, lo kal rawh Eli, khawiah nge i chhuah dawn zakaria awm na nge?

Eli:Matea  hman lo a, awi ngati nge i va in la cool ve ha hai… I hmel dik miah lo, in in hau ni maw…? In tha em…?

Jo jo: Tha lo hran lo e, kan tha; Mahse zanin kha Mary hman ve dawn lo a….

Eli: Awi va’n thing thei, ti nge a….?

Jo jo: Thil tihtur pawimawh deuh a nei a, tihbuai chi a ni lo ang. A….. nia sawifiah mai chi pawh a ni lo.

Eli: A ho e a, ka’n phone ang e, awi.. pawisa sawmruk chiah a lawm ka neih, miscall na pawh a daih tawh lo.. khawimaw i phone ka lo hmang mai.

Mary: ( langlo lam a tangin) Hallo boih.

Eli: Ha hai keimah zawk, in pa phone ka lo hmang a.

Mary: Awi Eli, eng nge in tih a?

Eli: Hei Jo hi chhuahpui turin ka sawm a, zanin ami vel tur. Lo phei ve lawk teh thil sawi tur a awm.

Mary: Awi eng nge ni ta a, ka buai deuh a sin, pawi lo ka lo phei ang.

Eli: (phone dah pahin) Jo, ngati nge a hman dawn loh chhan a sawi em?

Jo jo: Aw sawi e, Pathian ta a ni tawh a, Pathianin zaninah hian a thu puang turin a ti a niang.

Eli: Vel mai mai chuan, a a deuh a ni lo maw le… Chuan, engtin nge i ngaih a?

Jo jo: Nia, a tir chuan ka hrethiamlo lutuk a, mahse thil mak tak a ni. Isua pian hun lai ang tak tak kha a ni in ka hria tuna  kan hun tawn hi, tunah chuan ka hrethiam vek tawh.

Eli: Nangpawh chu le… awi i va’n mak ve.. awi i mizia nen a inhmeh lo tawp.( kawngka kik, Mary a lo lut a, Eli nen an in vuan chawt a ) Awi merrr !!

Mary: Eng nge nita, unaunu?

Eli: Ka hrethiam chiah, ka hrethiam ve ta chiah e, min khawih zawng khan ka hit mup a, ka var hawk mai. Mary, Pathian belruat i ni, i thiltih apiangah ka pui ang che.

Jo jo: Boih, keripawhin ka hrethiam tawh a sin.

Mary: Awi boih, tak tak maw, engtin nge min hriatthiam theih?

Jo jo: Gabriela’n min lo phone a lawm.

Mary: Awi a remruat dan hi ava mak tak em… channa tur emaw ka tih chu ka tan hlawkna a lo ni ta zawk a nih chu. Zanin chu kan thawk ho thei tihna a ni maw..

Eli: Hey merr, idea tha lutuk ka nei. Zanin kan ina party tur chu Isua chanchin puanchhuah na’n kan hmang daih dawn nia.

Mary: A tha ngawt tak ang, mahse tu nge lo kal ang?

Jo jo: Hmun hran hranah kan kal kual anga, thalai vak mai mai te, hmanna tur nei lo leh hmanpuitur nei lo te leh thilsual titumte kan sawmkhawm anga, ei tur siamsakin hun hlimawm tak hmang chungin Pathian thu kan hrilh anga.

Eli: Tha dawn lutuk, kan hman tum dan hmasa ai chuan nuam fee ang. Lo kal r’u bazar vat ang, khua a tlai mai dawn.(an inzui chhuak ta diah diah a)




( Tin chumi urlawk zan vekah chuan thianzaho khat hi an awm a, khawlaiah meilum aiin an ti ti a)

Rawlthar 1: A va vawt reuh ve… a pa hlanga han hman leh ringawt thin chu..

RawlthaR 2: Meilum ngai lo a lum deuh vang vang pawh a chakawm ve khawp mai…

Rawlthar 3: Ho e, ngaihzawng nei pawh meilum ai hnai hnaiah an tang ziah tho

Rawlthar 4: Dikchiah, keichu ngaihzawng neih vel hi ka peih lo,duh duhin a awm theih loh a.  U mama te pawh nikumah a bialnute nen arsa an kanga, inti no deuhin tlem te te an ei vel a, keima’n ka ei teuh a sin le.

Rawlthar 1: Hei lo en teh u ka phone hi… a mak lutuk, a number lang miah loin min lo call a nia.(an phawk hra hlawm a)

Rawlthar 2: La rawh, hmeichhia a ni hrim hrim, loud speaker-ah dah teh (phone chu a la a, an bial tiau hlawm a)

Vantirhkoh: Hallo, nangni rawlthar duhawm tak tak te u, zaninah hian Pathianin in hnenah thusawi duh a nei a ni.

Rawlthar 3: (phawk hra in) Eng nge awmzia, tu nge i nih a?

Vantirhkoh: Pathian vantirhkoh ka  ni. Hlau suh ula, ngaithla rawh u. Zaninah hian Isua chu a piang dawn.

Rawlthar 4: Isua chu hmanah a piang tawh a, a birthday kan lawm kan lawm tawh a lawm.

Vantirhkoh: Tun lai Mizoram boruak hi en ula, a birthday neitu Isua hi a lawm in ring em? A lawm lo a ni, chuvangin zaninah hian thlarauin a rawn piang leh dawn a, nangni pawhin in thlarau mitin Isua chu in hmu ang.

Rawlthar 1: Engati nge keimahni kher min hrilh, kan corps hruaitute pawh hrilh la, mi dang hrilhchhawn dan pawh kan thiam awm si lo.

Vantirhkoh: Pathian chuan thil te ber anga lang te hi a thlang thin a, a duh chuan eng hmanrua pawh a hmang thei a ni. Nangni pawh Pthianin hemi atan hian a thlang che u a ni. Tunah hian nula Eli te inah kal ula, Isua chu thlarauin in hmu anga, in tihtur an lo hrilh ang che u.

Rawlthar 1: A va’n mak em em !!

Rawlthar 2: Pathianin min thlang maw le..

Rawlthar 3: Lo kal r’u, U Eli te inah chuan kal ang u.

Rawlthar 4: Ni e, Lalpa’n thil min hrilh lo thleng tur chu enturin i kal ang u.
(an kal kiang ta a)



(Eli te inah Eli, Mary, Jo jo leh  Zakaria an lo lang a)

Jo jo: Engtin nge niang kan kal chhuak nghal mai dawn a mi?

Zakaria: Tu nge kan han sawmkhawm ang aw… an lo kal duh hlawm ngut ang em le…

Eli: Pathian kan lamah atang dawn alawm.. kan hlawhtling em em ang.

Mary: Engpawh nise tanpuina dilin i tawngtai phawt mai ang u(an thingthi a, music a lo ri. Chutih lai chuan C.O, C.S.M leh Corps Secretary an lo lut a)

C.O: Eheu eng thawm nge ni ta, thalai sahawk satliah thawm a ni hauh lo. Tawngtai ri a ni..

C.S.M: Ngawiteh u, hei hi kan kalna tur chu ava nih hmel ve.

C.S: Ti r’u i lut ang u..

C.O: (LUH PAHIN) Naute u, in thawm kan lo hria a, hetah hian Lal Isua a awm tih kan hria a ni. Lal Isua pianna hmun zawng turin kan kal a, heti laiah hian alo piang reng a nih hi.

Mary: Isua krista chuan ka thinlung hi pianna atan min dila, ka pe ta. Kum tam tak chhung lo hnawng tawh chhandamtu chuan zanin hian ka thinlungah pianna hmun a nei ta. He thu hi mitin ta a nih angin zanin hian puangchhuak turin kan lo in puahchah mek a ni.

C.S.M: A va ropui em, chhandamtu chu atharin ka lo hre leh ta. Rangkachak leh mura engmah pektur ka nei lo, mahse ka tha leh tui ka theihna zawng zawng a tan ka hlan a, ka theih tawkin a tan ka thawk ang, ka thinlung chu a ta a ni e.

C.S: Hei ngei hi ka rilru a awm, eng nge ka hriatfiah theih si loh chu a ni. Keimahah hian chhandamtu chu a tharin a lo piang leh ta, Ka thiamna leh finna zawng zawng, ka thinlung atan ka hlan e.

C.O: A va mak em, corps-ah a lu ber ka ni a, mahse chhandamtu hian keimahah pianna hmun chang ngai lo a, zaninah hian a tharin a lo piang ta. Hruaitu, hotu ka nihna zawng zawng hi a tan ka hlan a, a hruai ang zela awm turin ka inhlan thar leh e.

Jo jo: Pathian remruat dan hi a va mak tak em, keimahni chauhin kan kalchhuak dawn emaw kan tih laiin tunah chuan kaihruaitu tur tha tak min pe leh ta. Ti r’u i chhuak tawh ang u.(Chutih lai chuan rawlthar rual vantirhkohin a tirh te chu an rawn lut a)

C.O : E heu, eng nge ni ta vala te u?

Rawlthar 1: A mak lutuk vantirhkohin min lo phone a, zanin ah hian U Eli te inah Isua a piang dawn, a tia.

Rawlthar : Nia, a mak rapz, a number pawh alang miah lo. Keini pawhin Isua chu thlarau mita kan hmuh tur thu min hrilh a, amak lutuk U mary hmel ka hmuh a tang khan ka awm dan hi ka hrethiam lo, ka danglam deuh huihin ka hria.( keipawh an ti tliar tliar a)

Mary: A va mak tak em, Pathian mi thlante hi… kei nula satliah mai hi a pianna atan min rawn thlanga, kan corps hruaitute nena a rawng bawl ho thei turin min buatsaih a, tunah hei kum lamah pawh la naupang tak tak te chu a rawngbawlturin heti lai hmunah a rawn tir thleng leh ta bawk a, Pathian hian a duh duh hi hmanrua atan chuan alo hmang thei tehmeuh a nih hi, mahse chumi atan erawh chuan ka thinlung hi ka pek ve a ngai a ni. Zanin ah hian Isua chu thlarauin a rawn piang leh ngei a lawm; Mahse hei hi keimahni tan chauh a ni lo a, mi tin tan a ni. Chuvang chuan kal chhuak ila, a thu hi i puangchhuak ang u. Thalai khawlai a vak mai mai te, sual rawngbawl tum mekte pawh heti lai hmunah hian hruaikhawm ila, an thinlung chu Isua tana  dil sak in naupiang chibai bukna hun hlimawm tak sual rawng kai lo chu nei turin I thawkchhuak ang u.( An kal chhuak a, a tawp ta !! an chhuah laiin he thu hi lo chhiar rik ni se- ‘ Isua hian pianna hmun atan mitin thinlung hi a dil a, mi te ber atanga corps hruaitu lu ber thleng hian kan thinlung chu min dil a ni, tu nge Isua hi pianna hmun thinlung pe dawn a, tu nge kaisara hun lai ang mai khan ti hnawng leh dawn?? Isua hi khawiah nge a pian dawn le?????’)



4 comments:

  1. a tha hle mai, ngaihnawm e. i blog hi ka bookmark phah bawk e.

    ReplyDelete
  2. A ngaihnawmin ṭha ka va ti tehlul em! A ṭha ka ti takzet e.

    ReplyDelete
  3. i style copy hiam Josepha drama (mizo/modern version) ka ziak ve e.. pawi em lovang chu

    ReplyDelete