KRISMAS HLAWHTLING

Short Sermon te, Sermon te Christmas thuchah hrim hrim bakah ṭhalaite chuan Christmas a lo hnaih hian bonus kan dawng ṭhin. Zilhna leh fuihna kan ti dawn nge vauna kan ti zawk dawn, chutiang chu Christmas dawn apiang hian kan dawng ziah. Chutah chuan eng nge kan ngaihthlak ṭhin- ‘Christmas hi nawmchenna hun tur a ni lo’ tih te, ‘Sual tihna hun tur a ni lo, ruihtheihthil tihna hun tur a ni lo, hmeichhiat mipatna lama tlanna hun tur a ni lo’ tihte a tam mai. Pulpit aṭang te, lectern aṭang te, in lamah pawh chhung inkhawmah te, chaw ei dawhkan thlengin kan ngaithla ṭhin. Khawtlang lamah lah YMA, JAC, VDP duty na tur buk an lo siam thar. Khawtlangah buaina siam an awm  hlau em emin kan invau lawk a, kan inveng a, hlauh ang tak tak

kan ti dawn nge, beisei ang ngei ngeiin buaina siam an awm leh ziah bawk a. Nu leh pate paw’n fate an zilh, an vau lawk; Christmas a lo thleng a,  hlauh ang ngei ngeiin rui ngai lo an rui, sual ti ngai loin sual an ti- kan hlawhchham leh ṭhin.

Christmas awmzia kan hre vek a, Beginners Department aṭangin kan zir a, tumah inhrilhfiah leh chuan kan ngai lo; mahse engati nge kan hlawhchham leh ṭhin? Pakhatnaah chuan kan thlir dan a dik lo phawt a, a dawtah chuan ruahmanna a awm lo a ni.

Christmas a lo thlen dawn hian khawvel chhandamtu pian cham chibai buk a, amah nena inhnaih leh inpawha hun hmang tura plan fel tak siam ṭhin chhungkua kan awm em? Kan awm pawhin kan tam lo viau ang. A tam zawk chuan a hma lama kan sawi tawh ang khan he hun pui lo thleng tur hi kan thlir a ni. Sualna pun hun, sual laka ṭhalaite ven nasat an ngaih hun. Chu chu Christmas kan thlir dan a ni. Football nen tehkhin ta ila, an inkhelh dawnah an Coach chuan an lama a goal palh hlau em em mai se la, ‘a lai aṭang te, a sir aṭang te khan an rawn pet goal thei a, a hnai aṭang te, a hla aṭang te pawh khan an rawn pet goal thei a, pet goal tir loh hram tum rawh u, nangmahni pawh khan kan lamah in pet goal palh thei a nia’ tiin an lama a goal hlau em emin khelhtir ta se  an chak thei lo ang. A ṭha berah an draw pha hram dawn a ni. A chhan chu an thlir danah foofball chu midang va hnehna tur game ni loin, midangin anmahni an rawn hneh a hlauhawm em emna, an lama a goal palh a hlauhawm em emna game a ni a, midang goal a va pet lut ve turin ruahmanna pawh an nei lo tlat a ni.

Krismas hmasa ber hmangtute aṭangin he ruahmanna leh thlir dan dik  avanga Krismas hlawhtling tak an hman dan chungchang kan sawi dawn a ni:- Matthaia bung 2 ah leh Luka bung 2 naaah Krismas hmasa ber hmanga, nausen chibai buk hmasa ber tute chanchin kan hmu a, an chanchin chipchiar sawi loin, tun ṭum kan thupui atana pawimawh lai lo la chhuak ila-

Pakhatnaah chuanMatthaia bung 2 naah khaw chhak mifingte kan hmu a, an chanchina kan hriat langsar deuh pakhat chu an zui lai Arsi en reng loin Heroda hnenah an lut tih kha a ni. Kha tah khan an tih loh tawp tur an ti a ni; mahse hetih mek lai hian an tih loh tur tih loh ṭha deuh mai an neih a awm  a, chu chu ‘Heroda inah khan an ro bawmte an hawng lo’ tih hi a ni a ni. Heroda in aṭanga an chhuah leh hnu kan Bethlehem khuaah an kal ta a, nausen, Lal Isua, an chibai buk tur diktak an hmuh hnu khan an ro bawmte an hawng a, lawmna rangkachak te, beraw te mura te an hlan ta a ni. 

Khaw chhak mifingte khan lal thar an hmuh huna chibai an buk dan turah ruahmanna fel tak an nei a. An thlirna pawh a dik a ni. Chu chu ‘Ro bawm kha lal thar an hmuh huna hawn tur’ tih a ni. Heihi keini tun lai kan thlirna aṭang hian lo thlir ta ila- ‘lal thar hmuh hma loh chu ro bawm kha hawn miah loh tur’ tih zawngin kan thlirin kan inzirtir ang. In ang ṭep, in ang si lo a ni- Lal thar hmuh hunah ro bawm an hawn tur, tih leh lal thar hmuh hma chu ro bawm hawn miah loh tur. Mifing pathumte thlirnaah hi chuan a pawimawh ber chu Lal thar piang hi a ni. Keini thlirna aṭang chuan ro bawm zawk hi a langsar luah ṭhin. Kan thlirna ang neiin Mifingte kha kal ve ta se, ro bawm hawn hlan nghakhlel reng reng khan an zinkawng an zawh ang a, chak chung chungin an insum ang a, Heroda ina an luhte khan an ro bawm kha an hawng thut thut ngei ngei ang. Mahse chutianga ti lo chuan lal thar zawk an thlir tlat avangin a hun takah, a hmu dik takah an ro bawmte hawngin lal Isua chibai an buk a, Krismas hmasa ber chu hlawhtling takin an hmang.

Tun lai Mizo Christian nu leh pate chuan an fate hi nupui pasal neih hma loh chu ro bawm hawng miah lo turin an duh a, chutiang tur chuan an fuih a, an zilh a, an vau ṭhin. Chutiang zilhna dawng ṭhalaite nunah chuan kan ro bawm hi a langsar riau a, hawn a chakawm riau a, a nawm hmel riau a, nupui pasal neih hmain kan hawng leh nge nge ṭhin. Ro bawm neitu, nun thianghlim kan neih chhan tur Lal Isua zawk thlir thiamna kan va mamawh em.

Pahnihnaah chuan Beram veng tute chanchin Luka bung 2 ah kan hmu. Vantirhkohin Lal thar pian thu a rawn hrilh ve a ni. Davida khuaah Lal Krista chu a lo piang a, ran chaw pekna thlengah zalh a ni tih a rawn hrilh a ni. Lal thar a piang tih an hriat ve leh nau piang chibai buk turin ruahmanna an siam ve nghal. Beramvengtute chu khawchhak lal pathumte anga fing an ni ve lo a, ruahmanna fel fai tak pawh an siam thiam lo maithei; mahse an hriat chhun chu naute chu Bethlehemah a piang tih a ni a, chumi ang chuan ‘Bethlehem thleng kal phawt turin’ ruahmanna an siam a, ‘’hawh u, Bethlehem thlengin kal ila, Lalpan thu min hrilh lo thleng chu I en ang u,” an ti ta a ni. Khawvel chhandamtu lal thar a piang a, an thlirna aṭang chuan chu lal thar chu chibai buk ngei tur a ni. An beram ven lai kalsan kha thil buaithlak tak a ni; chubakah Bethlehem khua kha khatih lai khan mi 2000-3000 vel awm tura ngaih a ni. Ran vulh mi an ni a, ran in tam dan tur te, ran in zawng zawng bih chhuah vek a hautak dan turte ngaihtuah tur a tam ang; mahse chu’ng an chhehvela harsatna awm thei chu thlir loin, lal thar zawk chu an thlir a, an tum leh ruahmanna ang ngeiin nausen lal Isua chu hmuin chibai an buk a, Krismas hmasa ber chu hlawhtling takin an hmang.

He Krismas lo thleng tur pawh hi engtin nge kan thlirin kan hmuah ang a, engyin nge kan hman ang? He hun hi sualin kan lama goal a rawn score palh a hlauhawm em emna hun ringawt a ni lo a, keimahniin goal kan score nah un ṭha, lal piang chibai kan buk hun, amah nena hunk an hman dunna hun tur a ni. Engtin nge Lal thar chu chibai kan buk ang, kan ṭawngṭai tlaivar dawn nge, chaw ngheiin kan ṭawngṭai dawn nge, mi harsa zawkte tan kan luang chhuak dawn? Thlir dan dik nei chunga keimahniin Lal thar chibai buk dan tur ruahmanna kan siam apiang chu a ṭha tawk vek a ni. I thlir dan lo tidik la, ruahmanna lo siam rawh. Defensive game ni lo, attacking game khel la, I tih loh tur ni lo, lal thar chibai bukna atana I tih tur ruahmanna siam rawh.

 Berampute ang mai khan thlarau lamah chuan kan ril lo a, han ruahman ngaihna vak kan hre lo a nih pawhin Berampute hnenah Bethlehemah lal thar a piang tih  hrilh chian an ni ang chiah khan Kohhranin Krismas programme a siam tih chu kan hre chiang- Behlehem khaw thlengin I kal ve phawt ang u-kohhran programme thlengin I kal ve phawt ang u; Ama tana kan thiam leh theih tawk ruahmanna leh tumna kan neih hi chungamin mal a sawm ngei ang, tichuan Krismas hlawhtling tak kan hmang thei ang.