Au ri hum hum te, mihring sahawk thawm so ri
hulh hulh te, thinrim avanga ngur chhur chhur rite leh ral rel phun ri ser
serte karah nau vei taka ram vei thawm te, dikna duha rum rite leh
beidawnga chiau vawng vawng ri te’n ngaihtuahna mumal pawh hmang hleithei loin
beng a khawrh a, an thawm chuan thluak a luh ngut ngut mai
THAWM PAKHATNA: Tarin, “kei zawng ka upa tawh em mai, ka lo
chawl tawh ang e,” an ti lo a, ṭhalai naupang zawk lahin, “upa zawkte thu ngai
ang,” tih an tum hek lo. Mahni ngaihdan leh kaldan chu ṭha an ti ber vek a,
anmahni tih a nih loh chuan miin eng thil pawh ti se dik a awm thei lo. An thil
tum bulpui ber chu ‘ram hruaitu nih’ a ni a, ram chu engtin nge, khawi hmnuah
nge an hruai ang tih chu an ngaihtuah lo; Chu aia ngaihtuah tur ṭul nia an
hriat, tamtak tih sen loh an nei miau si a.
An tan chuan politics chu indona mual a ni a,
‘indonaah thianglo a awm lo’ tih changchawiin politics-a dinchanna atan leh an
hmelmate beihna atan chuan eng hmanrua pawh an hmang hreh lo. Indona a thi
hmasa ber chu ‘thudik’ a ni angin an politics-ah chuan thudikin hmun a chang lo
a, dawt thua inchirhtheh vak vak chu an indo dan langsar ber a ni. Chutiang
dawt thu leng nuaih nuaih karah chuan
thudik pawh lo awm ve tehreng se mi naran
tana hriathran hleihtheih lohin dawt thu nen an chawhpawlh thiam tho a, anmahni
ang ni lo, politics khel velo te’n thudik an hria ang tih chu an thil hlauh ber
pakhat a ni a, mipuite hnena dawt thu thehdarh leh rilru mumal pu thei loa
mipui tih chiai chu an hna a ni.
An tan chuan ‘dawt’ hi dawt a ni ve mai lo a,
an hmanraw pawimawh ber a nih miau avangin achang chuan anmahni ngei ngei
pawhin an dawt thu thehdarh chu awihin anmahni leh anmahni an inbum a,
tihchawmawlh a awmin bumtu leh bum nih an fawm a ni ber.
Hlawhtlinna tih ṭawngkam an hrilhfiahna ber
chu MLA, Minister-a tlin tih te, Contract hmuh tihte a ni a, inthlannaa an tlin
chiah hian an hlawhtling tihna a ni; an hna an ṭan dawn chauh tih an hre lo. A
hna ni loin ‘a nihna’ chu an duhber a ni- chutah chuan khawizu leh hnute tui a
luang si a. Chutiang dinhmuna ding a, ama pumpui hmangaih lotu chu an tan chuan
mi a an ni. Ram hruaitu NIH CHHUNG REILOTEa a chhung leh khat, an pawl mi leh
sate tana chhawrnahawm loh chu chutiang dinhmun luah tlak chu an ni tlat lo. An
LAL chhung chuan a langsar thei ang bera inpholan a, anmahni tih pawh ni chiah
lo engemaw sawi vul chuk chu an thiam zawng tak a ni ṭhin.
A sang thei ang bera ram hruai chu an
ngaihtuahnaah a awm miau loh avangin a rei thei ang ber ram hruaitu nih chu an
tum ber a ni a, chumi ti thei tura pawimawh ber chu dinhmun hniam thei ang bera
mipuite dintir a ni. Mipuite chu an chan a chhiat poh leh tihlungawi an awl a,
anmahni thlang lo theilo tura siam an awlsam dawn tihte chu an thil hriatthiam
theih zawng tak a ni.
Rorel lo lampang, roreltute diklohna mipui
mithmuha phochhuaktu tura kan ngaihte lah chu anmahniin ro an rel laia an
lo tihdik loh kha kan hre ve ṭan chauh a, huai taka mi dik lohna han
haichhuak a, puangchhuak thei dinhmunah an ding bawk si lo. Puangchhuak pawh
nise thutak nge a nih dawt tih pawh hriat hleihtheih lohin thu a buai nuaih a,
mipui chuan eng ber nge awih a awih loh tur tih pawh kan hrethiam lo- an tumah
an hlawhtling chiang ṭhin hle.
Mipuite chu kan dinhmun a chhiat em avangin
ring lo chunga kan zawm te, duhlo chunga kan pawmte a ngai a, duh loh
zinga a ṭha ber kan thlan a ngai fo mai. A chang phei chuan anmahni avangin
keimahni leh keimahnite hi kan inchaltauh bawp bawp a, kan buai zawh poh leh an
lawm si.
Chutiang khawpa min chin chauh a, min hrual fe
tawh hnu chuan anmahni dik lohna pawh ngaihven thei tawh loin keimahni leh
keimahni min inhnial tir luai luai a, kan rilru a chawmawlh a, thutak leh dawt,
eng thawm riva mah kan bengkhawn tawh loh laiin kan dinhmun aṭanga kan bengverh
ber mai chi, ‘a thlawna pawisa sem’ te min tiamin an han sem ta tak tak leh
tlat mai a, kan tan chuan a mak em em a, chu aia nasa chuan a hlu em em mai
bawk si a. A dik lohna leh kan tana a ṭhat lohna, thawh chhuah aia a thlawna
dawn duhna rilru kan thinlunga an tuh tel lam reng reng kan ngaihtuah thleng
pha lo, chu sum chuan kan sumbawm a theng pha tlat!
A sawisel turte pawhin mipuite chu a thlawna
sum dawng mai loa, mahnia thawhchhuah tum turin min fuih ngam tawh lo a,
chutianga fuih ngam chi lah kan ni tawh hek lo, mi rethei thleng phak ‘a sum
faiin’ kan dawng tlat. A hnathawh uar lam zawk inzirtir ta lo chuan a sum lo
kalna lamah te min buaisan ta daih daih a, a lehpeka sum sem ve te chu an thu
rolum a ni ta. Tu pawlin nge sem hnem ber ang aw...
THAWM PAHNIHNA: Hetianga kan ‘ram huraitu’ nihna
dinhmun chelhtute’n mipui thluak min suk sak a, kan rik hulh hulh lai hian ram
hmangaihtu tak takte chuan an ram hi an thlir a, ṭapin an rum tlawk tlawk mai a
ni. Thudik chu sawiin puangchhuak thin mahse kan Pute ho khan kan mit min
tihdel sakin kan beng min tihngawn sak nasa tawh em a, kan benga lut hi kan
beng lehlamah a kaw tlang zel mai rih zawng a nih hi.
Pawl ruihchilhna lak ata min chhanchhuah
tumtute au thawm chu kan hre phak a, kan hrethiam phak si lo. Kan thinlung chu politics
tui nu hmanga chiah zawp a nih tawh avangin miin hetiang lam an sawi apiang
chuan kan rilruin a thil sawi chu eng pawl ṭan zawngin nge a sawi, pawl thar
din zawngin a ni em? tihte hi kan lo teh zung zung tawh mai a ni.
Dikna pawimawhzia leh hlemhletna do tura fuih
kan nih lahin, ‘ani pawh hetiang dinhmunah hian ding se a fihlim BIK dawn em
ni’ tih kan lo ngaihtuah nghal zat a. Fihlim BIK lo, ṭha BIK lo hlir zing
aṭanga duhzawng thlangchhuak ṭhin kan lo nih tawh avangin hetiang riilru hi kan
pu a ni. Tumah hi ṭha bik turin kan beisei lo a, keimahni pawhin ṭhat bik kan
tum tawh hek lo chu a nih hi.
Dikna duha ram hmangaihtute au thawm chuan bengkhawn
a hlawh lo a, dawn aia thawhchhuah sawimawitute chuan huat an hlawh mek ni. Dik
bik lo kan thlang tih kan hriat tlat avangin dik bik nih kan tum lo a, thawk
loa hausate rorelna hnuaiah kan kun a ni tih kan hriat tlat avangin thawh bik
kan tum hek lo. Kan thawhchhuah nilo kan dawn hi kan tana ṭha lo tur a ni tih
kan hriat miau loh avangin bumtu leh bumate chu kan la ni reng a ni.
Dawt thu leh thu puarpawleng ri hut hut karah
ram hmangaihtu leh dikna duhtute thawm chu zawitein a ri ve riai riai a,chu
thawm zawite pawh chu dawt thu thehdarhtutetan chuan ngaimawh tham a nih
avangin dawt thu nena chawhpawlh a, bawlphawn an la tum ta zel a, engtikah nge
he thawm hi ring takin kan rik chhuahtir ve theih ang le?
No comments:
Post a Comment