A CHANG CHUAN

A chang chuan ka inngaihtuah lungpuam a,

Ka va vanduai bik em;

Ka retheiin ka dinhmun a chhia a,

Ka hmel leh ka pian zawng zawngte nen

Midang phak lo reng rengin ka awm a,

Hrehawm leh lungngaihnain min hual vel

Ka tan hlimna tur a vang,

Tiin ka kun reng thin.

A chang chuan duhthu  ka sam vel thin a,

Khawvel hi hnuaichhiahin

Ropui leh hausaknain min hual a,

Ka thiamna leh finna vangin

Midangte ngaihsan ka lo hlawh ta a,

Sakhmel tha leh no no ka thlang vel thin.

Hetianga ka dawn chang hian

Lawm lohin ka nui fo.

A chang chuan khawvel hi ka hmachhawn a

He'ngte hi ka hre chho-

Vanduaina hi ka ta a ni lo a,

Ropuina ka pual bik a ni lo;

Hlimna leh lungngaihna a inchhawk hian

Hringnun a tifamkim zawk a lo ni.

Duhaisama thut mai leh

Lungngaia kun a sawt lo.