COPY PASTE

Lan 1-na

(Thawveng deuhin Mawitei a rawn lut awt awt a, chutih lai tak chuan a phone  a rawn ri a)

Mawitei: Hello

AW: Ami Beliaghata police station teke bolchi lam

Mawitei: Enga? Hello

AW: Me police station se bolra hu

Mawitei: Awi, speak in Urdu please, or Spanish. Bapre baaap.(phun zui nuah nuah chungin a phone chu a  a dah a)

Marema: (lo luh pahin) U, group vela i thil post chungchangah khan police in an be duh che, lo phone che an tum a, an be theilo che a, keimah min lo phone a nia.

Mawitei: Awi, vaitawngin an rawn tawng zawt zawt a, Airtel ho emaw ka tia, ka lo hau hrep a sin.

Marema: Ehe, eng tawngin nge i hauh a?

Mawitei: Bengali ngatin mawle, in rawn phone leh sek chuan idea ka pawt daih ang, ka lo tih zek kha. Police chu engtin maw?

Marema: Vawiinah fb leh Whatsapp a ‘Samuel Ngentein Cherna damdawi a eisual’ tih vel an post chungchangah khan Samu-a’n FIR  a thehlut a, nangmah hi a  post chhuak hmasatu ah an puh che a, police-in thil zawhchian che an duh a, an lo kal dawn a ni awm e.

Mawitei: Awi, ka post hmasa ber thlawis lo. Khawi group a ka dawn nge pawh ka hrelo e a, chhiar pawh chhiar loin ka copy/paste ve tawp a nih kha.

Marema: Samu-a chuan nangmah hi a post hmasa bertu niin a ringhlel che a, chuvangin, ehe, hei an lo kal(police pahnih an lo lut a.)

Police1: Ka pi, hei thu belhchian dawllo thehdarh chungchangah engemaw zawhchian lawk che kan duh a, kan hmunpui lamah min rawn zui phei lawk ta che.

Mawitei: Ka pu, kha kha keima post hmasak a ni lo, hmun dang ami ka copy/paste ve mai mai a nih kha.

Police2: Engpawh nise min rawn zui phawt la, thil awmzia chu sawtah kan inzawt chiang dawn a nia.(An inzui chhuak ta dam dam a)

Lan 2-na

(Pi Pari a rawn bingbilet lut tap tap a)

Pi Pari: Amenn, wooooooo, heihaa, halleluiah(a inbin a, midang an awm leh awm loh a melh zak zak bawk a) Heiraw…. Ekhai, Ameeeennnn. Khaw’nge maw ka chhungte pawh hi an awm le. Het chhet chhet, woooooooo. Ka chhungte ve hi zawng an thlarau mi lo lutuk a, kan inhrethiam lo tawn vel a nih hi.

Pu Chhuana(lo luh pahin): Khaw’nge maw ka chhungte hi an awm zawh ni? Mami… Mami nu!

Pi Pari(kil khat atangin): Woooooo, heiha, het chhet chhet. Khawvel mite’n an hrethiam lo.

Pu Chhuana: (Ngui ruaiin) Mami nu, lo thu tha teh. Hei ka sum lakluh dan chungchang chu hailan a ni ta a, jail tang mai thei dinhmunah ka ding ta a ni.

Pi Pari: Khawvelah hian hlimna a awmlo a, khawvel mite heihaa amen hlimna chu a reilo.

Pu Chhuana: Nanga Amen dawr dawr kha engmah a ni lo. Ka hlawh bak sum hailut tura min turtu kha nagmah ngei i nih kha, kawr thar ka mamawh, chumi khami ka mamawh, thenawmpa paw’n chuti chuan a ti, a ti ve rawh, min ti a, thenawmpa tihdan copy in vawiin hi kan thleng ta a nih hi.(Chutih lai chuan an fapa Marema a rawn lut a)

Marema: (lo luh pahin) Nuu, Paa, E, phone tlang in va har ve. Mami kha police in an man daih a nia.

Pi Pari& Pu Chhuan(phawk zetin): ENGA!?

Marema: Ih, Whatsapp leh Fb velah thil a copy/paste peih lutuk a, thi tul lo a copy palh a, police in an man daih.

Pu Chhuana : Rilru hah lai lain, a va han pawi lehzel tak em.

Pi Pari: Lo kal rawh u, awi mami chu a lo mangang dawn em mai(an ding a, an chhuak  dam dam a)

Pu Chhuana(chhuah pahin): Min lo man nghal keuh mai ang.

Pi Pari: Lo kal mai mai teh.

Lan 3-na

(Police pahnihin Mawitei an rawn kai lut a)

Police1: I chhungte an lo kal mek a, inbiakna hun tawite kan siamsak ang che u.

Police2: Cherna damdawi eisualpa hian a FIR hi a hnukdawkte a nih loh chuan tun bak chu i chhungte nen in inhmu khat tawh viau maithei a nia. Haha(an thuttir a, a dinglam lei veilamah an ding a, Pu Chhuanate chhungkua an lo lut bawk a)

Pi Pari: Awi karei, mamte… engtin nge an lo tih che?

Pu Chhuana: Ngawi teh u, phul hlut lo khan eng nge thil awmdan chiah, Mami, engvangin maw an man che?

Mawitei: Pa, thil post ah min puh a, keima post hmasak ber pawh a ni lo. ‘CP’ tih pawh ka ziak vek a lawm.

Pu Chhuana: Eng nge ‘CP’ chu?

Mawitei: Copy/paste tihna. Midang post ka copy ve mai mai tihna a nia. Mahse min tuartir talh an tum a.

Pu Chhuana: Hmmm, copy vang bawk maw? Keipawh thenawmpa sum lakluh dan ka copy vangin hei ka buai mek chu a nih hi. A copy tur diklo copy chu a pawi a nih hi.

Pi Pari: Ekhai, Mami pa, Mami, Mama... keimah hi a thiamlo ber chu ka ni e, midang nundana nun ve zel ka duh vangin Mami pa pawh thenawmpa copy turin ka ti a, tunah lah A thutak ngaihtuah chuang si loin mi tihdan copy in a phawvuakah ka lo inbingbilet kual ve mai mai a, ka rawngbawlna tur hmasa ka fate pawh ka lo uaplum hmanlo a, ka thiam loh a ni.

Pu Chhuana: Eu, tun tuma mami nu thusawi chu tunhma lama a Pathian thu sawi tawh zawng zawng aiin a ngaihnawm zawk daih mai(A fate paw’n,  “dik chiah” an lo ti sap a). Kan thil tihsual tawh man chu huaisen takin kan tuar ang a, tun atang chuan entawn tur dik Lal Isua nun chauh hi kan entawn tawh tur a ni. Tunah ka sawi ang apiangin in sawi ve dawn nia. ‘Kan chhungkua hian tun atang chuan Lal Isua nundan chiah kan Copy/Paste tawh ang a, Amah angina kan nung tawh ang’

KAN LAWM E..

 Kolkata

21-07-15

(CMCS thalai group drama intihsiakna atana ka ziah hi dah ve mai mai ang)