Friday, 22 February 2013

Dumdumtea Pual-2



15-01-13: Bawiha, ui fing tak i ni. Tun hmain ui hi ka la enkawl ngai miah lo a, miin ‘ui hi chu mihring an ang lutuk’ an tihte chu ka lo hre ve tawh thin; Mahse nang hi chuan Ui i ang ve zeuh zeuh chauhin ka hria, mihring i ni ber zawk a lawm. Ui fing ka’n tih hian, ‘bawk rawh’ tih a bawk te, ‘zuang rawh, lum tep tep rawh’ tih a thuawih deuh lampang hi ka ti lo, hetiang lampang reng reng hi ka la zirtir hauh lo bawk che a, mahse nangmahah hian mihring rilru ang hi a awmin ka hre thin. Hmannia ka hauh che a i ke i’n bai der ringawt te kha aw…., a nachang hi i hria ka ti. Hauh zui leh che lam kha a lang thei tawh mawlh lo. Vawikhat i inchiu zawh tlaiin sitting room-ah an lo pal palh che a, ngawi rengin room-ah i rawn tlan lut a, ka bul i lo thleng ve leha i rawn tap(ngik) te kha aw, Bawihte, ka va’n duh che em.

Khuma lawn kan han phal ve a, khuma mu tha ta mai lo chuan keimahni chungah kher hian i’n muhil duh ta thin a, i mutthilh tawh lah hian tihharh i inthlahrunawm thei sia, chet pawh che ngam loin, rawl thuma mut te a ngai thin. Mahse nang paw’n kan mutthilh laia min kaihthawh chhen inthlahrun nachang i hre ve tawh a, kan in draw J

I dep nasat theih em avanga i nupui kan tih tak mai
Teddy Bear pink hi Toy story ami ang khan toys ho hi tawng theiin nunna lo nei ta se, a pa lo la ni zui se engtin nge a ngaih ang aw, tih mai mai te hi ka lo ngaihtuah leh veng veng thin. Rilru hi i luah hneh teh zawng a nih hi. Tun lai an Facebook-ah te hian i chanchin ka tarlang ngun lutuk a, thenkhat chuan an lo ning vel mawle, keiin ka’n nin loh che nen tiraw.

17-01-13: Bawiha, vawiin chu i zawi riau mai, engati nge mawni le? Zingah lah i tlan tha peih lo a, ina kan luh hnu lahin khumah i bawk nghal ngawih ngawih mai bawk si. Nidangah chuan room kawngkhar hawn ve leh i lim chhuak nghal thin kha a nia, vawiin chu room pawn atanga ka koh che pawhin i rawn chhuak peih der lo, ngaih i titha lo takzet a ni. Chaw lah i ei tlem si. Nizan te kha i mu tlem riauin ka hria, ka harh apiang khan chhuatah i lo vei nelh nelh reng a, engati nge mawni dawn le? ‘Up’ tih film-a ui collar ang kha nei ila, tawngthei ve la ka ti ngawt mai. E, collar sawi takah chuan nimin atang khan nghawngawrh ka’n awrhtir ve che a, hnawk ila ti em em zui a, zanah phei chuan ka phelhsak leh tawp che a nih kha, tukina ka awrhtir leh che kha i lungawi vak lo a, i titau awmzawi vel te hi lo ni se ka va ti e.. Natna nei lo hram teh aw.

TLAI LAM: Nilengin rilru nuam lo deuhin ka awm a, a chhe ber thleng thei thlengin ka ngaihtuah a; Chutah tlaiah hlauthawng ru takin kan lo haw a, i dan pangngaitein hlim em ema min lo lawm han hmuh che kha chu a va nuamin rilru a va hlim em. I harh hian a lo nuam a ni, eng ang pawhin harh la ka hau tawh ngai miah lo ang che, tiin ka intiam rilru hial a; Mahse zanlai chu sawi loh, zing dar hnih dar thum ah pawh i la lim kual zek zek mai kha chu i ti lutuk lo maw, hehhee.

I ha ziau lutuk hi engtia han tih chi nge mawni? Ka kutah hian hmun li velah i seh pilh a, ka hmuiah nen; Natna tha lo te hi kan kai vaih chuan chuti hlauh a ni mai, fimkhur teh. I tin lah hi hmanni lawkah khan kan help sia, min ham pilh leh phung tawh mai, i lawmna tur a nih chuan pawilo ti zel mai ang.

22.02.12: Bawihte, vawiin hi thla li i tlinna ni a lo ni ve ta der mai; Hman nia ka buk hnuhnun ber che khan kg 4 leh gram 800 i ni a, tunah chuan kg 5 i tling tawh ang. Mi ho hian thang tawh lo se, a tet hian a lawmawm zawk, te an tia, kei chuan thang zel mah la pawi ka ti lo, i duhawm tawlh tawlh zawkin ka hria.

Hman zanah kan thenawmte mikhual nula pakhat chu zanlaiah a thaw a hah a, engtia tih tur nge ni ang, ti a an inrawn khawm laih laih laiin a damlo ber chuan, “Dumdumtea hmu ila ka dam ang,” a lo ti a ni awm e. Hrethiam la chuan i intithei dawn lutuk. I lar tawh vel lutuk hi i sual phah ang tihte ka hlau deuh a nia, lar i zawh loh vaih chuan aw J

Khawlaiah pawh pawm reng loin kan kai ve tan che a, i kalchak thei lutuk a, min ti hah tep zel a lawm, hehhe. Bauh i la ching lo chhunzawm zel a, a lawmawm lamah ngai ang. Hmannia kan khum thar tur lo dahtu vaiho tlanchhe chunga i lo bauh leh vawikhat zingkara bawlhhlawh khawn vaipa tlanchhe chunga i lo bauh tih loh kha chu i la bauh miah lo. Tlanchhe chunga i’n bauh vel kher kha chu a…, a pa vak lo a nia aw. I bauh duh rau rau chuan tlanchhe lo khan bauh tur a nia. Kan inbula nangmah ang chi puitling tawh awm hi zana bauh vak vak a ching a, a style i la ve ang tih ka hlau ngawt mai, bauh lo zawm zel rih teh.

Tun lai chu sa lampang kan pe nasa lutuk che a, sa rimnam lo kan pek che in i ei tha leh duh silo a, a tha dawn lo tlat. A awm ang ang kan ei tlang zel ang, einj. A chang erawh hi chuan i thau lutuk ang tihte ka’n hlau leh rih thin a, mahse i thau mum kang hian i nalh reuh bawk sia J

I hmelhriat loh pawh kan ina lo lawilut reng reng i lo nel em em nghal zel ringawt mai hi thil tha nge maw thil tha lo ni dawn ni? Mi Uite chuan hmelhriat loh an bauh a ni ngai a, nang chuan lawm em em hian i lo bawh leh chung chung thin a, a bikin nula lam hi i lawm zualin ka hria, ka tlangval tantirh lai min chhun emawni, hahha.

A hmaa i kal theih lohna in chung step-ah pawh duhtawkin i zuanglim chho zak zak thei tawh a, nuam pawh i ti khawpin ka hria, mahse mahni chuan chhoh miah loh tur ka tih kha. I tet lai kha chuan Choak pawh khan an hlau lo che a, tunah chuan Mu pawh i um thlawk ve duai duai tawh mai, a hma kha chuan inchunga kan awmte hian ka hmuh loh lai chein muin a lo la daih ang che tihte kha ka hlau deuh thin kha a nia.

Kan khum tharah hian i lawnin i chhuk thei reng sia, i theilo emaw i ti tlat hi a mak ka ti. Hmanniah pawh i rawn zuang chho zawk a, a hnu lawkah lawn theilo ang maiin i rawn inhai leh a, kan lakchhoh che lahin i chhuk leh ngam lo, vawikhat chu i zuangthla thauh tawh reng sia, engtinmah i awm tawp si lo a, zuangthla zui ngam tawh reng reng lo mai, pawilo, duhtawka i lawn theih hunah i la lawn nasa dawn tho, ti tawh mai ang.

Tun tuma atana a tawp na’n Happy Birthday Dumdumte…. Khawsa chho zel rawh.

2 comments:

  1. happy birthday bawihte...ngaihnawm thei eee, a bu siam la..ka lo release ang lol

    ReplyDelete
    Replies
    1. Ama'n a duh leh duh loh a ni mai :)

      Delete