Ka thu leh hla thenkhat ka vawmkhawmna hmun a ni. I peih chuan chhiar ve ta che.

Friday 11 January 2013

Dumdumtea pual



Dt.11-01-13: Dumdumte, heihi i tan ka’n ziak ang e. I muhil ka tiharh ang che tih ka hlau sia, hla pawh ka ngaithla ngam lo, tunah pawh hian zawite te in ka type a nih hi. I muhil hmel hi a hmuhnawm ka ti,  nui deuh sang ang hian i lang thin a, i duhawmzia hi nangmah paw’n i hre lo hial zawk ang.

Kan laktirh che khan gram 700 vel lek i nia, ina kan hawn che pawh khan kan pawm reng che a nih kha. Vawikhat chhuatah kan dah che a, i kal terh terh a, ‘ai a kal thei mawle’ tia mak kan tih em em lai te kha a la rei loh tehreng nen tunah chuan thla thum i lo tling ve tep tawh a, kg 2 leh a chanve lai i lo ni ve ta bawk, harh lah i harh narawh e. I harh viau chang hian kan hau thin che a, mahse i han harh loh deuh hi chuan ngaih a tha lo a, i harh lai hi a ngaihawm leh thuai thin.


A tir khan ka hruai ziah che a, mahse tunah chuan i lo lian ve deuh tawh bawk a, inah nangmahin kan kalsan thin che a, i lo khawhar viau thin ang tih ka hria a, keipawhin ka rawn ngaituah reng zel che, mahse tihngaihna tak a awm si lo a, min hrethiam a ni ang chu, infiamna hun dang kan ngah tho a lawm, tiraw. Hei vawiin chu vaccine lakni a lo nih leh tawh avangin ka hruai che a, nuam i tih ka ring, kei tak hian nuam ka ti. Nichina kawta lo thu thup hoin an lo koh vak vak lai che a, min lo pan daihte khan min ngaihpawimawh avangin nuam ka lo ti ve em em a, nangpawh hi ka ngaipawimawh che a sin. I tet lai kha chuan ka koh vak vak lai che khan midang i pan daih zel a, ka lungawi lo thei rapz mawle, hehe.

Chaw te hi thla hmasa lawka i ei let kha i ei tawh a, a chang chuan i ei over mah mah dawn a ka hriat vangin ka’n hrek deuh dawn thin che a, pek loh theih loh hian min melh leh ngawih ngawih thin sia, ka pe leh nge nge zel che, eng em kan tih phah lo ang chu maw.  

A tir khan khuma lawn kan phal lo kha a nia, khua a lo vawt bawk nen chhuat atanga min rawn melh ker hian i mitmeng hi tuar a har thei em mai a, ka mutpui leh nge nge thin che, pawi lo e, a lum nuam a lawm tiraw..

Zinga min rawn liak hlep hlep thin hi ka ning deuh thin a, mahse hmanni zingah khan thawh i hai ve deuh nge ka harh khan min rawn liak miah si lo a, ka ngaih a tha lo hman tep zawk mawle. Zanriah ei khamah i’n mu hmak a, chutah mut duh ve hunah i rawn harh a, thapui chhuah a i’n lim kual vel thinte hian nun a va tihlim lawi si em.

I thian tur leh i kawmhlim tur ui dang lak te rilruah a awm deuh thin nain nangma chanvo an laksak then ang che tih a hlauhawm, nangmah chauh hi ka naute ni reng rih mai rawh. Infiam laklawh laiin toilet lam panin i’n tlan thut a, i va zung ter ter thin te hi a hmuhnawm a sin.

Tlai banah phur em emin min lo hmuak a, min lo zuanin min lo nul thuak thuak a, a va hlu em; hah i tidam sawng sawng thin a sin. Chutah, room hnawk nuaiha i lo sawisak pawh kan melh ve hmain i biscuit bawm i’n lo melh daih a, i phakar thei vel e mai.

Hmanah khan chaw ka pek dawn che khan i chaw ngen hi i lo bauh leuh leuh thin a, mahse ka khap hnu che khan i bauh leh ngai ta reng reng lo a, i bauh lo hlen dawn nge mawni, misual bauh nachangte hi i hre lo vel mai ang a(h) hehe.

Bawihte, kan inhrawn hnu reilo te ah pawh hian sawi tur a va tam hman  em, hmannia inchung zawla kan walk laia choak hoin an lo hual khup khup che kha i hria em, an hlau lo ve khawp mai che, i puitlin hunah i umdarh vek dawn nia. I chanchin hi heti hian ziahzawm zel ila a tha ang, chanchin ngaihnawm deuh deuh nei turin khawsa chho rawh. Mahse beer i in apianga i hahchhiau vak vak thin thu hi chu ziak lang miahlo ang aw J  

6 comments:

  1. kan ui nen hian Thuan anni thei a ngem?? Thiantha tak kan duhpui si a.

    ReplyDelete
  2. Ka chhiar zawngin ka nui ver2 mai..ka hnuk te ulh lek lek..dumdumte..muah..beer in tawh suh ooo :P

    ReplyDelete
  3. savawm ber kher chu.h..... a pu angin a ngeih ve lovang a....ha2

    ReplyDelete
    Replies
    1. Hahaha, a lo liak ve leh hlep hlep thin a...

      Delete

KRISMAS HLAWHTLING

Short Sermon te, Sermon te Christmas thuchah hrim hrim bakah ṭhalaite chuan Christmas a lo hnaih hian bonus kan dawng ṭhin. Zilhna leh fuihn...