Ka thu leh hla thenkhat ka vawmkhawmna hmun a ni. I peih chuan chhiar ve ta che.

Thursday 31 January 2013

Kan chhung inkhawm ve..


Ram pawn, duh duh huna inkhawm theih lohna hmuna awm hian Mizorama inkawm tha peih vak lo tan pawh inkhawm chak riau chang a tam ngei ang. Mahse ram pawn, duh duh huna inkhawm theih tho na hmuna awm tan chuan inthlahdahna chance tha tak a ni ve hlauh thei. Zep thu cheng lo, keipawh hi helai kolkata khawpuia Mizo awm zingah hian inkhawm zinglo pawl tak chu ka ni ta mai awm e.

Zirlai naupang te tein in kan han luah ho a, chhungkua angin kan han awmkhawm ve dal dal a, nuam kan tiin khuahkhirh lem loha han tal vel chu nun pawh a lo inthlahdah deuh nge nge. Hetia, inthlahdah leh ho angreng taka nung e tilo hian biakin lama inkhawm ziahte paw’n an tih fo em em loh ‘chhung inkhawm’ hi kan hmang ve thin a; Nikum, zirna zo hoin min hawsan
vanga kan chhungkua kan inthendarh tak hma zawng kha chuan regular anreng takin kan hmang ve thin a ni.

Hmannia Daniela lo zin khan khatih laia vawi khat kan chhung inkhawm neih kan nawi zet tum kha a rawn sawichhuak a, ka lo theihnghilh deuhthaw tawh kha a nia, ka’n hrechhuak leh chu mahni chet nawi thu mah nise ka nuih hi a va han za em.

South City Mall bul lawka kan awm lai kha a ni a, chutih lai chuan a hmaa in kan luahpui thin tho, kan cousin Mama lo zin lai a ni nghe nghe, Kolkata Mizo Students lama kan president leh kan thianpa ni bawk Samuela a lo leng phei bawk a, a in luahpuipa Jo-a’n a rawn zui bawk tak e.

Savawm leh sakei bur engemawzat kan thlit ruah hnu chuan titi pawh a tuiin kan tawng ring tlang tawh khawp mai. Chutih lai tak chuan in ve ngai lo Masanga chuan, ‘chhung inkhawm nei tawh ila’ a rawn ti ta, ka hun neih zan a la ni zui.

Thutak angreng fe hian bul kan han tan chho a, zai zawh a bible chhiar a, tawngtai leh lalbiakna sawi kha kan tih dan tlangpui a ni mai a. Khami zan ka polite deuh khan mikhual ho ka’n duhsak hlak a, kan nawi chho ta a ni. “Hei, Mama hi hun rei tak chhungkua ang a kan lo khawsakpui thin a ni a, vawiinah kan inhmu leh thei a, a lawmawm khawp mai, a sawi duhzawng sawi turin i lo sawm ang,” ka’n tia, nui deuh thu chungin a rawn ding a, a sawi pangngai fu laiin Samuela inluahpui Jo-a chuan kilkhatah saptawng leh mizotawng pawlhsawp nuaihin Pathian biak awmzia a awm loh thu a rawn phunchhuahpui tan, kan la inkhap dai hram hram. Mama thusawi zawhah chuan tawngtai ta mai lo chuan kan KMS President Samuela hian a duhzawng han sawi ve teh se, ka la han ti ta zel a. Committee thang tih takah, “Pu Chairman, ka lawm e,” tiin bul a’n rawn an phawt a, kan hrethiam rih mai a, mahse a thusawi karlakah leh a thawlak apianga ‘Pu Chairman’ a ti ta mai kha chu nuih loh a har teh e. A inluahpuipa lah chu din ve chakin a lo phe sek tawh bawk si, loh theih lohin kan han insawm ve leh a, a rawn dingchhuak ve ta. Mizotawng aia saptawng tam zawk mahin a rawn bei chho a, Pathian hnena tawngtai awmzia a awm loh thu, hmanah pawh a tawngtaia a sawt chuang loh thu vel a rawn auchhuahpui, ka ngaihdan a ni ta lo, ka lo hnial(kan inhnial dan tak ka hre ta lo, ‘fuck you’ i ti, te min tia, tih pawh ka lo ti mathei J). Tichuan ani chu kan chhung inkhawm pawh awmtluan duh loin a haw tau ta daih a, keini pawh chu tluang tak chuan kan inkhawm zo ve ta mai a.

Khami tum kan chhung inkhawm zet kha chu miin ‘in chhaihkawlh mai mai’ pawh min ti se, ka hnial lem lo. Mahse khatiang kha kan ni reng bik lo, kan tling lo leh kan chaklo chung chung khan nikhatah hun reilote tal A tana serh kha kan duh ve thin a ni.

Vawikhat chu ka hna bang ka haw tlai deuh a, chhung inkhawm min lo tan san a, in ka thlen lai chuan an lo zai mek a, zai karlakah chuan an thum leh hak thin a. Hetih lai hi Muana leh Rama pooja chawlh hmangin min rawn fin lai a ni bawk a, kan ri ve laih laih a, zai tui tham kan awm ve a ni.

Ni dangah chuan Rama hi a zai ri ngai pawhin ka hre lo, chumi zan berkher chuan uar em em mai hian a lo zai ve a, ka nui lut nghal thu mai. Kan naupan laia kan thianpa, mi aw key mila zai thiam ve miah lo te kha ka hrechhuak. A zai rin poh leh kan nui ring ve kha a  ni mai, kan nuih apiang lah khan, ‘awh, ka aw a’n tial chu le’ a ti ziah lehnghal a. A thianpa Muana ber kha a insum thei lo a la ni zui. Khami tum te kha aw… kan va hlim em, ka ngai thin ngawt mai.

Chumi zan chuan Rama hi engati nge maw a zai ve tak vak vak le, tiin ka ngaihtuah reuh reuh a, chhung inkhawm kan han bang chu, ‘U Ahum, hei ka lo lakkep che a’ tih pahin savawm a rawn rek chhuak a, ani chuan a lo peg nual tawh a niang. Zan danga zai ri ngai hlei lo, khati tak maia a siamtu fakna’na a zai ri ring ve kha zu vang a lo ni- Zu hian thatna a nei ve a ni. Khati tak maia kan nui nasa kha zu vang a ni- Zu hian hlimna a thlen thei a lo ni.

6 comments:

KRISMAS HLAWHTLING

Short Sermon te, Sermon te Christmas thuchah hrim hrim bakah ṭhalaite chuan Christmas a lo hnaih hian bonus kan dawng ṭhin. Zilhna leh fuihn...