Friday, 28 December 2012

Masi titi nawi


 Masi titi nawi

Thuhmahruai: Second hand kawrlum phiar, a hmaphel ngat kan va thing a,  cheng hnih velin kan han dawn hniam a, nuam kan va’n ti. Lungawi takin bus-ah kan han chuang haw vau vau a,  zan inkhawmnaa hak hun tur leh min lo thlir kiautu turte hmel nen kan mitthla rauh rauh tawh mai thin a ni.

Kan awmkhawm tel tel a, kan tleh del del a, Biakinah bawk kan lutkhawm leh dial thin kha a ni a. Kha vang kha a ni ta ang, naupan lai Krismas kha a lo nuam bik e, kan tih fo nachhan pawh hi. Kum a lo pung ve zel a, tleh del del lo a, kal fal nelh nelh te nuam kan lo tih tak hnua kan hlimna  hian kan pan lai Masi hlimna  kha a tluk thei meuh lo.

MASI KHAWHAR: Urlawk zanah dar 12 a ri tawh a, haw loh chuan ka pi Khumi’n min lo thlir min lo thlir tawh dawn tih kan hre bawk si. Kan han haw  a, kan veng kawngpui chhuk vel chu a khawharthlak tawk lekin a lo la reh lo a, a then an lo thim thiap tawh laiin a then an lo la ri laih laih a; Rilru khawlai lama la awm deuh run chungin kan han mu a, thlanmual tlang velah ri lang lang tawk an la awm bakah khawilai atangin emaw ring lutuk si lo, lung tileng tawk velin Krismas hla play ri a lo ri riai riai bawk a, hetiang hunah hian a khawharthlakin a lunglenthlak ka ti thin. Thiante kha engtin tak awmzui ang maw, tih mai mai te hi ngaihtuah veng veng awl tak a ni- nain eng thil ropui tak an tih bik hi ka ring lo leh hnuhnawh; Kan awm ho laiin kan che ropui lo thei e mai. Khai mah aw…


Che pui lo:Kumhlui thlahzan vawikhat chu Upper Republic lamah ar khai meuhin Bja leh Rinawma te nen kan thawkchho ve a, Sikulpuikawna an concert kan kalpelh dawn atang khan kan buai tan tawh reng a, ar kha kan inkhai chhawk chho zak zak a, Sikulpuikawn mipui tamna lai tak kha Bja khai hun a ni ta, ani zak ve tho khan a ar khaina lam ngeiin Rinawma a’n kuah a, ani lahin a lo duh lo nasa, ar khai chung khan an inum deuh zak zakin ka hre ta. Chutah le, kan ar kan tumna nu a lo chhuak daih chu niin, ar khai chunga sikulpui kawn vela va vei kan zuam tawh si lo, mi kawmkarah kan ar chu kan thukru a, kan thiani chu kan va zawng ta ziai ziai a, kan va hmu ve mai bawk a; MAHSE, ‘hei veng dangah kan kal dawn a, in duh leh lo kal ve rawh u’ te kha a tih tak mai mai avangin lunghnur zetin kan ar thuhruk chu kan zu la a, kan haw a, Bj-a te inah kan kang a, kan ei teuh a sin.

Vawikhat pawh Kumhlui thlahzan ah Daniela leh Jeromea leh kei hi inchei tawkin kawngphei lamah kan chhuak chho a, Mistiri-a te chu kan dawr hnem vel khawp mai! Kawngpheia kan veng rawlthar rual lo thu thap te chu melh pawh kan melh lo, lenna tur hlat hmel tak leh hmanhmawh hmel tawkin thakthing lamah kan tlang chho nghal a, thakthing kan han chuang chhuak a khawiah dang kal ta lo chuan Kulikawn lamah kan kualthla a, phan vengah kan lo kual let leh a, mi hmuh loh deuhhlek turin in lam kan pan a, tv-ah Cricket khel hlui tawk a lo chhuak a, kan en zankhua. A tuk kumthar ruai fatu naah chuan zan lama kan nulate ar puah dan vel chanchin ringawt sawiin Jerome-a hi a titi char char thei tho J

Engtik kum nge ka chiang ta lo, Bja leh Jeromea thil thar neih kum chu a ni ngei mai; Corps-in thalaite tan Biakinah Kumhlui thlahzan programme siamin ar an kang hluah bawk a. Keini thiante thil thar neih zarah hmanna tur kan lo inti nei vel bawk nen Biakin leh tute in emawni kha kan kartawn vel sek a, Reubena leh Hriatpuia lah Musician an nia, an rawn chhuak ve thei der si lo. ‘Hetiang hunah te chuan programme siam kher a ngai lo a sin maw le’ te kan ti vel nang nang a. Chutah le, a kum leh ah lawk Pu Zahmingliana kawt bak kalna tur reng reng kan hriat loh kum a rawn herchhuak a, Chemchemi lar vanglai a pel tawh bawk nen, ‘Corps hian programme te siam se aw…’ kan ti leh vawng vawng mai.

Kumtin maia ‘a thlawn mai maw’ kan tih thin lai te, Sepa inlak luck vanglai leh a ngaihzawng neih loh lai a inrual tlatte kha tun hnua ka ngaihtuah let leh hian ka hrethiam lo. Kan rualpui te tete a kawpte tea an lo inkaih fer fer laiin zanah salem veng atangin Kumthar bawng tur kan zu kai a, kan la hlim em em zui a. Khatih laia kan hlim viau kha chuan Corps nen a inzawm a, kan hlim loh deuh leh chuti tho. Ngaihzawng nei an awm pawh khan Biakin kawta in melh zuai tih vel kha kan hlimpui tawk em em thin a. Khatih lai khan Masi te kha a hluin kan hlim bik a, tun hnu a kan Krismas hman te hi chu khawharthlak riau hian ka hre thin

Dilzawl vrs Aru: Kan Corps-in Dilzawl kal kan hrat tak tak lai kha thalai vela kan tel tirh lam leh kan inrawlh peih ve viau hun lai kha a ni a. Khatih laia kan Corps SAY a inhmang ve fu chunga Dilzawl kal miah loh kha chu rual pawl lohna chikhat  nia hre ru deuh chung leh kal chak ve em em reng chung khan kalna hun remchang ka’n nei ve tlat lo a, tun thleng hian ka la ui. Dilzawl kal nuamti laklawh, thianpa Nunpuia te kha chuan an zawngchhang e, Sangha manin an chhuak thul, ka inkhel e, an ti awl lo nen, kal ve lo tan chuan chakawm ve duh tak a ni. Krismas an han hman tum khan ka kal chak lehzual.

Khami kum khan kumtir atangin Krismas hmundanga hman kha Corps-in ruahmanna a nei a, State pawn lamah ringtharte awmna hmuna Masi hman pui kha Corps ruahmanna chu a ni a; Kan Corps thalaite inpekna a lo nasain kal tura inpe kha kan thahnem ta khawp mai a, State pawn lama intirh liam vek theih ni hek lo, a tam zawk chu kan lo tlangnel tawh sa na Dilzawl lama kal turin ruahman a ni ta a. Arunachal lama kal turin mi pathum thlan an ni bawk a. Thil dang leh mahni theihna vanga Mizoram pela zin ngai lo tur keipawh chu Arunachal lama kal turin min ti tel ve hlauh mai a, ka lawmzia leh Dilzawl kal ka chak reuh si zia kha.

Masi khawhar tak tak: Tichuan, a hniak tam zawk Dilzawl lama an liam laiin U Zaia leh Sangmawia leh kei chu kan Corps mi David-a rawngbawlna hmuh pui tur leh  ringthar ho Krismas hmanpui turin kan liam ve ta a. Hmundanga vawikhat ka hman ve na tur a ni bawk a, kal hma atangin ka’n lungleng nghal em em ringawt mai a nih kha. Kawng lakah lah chuan Sipai duty hoin min lo tiding chhen mai lehnghal a, a hmaitlang tha deuh Sangmawia te an kalpelh mai mai laiin min rawn melh uluk bik riau thin lehnghal. Kei lah Korean ang lo tawk vel chiahin ka sam a lo buk chhup bawk nen, buai laia bahra khur vela tawm duh hmel ka pu a ni teh chek ang chu. A tawpah phei chuan melh mai duh tawk loin min rawn be ta. Sipai, “kaha jaiga?” Kei, “Pasighat,” Sipai, “ka ha se aia?” Kei(ka ngawi deuh vang vang phawt a “Pasighat”, ka’n ti leh hah mai a, hmelchhiat nak laiin ka rinhlelhawm mai mai ang chu.) U Zaia chuan, ‘Guwahati ti rawh,’ a rawn ti zauh a, lo tawng ve suh, tiin an khap bur mai bawk si. Chutah Bus kawngkhar bulah min hruai phei sauh sauh a, pawna min hruaichhuah an tum, an tawng lah a mik a mak ka hre der si lo, Middle School hindi teacher Pi Khawli ka ngai ngei mai. Engtin tin emaw ka Student ID ka phawrh fuh hlauh a, tin bus-a chuang ve arunachali tlangval pakhat chuan ‘hindi ka thiam lo ti rawh’ a rawn ti bawk a, “hindi malum nai” te ka’n ti ang nawk nawk a, min chhuah ve ta mai a.

Chutia lunglen mah nak laia hrehawm tuar anga ka’n inngaihtuah lai leh Mizoram ngai em em a kan kal zel lai chuan kan tum ram chu kan thleng ta hlawl a, ka khawharna lo nep turzia ka hre fiah kuar kuar mai. Ringthar tlemte leh David-a te chuan min lo hmuak a, an chhehvelah chuan Krismas awmzia hre reng reng lo, ringlo mi an lo tei suau suau bawk a, min han hmu chu an hlimin an thla a muang ve huai huai te’n ka hria. An dinhmunah ka zu indah a, ka hnuk te a ulh lek lek mai.

Urlawk zan Oyan thla eng hnuaiah Sanga nen chauh thirsakawr khalh kan inzirtir pawhin mahni inkhawngaihna leh khawharna ka nei ta lem lo, min thlamuanpuia, an hnena kan kal vanga hlim ve em em te hmel khan hlimna engemaw tak min thlen ve tlat a ni. Zing khawvar hma fea Oimangi’n nui sanga thingpui tui tak tawk min rawn hlui phei chuan inbe thei lem lo mah ila thinlung inpawh takin kan nui var var hlawm mai.

An buh lah a tui thei narawh; ‘In buh hi a va han tui em em ve, kan Corps band ho chu rawn kal se in chaw vang ringawt pawh hian nuam an ti ang’ te kan tia. Anni lahin ‘in corps band chu rawn kal thei tak tak se a thain kan hlimpui ngawt ang’ te an ti khawmawi ve a; Mahse kan corps band ho chaw hehzia sawi chunga kham nachang kan hriat mang loh fo hnuah kha chuan keini aia chaw heh lehzual kha chu an huphurh ve deuh nge an sawi zui ta bik lo.

Tichuan kal lam aia hlawk inti fein kan lo haw a, kan chuanna bus chhiat vanga Guwahati thleng naute pawm chunga kan rawn chuan pawhin hrehawm kan ti lem tawh lo. Shillong khawvawt te lah chu Sanga hmul nel thep ngheng phaka ka awm reng avangin tuar thamah pawh ka ngai lo a, khami kum Krismas kha chu ka tan chuan hlu ve tak zawng a ni.

A va thui hma ve, Krismas putar hmuihmul bo chungchang te, wai wai chhuma tomoto pum thlak chungchangte pawh kan sawi hman dawn lo. Kan thianzaho Krismas ruai ineisiak chungchang te, tuemawin tawtawrawt a thik tlat vanga Krismas laia tuemawin tawtawrawt a ham that ngam loh thu te pawh sawichhuah leh a chakawm viau a, hmunin min daih tawh lo ah ngai mai ang.


(November thla tawp atanga ka christmas article ziah tan kha vawiin 28.12.12 ah pawh hian ka la zo ta lo, nakum atan ka dahtha tawp ta mai. He thil hi chu kan kohhran Christmas special issue a min lo chhuahsak a nia, rundalah dah ve leh mai mai ang.)

No comments:

Post a Comment