Reilote emaw tih chhungin kumpuisul engemawzat a lo vei ve ta reng
a; Thlenthlak tirha rawlthar sa pan thler thlawr ni thin kha T-Shirt hma a lo
puar ta luah bawk nen, tleirawl tawih deuh leh hmuh taih ve deuh ho pawhin min
U ta vek mai! Hmelin a zir loh vang leh hmulphurh chhiat vang nge, u Lalpaa
boitlung te, u Aluaia te ho bula ka awm tam vangin ka senior hmel zawk tih pawh
ka hrethiam tawh bik lo e.
Thlawk tep : Pawl ruk kan zir kum khan lengpui thlawhna
tumhmun tur an laih zawl en turin kan
sikul naupang ho kha kal turin kan inbuatsaih a, kan phur hle; Mahse kal dawn
tepah pawl sarih naupang ho chauh kal an phal leh ta si a, kan kal ve ta lo.
Chumi atanga kum sawm a ral hnu, thlawhna chu sawi loh, a tumhmun ringawt pawh
hi damchhungin kan hmu dawn lo a nih hi, ka tih rilruk tawh hnuah hmana kal ve
an phal lohna lengpui airport ngei mai chu ka pan ve ta chhak chhak a, thlawhna
tak taka chuang tur lehnghalin!
Phur leh huphurh ru tak, ticket OK sa ngei ka neih vanga ngaihngam
ru ve angreng deuh siin ticket entirna hmunah chuan intlar turin ka’n
inbuatsaih ve a. A hmasa bera ka intlar chuan thil kalhmang ka hre si lo a ka
chesual ang tih ka hlau a, ka muangchan lutuk chuan min thlawhsan daih ang tih
ka hlau deuh bawk si. A laihawl vela intlar tumin tan ka la nasa mai.
Chutah le ‘flight an cancel’ an rawn ti ta. E’nge awmzia chiah ka hre lo na a, ka kalpui turte
hmel atang chuan kan thlawk dawn lo tih ka hrethiam ve ta mai a. Counter a
thawk Mawitea an tih chuan min buaipui zung zung a, a tuka thlawk turin min
tihfelsak a, thlawhnaa chuang mai tura inring kha Aizawl lamah taxi in ka haw
chho leh ta a- Aizawl lamah lah tu tute emaw chu ka kal leh loh avangin an lo
hlim phian a.
Thlawk ta: A tukah chuan airport lam panin ka’n lir
thla leh a, khua pawh a veng kuk a, a visibility(khatih lai khan a visivisiti
an ti main ka hria) pawh duhthusam a ni an ti a, a fuh dawn e. A rawn ri vung
vung a, a rawn ri su su te hian ka hria a, thaw deuh huau angin ka hria a, min
chhem paw’n ka hre lawi si lo a, ka bula mite chu an ding suau a, ka’n ding ve
thlarawk a.
Air
Deccan service lai kha a ni a, T.V vela thlawhna ka lo hmuh thin ang a phak loh
em avang khan a taka thlawhna ka hmuh vawikhatna mah ni se ka’n ngai neu nghal
deuh ngawt a.
Chuti chung chuan thlawhna chhung atanga thiante message thawn a, ‘hei thlawhna chhungah ka thu chiah’
han tih vel kha chu nuam ka tiin ka intithei ngang mai. Tun thleng hian air
hostest in min lo ‘hello’ hian awmdan mawi ka la hre fuh chiah lo, ka tum aiin
ka nui tlai ziah. Engtin emaw tak han biak lumlam tum ve si, sawi chhuah mai
tur hre silo a ka awm thin vang a ni maithei. Ka hmui ka kum phut phut lai hian
ka hnung ami hi a lo nuih leh hman ziah a, tlai khaw hnuah mawi thei ang ber
nia ka hriat in ka nui hnuhnawh leh suk thin.
Tichuan MST bus changkang pawl niawm takah chuan kan thu thap mai a, tukverhah ka zu dak chhuak a,
a thla lah chu khawilai jeep tawng lam tawh body ang mai hian a sawr bawl tuk
mai hian ka zu hmu a, thlawk thei tak maw?
A rum vut vut a, a inher luai luai a, a tlan tan ta. A
thlawhchhuah dawn tep a a speed han la sang chho vel kha chak ka tiin nuam ka
va ti si em. Tun ah pawh nuam ka la ti. Kan thlawk ta, thlawhna ah ka chuang ve
ta. Kan thlawh hnu a ka awmdan kha chu ka hrechiang tawh lo, Sptephen Auhmuna
leh Kan thianpa Afana U Samuela hi ka hnungah an nui huah huah kawngtluan(boruak
tluan) tih chu ka la hria. Kolkata ka thleng ta.
Confi takin: Chhungte min chah, ‘taxi driver-in min bum
loh na’n chinchang hrelo ang deuh a hawi hu hu loh tur, confi hmel deuha awm
tur’ tih vel ka apply dan kha ka inhmu chak ngawt mai. Hawi hu hu loin ka hawi
he he in ka ring ta. Engtin tin emaw kan in thar tur Sukhsagar appt. tih
inziahna chu ka lir thleng ve ta mai a.
Zin chauh vang leh lunglen zawi ve deuh nen mut hma tumin ka khum
tur ah chuan ka han tlu vei tap a, ka tho leh zawk mai. Ka khum tur chu a za a
awm a, a chungah ply-wood phah tur ah engmah a inphah lo a, chumi chungah chuan
mattress chhah lem lo hi a inphah leh tawp a lo ni. Ka han mu chu ka cher pan
ve bawk nen, rul tleng ki kawi te pawh ka ang hial awm e, tlang leh ruam a awm
phei thluah mai. Mahse chu khum nen chuan kum thum kan inhrawn ta tho a, a
neitupa lah chuan siamtha tang ei ka ti hlei lo a, kan indelh zantin ve ta mai
a ni. Zing ah erawh rawl a awl deuh.
Call Centre: Khatia ‘phai awm’ ka’n nih tantirh lai vela
ka thil zirchhuah hmasak ber chu ‘lunglen chuan pawisa a hek duh’ tih hi a ni.
Tun lai angin call rate tihhniamna te kha la awm tha vak hek lo, minute khat ah
cheng 2:40 a ni tang mai a, tihngaihna dang awm hek lo, ‘thaikawi bawngte
thleng zo ang maw, ka di runah’ tih hla ngaihthlak loh karah chuan phone kha
kan hmang reng mai a, pawisa chu hek duh tak a ni; Mahse keimah chauh kha ka lo
ni bik lo a, ka inluahpui ka unaute ho pawh kha keimah ang bawk a Mizoram
atanga news ngaichang chi kha an lo ni ve bawk nen, kan in kha call centre-ah
kan chantir zantin a ni ber.
Khatih lai kan hun hman dan kha ka ngai thin ngawt mai. Lunglengin
phone hman reng te chu duh mah i la a sum lamin tlin reng hek lo, mahni
inawmtleina kha kan zawng ve nasa thin a, mama electric guiter hrui kim tawh lo
kha engtin tin emawni kan zam kual a, a cable khawi lai lai emaw kan han rah
hrual nawk nawk kha chuan a ri ve leh tung tung thei mai zel bawk a. Kha guiter
leh eng earphone leh mike phuahchawp tak tak hmanga kan zawmkhawm hmang khan
kan han zai a, kan aw kan han record ngei mai thin te kha chu nuam ve thei tak
a ni. Phur zual changa band din mai rawt pawl an lo awm ziah pawh kha an dem
awm lem loh.
Khatih laia kan thil record ho kha ka ngaithla leh chak hlawm
ngawt mai. In vahvelnaah hmeichhe naupang aw beu deuh leh mipa aw pawr deuhin,
‘All India Radiooooo’ an ti per chhuaih chhuiah lai in ngaithla fuh a nih chuan
min rawn hrilh vat dawn nia, a copy ka nei tawh lo a, ka duh!
Chicken ka beta: Vawikhat ka artui lei
turin ka sawi thiam si lo a, ka khuan vel thu kha chu ka sawi lo mai ang, mi lo
tih tawh dan ka hriat a nia, thil dangdai vak ah ka ngai hran lo; Mahse kan
thiannu Mamuani artui lei turin a sawi dan hian ka nuih a tiza bang thei lo,
midangin an lo ti ve tawh a nih pawhin kei chuan ka la hre ngai lo. Artui in
lei dawnah ‘chicken ka beta’ han ti ve chhin teh u, dawr nghaktu hmel a
hmuhnawm duh lutuk, Mamuani’n a ti.
Mama’n beef pani a lam lauh lauh hnu leh Mamuani tih thika Anda ka
mama te kan lei kan lei hnu kum engemawzatah kan Lal beck-I te ho an rawn
thlengthla a, tlangval khawlai leng mai mai hnenah, ‘Babu ji, Mizoram House
kaha he?’ an rawn ti puam ve ta talh talh a, nuam ka va’n ti.
Ka kalkat ta: “He khua, ‘city of joy’
ah hian tap chungin i lo lut a, tap chung bawkin i chhuak leh ang,’’ tih hi
hmanah kan senior tu emawni article-ah ka chhiar tawh a, ka chhiar lai kha
chuan a awmzia ka hre lo. He khua, lum leh uih hmun mai hi ngainat leh ngaih
nachhan tur hi a vangin ka hre thin. Mahse, vai engemawzatin min bum hnu leh
kan inluahna te’n min vuaka min hnawhchhuah hnu, awmna mumal nei loa kan
teirawlai fe hnuah pawh kan ngaina ta tlat chu a nia, mak ve tak a ni.
Helaia kan Mizo Society te hi a nuam ka ti thin. Khawte ang mai
hian kan inhre tlang them a, krismas leh engemaw tihpui nikhua ah te pawh
Mizoram ang thoin kan han ti ve thlap thlap a, nuam ve riau a ni. Kan nu leh
pa, rual u te hoin zirlai naupang zawk an hriat theihdan leh an hminga an ko
nalh nalh thei zel te hi fakawm ka tiin ka chhuang thin. Kumtin zirlai thar an
lo kal zel a, hriatkim kan har tehlul nen.
Ka awmtirh lai khan thalai fellowship na vela sharing na huna
thian leh thian an han inkap vel te kha ka lo ralkhat thlir a, chuang riau leh
mikhual ngawih ngawihin ka inhre thin. Tunah chuan C.Muana te sawi tur hrelo
laklawh, sawi ve duh bawk si te hian ka hming hi kamchhe tleuh na’n teh an
hmang ve ta mai mai a. E, ka lo kalkat ve ta hle a nih hi ka ti tlai khawhnu a
ni. Ka va harhchhuak tlaiin ka va zakzum inkiltawih em. Tuma’n min U tawh s’u,
hehhee.
thuziak zangkhai tak a ni. chhiar a nuam e. last para kkhi double nia
ReplyDeleteThangkhiuzzz. Ka siamtha e.
Delete