Ka thu leh hla thenkhat ka vawmkhawmna hmun a ni. I peih chuan chhiar ve ta che.

Thursday 4 October 2012

Zawlkhawhermawii

Ka mitin hai tep che mahse ka thinlung hian a lo la hai lo khawp mai che. Kan intawh dawn khan ka kawchhunga naute, hmana che thin kha a che leh ta dat a! Ka mit zawng dem thei ka ni bik lo,  kum sawm chuang fe hnu ah chuan i sakhmel pawh a lo dang ve ta deuh; Mahse nangmah kha i la ni reng si a.
 
Khatih lai kha, ni e, khatih lai kan high sikul kal lai kha mitthlaah a lo lang thar leh uar uar a. Nangmah mitthla reng chunga ‘Zawlkhawhermawii’ tih hla zir manhla ka tih thinzia tak kha aw… Ka suangtuahna ramah khan vawi engzat fakau nge ka fawh che ka hre seng ta lo. A pawi ta ber chu ka fawh lai che i  hre ve ngailo leh min fawp let ve lo thin kha a ni.

Tunah chuan i tleirawl hmel duhawm tak leh biang tai tek te kha nula puitling hmelin a lo thlak ta a, kan intawh dawn a, lai kimki chawih chawih chunga min rawn sir nuih thin lai  ang nilo khan nulain tlangval an melh dan pangngaiin min nuih seih a, i lo la nui mawi ngang mai lehnghal a- Ka chhe leh ta.


Khami ni khan engtin nge kan inbiak tak kha? Kum engemawzat nitin deuhthawa inhmu chung khan kan lo la inbe ngai miah lo a; Mahse khami ni kha chuan kan inbe ngei a nih kha. Keipawh sikul naupang, a ruka star nei rual ka ni tawh bik lo bawk a, tim ru tak si ngampa tak anga langin, “ehe… min hria em?” ka ti deuh tawng a nih kha. Khami tuma min en deuh vang vang lai kha, nia, ka hmel ngei kha chik zetin i thlek vawng vawng a lawm. ‘Synod-ah i kal thin, i samte i lo zuah a, ka hai tep che a lawm, i lo thau tawh bawk si’

Min hria, min hre chiang a lawm. Ani Mamawii Girls-a kal daihin  Synod-ah ka kal tih nen lam a lo la hre thlap a nih chu. ‘I thau tawh min ti’ a ti dik chiah a ni, hmanah kha chuan rawlthar sa pan thlerthlawr kha ka ni thin a, ni e, henu ka hma a ding hi ka ngaihzawn lai khan- ka ngaizawng nge maw ka atchilh ni ta kha le?

“Khatih lai khan ka star thin che a sin….., ka ngaizawng thin che, ka atchilh che a ni mah zawk ang”. Khi thu ka’n chhamkhum mai che kha chu i buai chhe ve ta ni berin ka hria- hmana ka hmuh lai che a ka awmdan thin ang khan. A ngaihna hreloa i hawi ka ho kha kei lahin hmuhnawm ka’n lo ti em em lehpek a. “Class ix nge class x ah zawk zawlkhawhermawii kan zir kha i hria em”?... “Aw la hre deuh”… “Kha hla kha nangmah mitthla chungin ka zir thin a sin” I lai hmel han thatzia kha.. “Ih… keipawh, nitin kan intawk deuh  ziah sia, kan intawh loh tum kha chuan engati nge mawni le, ka ti deuh thin.” Yaaaaasss, he vantirhkoh nula hian min lo ngaihtuah ve thin a nih chu. Amah vangin class viii ka fail tihte hi ka hrilh law law dawn emawni? Khatih laia ka cher chhan kha nangmah vang a lawm, te ti ila a awih ang em? Lehkha zir chu sawi loh inkhawm lai takngial paw’n amah ngaihtuah loin ka awm ngailo kha a ni si a. Lei taksa pu loa kan lendun thinna tlang leh mualte kha ka mitthlaah a lo lang thar leh uai uaih mai.

“Tak tak maw, min lo ngaihtuah ve maw?, Min lo ngaihsakin min lo hre ve tak tak maw?”… “Hriat ve bawk loh te’n….” I’n nuih dan vel chu(h) mi chhaithluk i tum deuh a ni awm e-tlusa ka nih hi tlusa.  “I rawn pheina thin kawngpui pawhtu step-a ka rawn kalthlak lai hian ka hmu hman lo ang che tih hlauin hmanhmawh tawkin ka rawn tlan deuh hlawk hlawk a, kawngpui ka rawn pawh ve leh hian ka kalchak lutuk ang a, i lo chhuah hmain in in ka kalpel ang tih ka hlau leh a, muangchangin ka kal thin a sin”  An parva khawi thlawk vel ringawt pawh hmuhnawm ti taka ka thlir doh doh thin thu hi chu hrilh rih lo ang. “Kan in i hria maw?” Hria e, I room zawn pawh ka hria, tih mai ka va chak ve. “Hria e, in atanga i lo chhuak lai kha ka hmu fuh zeuh zeuh che a lawm”. .. “Nangmah hmu tur chiah chiah che khan ka lo chhuak thin a lawm, kan tukverh atang khan ka lo en reng thin che a, kawngkawia i lo lan chiah khan ka lo chhuak thin a lawm”

Ka thi ka thi, dawt pawh nise ka awih ang. Lawm tak a ruangin kan chen tak lo kum liamta kha ka’n ui ta em em mai a nih chu. Engati nge ka oh ‘kan’ lo hriat loh? Rilrua invei tak chungin tikhan hun kan lo hmang liam a, School kaltur kan intawk zuai tih bak kha chu kan inhmu ngai der si lo. Ka va uiiiiiiiiiiii. “Engati nge min hrilh loh?”.. “A mipa zawk paw’n min hrilh bik hleinem”.. “Min duh ka ring lo a, ka zak a lawm”.. “Keipawh…”

“Zomuanpui, nang hi ka duhlo ang che maw?”… “Engtin nge ka hming i hriat a, e ka hre leh si”. “Engmaw i hriat chu?” “Hmanah i lo phei lai tak khan ka thiannu ka inkohtir vak a, ka hming i hriat na’n ka ti a nih kha.” I va han ngeiawm reuh em, khawlai han ni lo se aw… I hmui lah chuan fawh a cho em em lehnghal a.

“Hmm, chutiang vel mai mai chuan min lo ti kual a ni maw?” Pangchang der vel teh ang. “Ni nang i hming hre tur pawhin ka bei rei ve tho a sin, min hriattir i tum ve si lo a”.. “ Ka hming te pawh i lo hre vek a maw?” “E’nge ka hriat loh ang le”.. “A nih tu’nge ka hming?”.. “Awi.. ka hre hneh lutuk che, ka atchilh ve thin tho che a lawm Lal-Reuben!!”

Engmah mumalin ka hre zui ta lo. Kan inhmu a, kan inbia tih te hi theihnghilh a nia ka duh. I lo atchilh a i lo buaipui thin Reuben-a khi keimah ni loin nitin School ka rawn kalpui thin ka thianpa zawk kha a ni tlat. Amah pawh ka hrilh bawk lo ang :-D

9 comments:

  1. a tha khawp mai.. rin loh dan daiha a thawnthu a in her kual chu le :)

    ReplyDelete
  2. Haha... a ni loh lamah min luh-pui daih chu..hahaha. Ngaihnawm phian, Keep It Up, ;-))

    ReplyDelete
  3. mizotawng han rem khawm leh han pawh kual siksawi vel hi chu i thiam teh e..
    nghaihnawm hle mai........

    ReplyDelete
    Replies
    1. U Sate, i va ti lawmawm thin ve. A tak tak emaw kan ti ang tih chu a hlauhawm viau :))

      Delete
  4. ngaihnawm thei eeeeeee....a dang chhiar chakawm leh pek hle mai :P

    ReplyDelete
  5. hahaha, tha tawp! ngaihnawm lutuk
    chuan, "ka blog tlawhtute zingah i khuavang awmna a la fuh berrr" tih lai khi, zei ma maiiii.. lolzz

    ReplyDelete
  6. he thu hi Facebook Thungawihnawm huang group ah Saidika Ralte ti in a lo post ve ringawt ania o

    ReplyDelete

KRISMAS HLAWHTLING

Short Sermon te, Sermon te Christmas thuchah hrim hrim bakah ṭhalaite chuan Christmas a lo hnaih hian bonus kan dawng ṭhin. Zilhna leh fuihn...