Saturday, 27 October 2012

HMEI


“I hrelo maw, helai building-ah hian kum thum chuang in khawsa a ni a, engtin nge i hriat loh theih?” Muantea chuan thinrim tak leh rinhlelhna mitmeng nen a thianpa chu a chhukmelh run a. Ani, a thianpa Isaka lah chu a Muantea ai mah chuan a beidawngin a hlauthawng tih a hmelah a lang reng mai. A chala thlan bawl tawk tawk chu huih fai pahin, “ka hre lo, ka hrelo takzet a ni, fiamthuin ‘khulai flat khu a hrang a ni hrim hrim ang, an luah reilo thei e mai’ kan ti mai mai thin a, tuma’n thutak a nih pawh kan ring chuang lo..,” a ti bah niaih a.

2006, kum tir lamah khan Muantea chuan a zirna chhunzawm turin Kolkata khawpui a pan ve a, chutia hmundanga lehkha a han zir ve tur chu a phurin a hlim hle a, a hlim nachhan ber chu he khawpuiah hian a nun tihlim em em tu, krismas laia a tawn thar kha a awm tlat a ni. Phone bill pawh a heklo deuh ang chu.

Numami chu nula lerh a ni lo a, an venga a thiante phei chuan ngaihzawng neih nachang pawh hrelo, an ti fo thin. Mahse mihring pangngai, hmeichhe pangngai rilru pu a ni a, mipa ngaihsakna rilru nei miahlo chu a ni bik lo. Weekend ah thiante rualin hostel atanga chhuah phalna a’n la ve ngei a, a thiante ho chu an bialpa emaw, bialpa chiahlo an hmelhriat thar te emaw ina an riah bo laiin Mizoram House Girls dorm-ah a hun a hmangral bik ziah a, hrehawm tih chang a ngah ve thin.


Kolkata-ah a thiante’n an sawm ngial pawha a kal duh ngai miah lohna ‘party’ an tih ang chi ah khan krismas a haw laiin a cousin-in a sawm nasat em avangin rilru nuamlo deuhin a kal ve a, a inchhir lo hle mai.

“Awi Numam, khatiangte chu naupang a nih kha, hmeichhe tan chuan mahni aia naupang chu a tihchi vak loh a sin.” A cousin chuan a hlauhthawn pui deuh a ni. A awm reng a, hetiang ngaihzawng nei ngai loin an han neih ve hian an la na duh si a, mi thalo tawn palh hi a hlauhawm reng a ni. “A naupang lutuk tawh bik hleinem, bakah a rilru a puitling a sin, nizan pawh khan mipa ho zawng zawng deuhthaw kha chu an rui buai deuh bual vek a, ani kha chu a buai ve miah loh kha.” Numami hmel atang chuan a rilru zawng zawng chu chu tlangval hnenah chuan a pe tawh tih a hrethiam ta mai a, sawi hnawn puiin awmzia a awm tawh lo.

Ni khat hi a rei zo lo fo thin. Muantea lah a thiante’n mak an tih khawpin a bur nghet  a. Nidanga hmeichhe hrang hrang kawp kual nuam ti em em thin khan ‘Numami’ a ti reng tawh mai a ni.

Duh chen chen chawlh theih ni hek lo, Numami pawh a chawlh hmang zoin a lehkhazirna lamah a let leh tawh a, an lung a leng dun thin ngei mai. Phone bill lah an heh dun narawh. “Ka rawn awm ve dawn, ka pa paw’n a phal vek.” A’n nui deuh har har phawt a,”Lalthlamuan uang uang suh, min tilungleng mai mai.” A tak tak a ni tih a hriat hnua Numami hlim aw rawl kha….

Mizoram House gate a rawn lut chiah chu a dan pangngaiin a hnar a thlan hlap a, tlangnel fahranin kuhva hring a’n lam zui nghal zat a. Muantea’n ‘Lal Isak, i va rawn lang har ve, in luah tur chu i hmu tawh em?’ a tih pawh chu chhang lawk loin rawmawl leh sikret a phawrh a, a thlan hrukfai pahin sikret chu a’n tan leh te te a. “Ka broker hmelhriat kha a zin daih a….” Muantea chuan dawhtheih loh hmel zetin, “Broker dang an awm mai lo em ni? House-ah hian a awm reng theih loh a nia, chubakah ka chak ve tawh hrim hrim.” Isaka chu a nui vei var var a, “a thalo ang a….. hehe, taktak ah hmana kan inluah thin hnuaiah sawn flat pakhat ruak reng thin a awm a, kan va kal chhin dawn nia. Mahse landlord a sual a ni maithei, a luah ho hi an awm rei lo thei lutuk a.

A neitupa chu Punjabi pa lianpui hi a ni a, an han inbe vel a, an inrem chu a ni deuh nghal mai bawk a. A tuk lama lehkha pawimawh tifel turin an kalsan ta a. A sual loh tawp kha a ti rilru a, a ri chuan, “i sawi ang em em a harsa chu a nih loh hi, thil hi i sawi harsa ve thin hrim hrim.” Isaka lah chuan a thianpa tawng elna chu a lo hre vat a, “henglaiah sum tel loin engmah a tih theih hleihnem, sum chu awm se i rawn thlen ni a i luh nghal theih tur pawhin ka lo be fel vek thei ang, kan tifel ta bawk a Zu i  show thei.”

Muantea phur pheng chuan a thianpa zu in chak uak ek ek reng pawh chu a hrechang tawh lo. Gariahat kawng phei velah chuan an vei tuak sek mai a, Numami’n pangpar khawina’n a duh ang, tiin pot a lei thul. “A kekawrte tur thlenga leisak vek i tum em ni,” Isaka’n a rawn tih takah chuan tlema inthlahrung aw deuh hian, “kal remchan laia lei lawk hi a tha a lawm, a nih leh phei tawh i la, “

Isaka inluah ah chuan zu an in dun a, an titi pawh a tui tawh khawp mai. “Sakte, rawn awm ve mai la, hetia mahnia awm ringawt ai chuan a nuam daih zawk ang. Isaka chu a’n irh ek ek phawt a, “Live in blue film kan en reng peih lo.., tak takah mahnia awm hi nuam ka ti tawh zawk, mahni hian ka inthurual ber.” Vai ho sual an tihzia te, fel an tihzia te an sawipawlh nuaih a, Zoram politics an sawikai tan hma deuh chuan Isaka chu zung turin a tho tuang tuang a. Zunin atanga  rawn chhuah leh pah chuan, “taka, in inluah tur saw a hrang a nih te kan ring thin a sin…” Muantea chu thuthleng ban nghengin a lo hnar hman tawh.

“Sawlam saw chu ka tlangnel vaklo a sin, bakah Auto pawh a luh loh te chuan..” Mizoram House hnaih a inluah hi a tha, an tih a lo hriat ve thin avangin Numami chuan a hreh deuhhlek niin a lang. “Ho lutuk, miin min chim vaklo ang a, chance kan ngah ting a ni mai a lawm, i pa te bulah chuan engtin nge i sawi. “Ka thiannu nen kan luah dawn ka ti.”

An inluah tur chu in mal ding, chhawng li a sang a ni a. A luhka ve angrengah chuan ‘Sukhsagar building’ tih hi a inziak a. Anmahni awmna tur chu chhawng hnihna ah a ni. An in pawh pheina tur kawng chu a zim deuh avangin taxi kal theihna tawkah an bungrua chu an hlangthla a, cycle rikshaw-in thiar leh a ngai dawn a ni.

“He’nglai mi ho hian North East hmel hi an hmu tam vak ngai lo nge, kan awm lai pawh khan nitin kan veivak chung pawhin mak ti tawkin min en reng peih tho,” Isaka chuan Muantea air bag hlanthlak pah chuan a lo ti bal bal a. “Helaiah hian in awm ve thin maw?” Numami aw ah chuan Mizo pawh an lo awm ve thinna hmun a ni tih a hriat chuan a ti tlangnel deuh tih a hriat theih mai. “Awm thin e a, tuna in awmna tur chung berah sawn kan awm thin a lawm.”

A chhawng hnuai berah chuan Bengali Pitar leh putar nupa hi an awm a, an inthiar luh vel lai chuan ngainat loh hmel zet hian an rawn melh deuh ram ram a, a pitar zawk chuan an gate khar rin thu hlaah a rawn khak nghal mai reng bawk a. Isaka chuan, “ an phunchiar sia, an ninawm reuh a nia. Mahse an sual vak lo, bakah inleng in nei ngai vak awm si lo a, sawiselna tur che u an nei vak lo ang,” a lo ti liam puat puat a.

Pitari te nupa awmna chung chiah chu kudam angreng deuhah an hmang a ni ngei ang, a inkalh na a, kawngka kau lai atang chuan a chhunga rumrawk hnawk nuaih chu a lang thei a, chumi chung leh chiah chu Muantea te awmna tur chu a ni a, Muantea te awmna chung leh ah chuan Vaipa pakhat a parawl a, Isaka te awmna thin ah kha chuan tumah an awm rih lo.

“Bawih, heihi khawiah nge kan hun ang?” Numami chuan Muantea rawn chhanna pawh chu ngaithla chuang loin bungrua vel chu a hungsawnin a remfel zung zung a. Bedroom pahnih leh Common room pakhat, choka leh bathroom awmna in a ni a, mi pahnih luah atan chuan a thawl lam deuh hlek a ni. Hetiang tiat vel leh hetiang zat pindan awmna hi chu helai Mizo zirlai awmte chuan mi pali emaw, panga emaw te’n an inluah tawm thin a; Mahse anni chuan midang luahpui an mamawh lem lo a ni ang. Luahpui tura an sawm der ve ber Isaka lah chuan a lo duh lo ve bur si a.

“Numam, khawi room zawkah hian nge i awm dawn?” A nuih dan kur kur chu zu a in chak leh tawh a ni ngei ang. Numami chuan Isaka fiamthu chu a lo hai bik lo a, nuih let har har pahin “I ninawm, helai room hi i chahthlak changa i mut na’n kan dah awl dawn nia.”

“Sakte, riak ve mai rawh…” Thiandun pahnihte chu an titi a tui leh viau tawh mai a, an lem leh nual tawh a ni ngei ang. “Khai khai khai, ka riak tak tak ang a, hnawk min ti viau mai tur a sin,” tih pah chuan a nui huah huah a. Numami chuan thutak deuh hian, “Tak takah, riak ve mai rawh, hei room pakhat a awl tho a,” a lo ti ve bawk a. Numami hmela ngampat zan lohna leh hlauhthawn rukna lo lang chu a hmuhin ‘aw’ tih mai a tum  na a, a tuk lama thawh hma a ngaih chhuanlamin a hnial leh ta zawk a.

Isaka haw tur Numami’n a thlah lai chuan Muantea chu a a kun leh lup lup tawh a, a thianpa haw tur han thlah thei pawh a awm lo. Kawngka a kalh fel a, mutna a’n phah fel leh a, a bialpa chu a mutthattir a, ani chu a mut a la chhuak lo kher mai. Muantea rui lutuk chu a ngei angreng hle a, an in tharah an zankhat riahna tur a ni lehnghal a. A zu in hi khuahkhirh deuh a ngai dawn a nih hi, a ti rilru a. A takah tih theih ni hek lo, Muantea nena an awmdun hmasak ber tum kha a ngaihtuah let vang vang a-

Khami ni kha, Muantea’n an inah leng turin a sawm a nih kha. Hmeichhia zawk mipa ina len chu a zak hle a, mahse tumah an awm lo, a tih avangin hreh tak chungin Muantea te in lamah an inzui haw a, a sawi ang ngei ngeiin a lo inkalh thap a. Muantea room lamah an lut tlang nghal a, khami tuma a rawn fawh dan kha a hmaa a fawh dan nen inang lo a ti deuh a, mahse a hriat ngai loh dan hlira a rawn chet tak avangin mak pawh a ti hman ta lo. A kut hraw hraih maiin a  mal a rawn zut chhoh laia a zauthauzia te kha.  Khami tum khan a vawikhatna atan mipa a mutpui ve ta a, Muantea chu a hmangaih em avangin a inchhir lem lo. A vawihnihna atan zanin hun hi a lo nghakhlel em em a, a bialpa lah chu a chatthla daih si… Mutchhuakin a rawn zem ve chiai chiai a.

“Kan khuangpu chuan a va han vaw ring em em,” a bul ami chu a han en a, vainu lu thur be bu hi a lo ni a. Engati nge he nu hi a rawn inkhawm ve ringawt ni ang le, kristian pawh a ni awm tawp si lo a. Khuangpu chuan a vaw ring tulh tulh a, a bengdar chu a keh thei takngial dawnin a hria a, a beng hupin au vak a tum a, a auchhuak thei hauh lo a, a harh ta hlawl a. Thaw hlawp hlawpin a bula a bialpa mu chu a kuah a, a thlamuang ta huai a; Mahse khuang ri kha a la reh tlat lo, rang zetin a rawn ri leh dawt dawt a, kawngka kik ri a ni!
  
A bialpa chatthla lah chu kaihthawh rual a ni lo. Sana a han en a, zing dar thum. Kawngka chu a rawn ri leh a, ring lutuk lo, khat deuh hlekin vawi thum a rawn ri a, a ri a thum danah a chumin a rawn chum a ni ngei ang. Tun ang hunah tu’nge rawn kik ta mai. Muantea chu a han sawi leh a, ani lah kahthlak ang der a ni si. A rawn kik leh ta. Lukhamin a beng a hup a, a inlukhup tlat bawk a. Tumah chutiang hunah mi pangngai lo kal tur an awm lo ang. Isaka! Isaka kha, a lo let leh a ni maw? A rui lutuk a haw peih lo emaw, hawna tur motor a hmu lo emaw a niang, a lo kik rei viau tawh ang em, engati nge a lo phone mai loh? Thawhchhuah pahin  Muantea phone chu a han en hram a, Isaka miscall chu a lo awm ngei a. A nui deuh sak a, ‘Lal Isaka mai mai chu, min tihlauthawng tep a lawm.’

A rawn kik leh ta. “Ka rawn hawng dawn, Saka.” An kawngka kalhna lah chu a tuiek deuh emawni a sak em em lehnghal a. A ri rawk a, a hawng thei ta hram. “I rawn kikna a rei tawh em?” tih pahin a hawng a… Kawngkhar bula mi chu Isaka awzawng a ni lo! A te tuar tuar a, a lum pup a, a khawhmuh a thim mup a, engmah a hre zui ta lo.

Numami thawhchhuah dawn lai vel chuan a harh ruai ruai a, a lu chu a na ut ut a, a tui a hal huam huam bawk. Numami’n Isaka hming a lam ri a hriat chuan a haw tur a thlah a nih a ring a, kawngkhar a khawih rik rak rak lai chuan a muhil leh tan siar siar a, chutih lai tak chuan Numami te ri chuan a rawn tiharh chiang ta a ni.

“Tumah an awm lo Duat, inhnuai gate pawh chhunglam atangin a inkalh daih a, tumah an lo lut lo ang. I hmusual a ni lo maw?” “Nilo, nilo ka hmu. Khanu kha a ni chiang a lawm, ka kaitho dawn che a, i harh thei bawk si lo.” A khur hlawk hlawk reng a, a mumanga a hmeichhe hmuh ngei kha kawngka rawn kiktu chu a ni tih a sawi chu Muantea chuan awih harsa ti hle mahse a awm chu a nuam bik chiah lo.

“ Bawih, helai hi nuam ka ti thlawt lo. Ka hmuhtirh atang khan ka thauah min man  a, rap deuhna ka nei tlat, insawnna tur dang ngaihtuah ang.” A bialnu chu a kuah hle hle a, Isaka’n helai in luahtute’n an luah reiloh theihzia a sawite kha a ngaihtuah chhuak a, mak a ti deuh viau a, hlauh phei chu a hlau hran lo. Khawvar tantirh lai vel chuan Numami pawh a muhil ve ta a.

A tukah landlord a lo kal a, inhnuai pitarite nupa nen an han sawiho  pawh chuan zan dar 11 ah main gate an kalh a, tumah an lutin an chhuak thei tawh lo, tih thu an hrilh leh a. Tin, chutiang mi hmeichhia chu chulai velah a awm awm an hriat loh thu an sawi bawk.

Zan lama a mut that loh avangin a zawi hle a, mutthilh a tum leh a maimitchhing ngam si lo. Muantea lah chu college lamah a kal daih bawk si. Muantea call tuma phone a ban chiah tih chuan an kawngka chu an rawn kik karh karh a. A tirilah a khur leh nghal titih a, mahse chhun khawen lai a nih avangin a inti huai lui a, tim deuh dai hian kawngka chu a va hawng a, an inhnuai ber ami pitar kha a lo ni a. An inneih champha a nih avangin sweets eng  engemaw a rawn pe a ni. Numami chuan an fel viau reuh hi a lo ti rilru a. Chutihlai chuan Pitari chu choka lamah a lut phei a, an choka chhuar chunga rumrawk vawmkhawmna atana siam niawm tak chu a lo thlek vawng vawng a, Numami a va luh ve chuan rang deuhin a inher a, a chhuak ta daih a.

Pitari thil rawn pek dahthat vel pah chuan an chhuar chung chu a han en a, engati nge Pitari khan khati taka a thlek vawng vawng aw, a ti rilru a. Lawnkang meuhin chulai chu han enchian a tum ta a ni. Gas thuk an dahna sir chhuar chung a ni a, thil hluihlawn vel dahna’n an ti a ni ngei ang an rek kua a, kawngka pawh an siam ve thlap a, a kawngka chu thirzai hian an phuar a ni. Gas thuk dahnaa lawn chung chuan a han banpha tawk tawk, a thirzai chu phelh tumin a herh a, a sak hle lehnghal a. “Engnge i tih a?” A phu chiang lutuk chu a tlathla thelh a, Muantea lo tlan phei chuan a rawn dawm hman hlauh lo se chu a tla na viau ang.

Chumi zan pawh chuan Muantea chu a muhil hma leh hle a, hmangaihna an chen zo chu lungawi awm fein a rum hak a, a let thawk a, a muhil zui lehnghal chu a ni mai. Numami erawh chu a muhil leh lawk lo. Hostel-ah light an off hnua an ninhlei theihzia te, thil hrang hrang a ngaihtuah kual mai mai a- choka chhuar chung kha! Pitari khan engati nge khati taka chhuar chung kha a thlek ngun le? A mitthlaah a kalhna kuala thirzai tuiek thap tawh inphuar te chu chiang takin a rawn lang uar uar a. A chhungah e’nge awm ang, thil hlu deuhte hi an lo thukru reng a niang a. A chhunga awm enchhin chakna chuan a rawn tur ut ut a, a bialpa chu a han en a, ani lah chu a lo hnar leh suk suk tawh a.

Choak rual hian saruang  hi an tlan hut hut a, an saruang tlan rim lah chu a na em em khawp a, hnar hup chunga kalsawn a lo tum a, a kalsawn thei der lo lehnghal. Chutah choak hram duai duai ri chuan a tiharh ta hlawl a, khua a lo var tan dawn mek a, zung turin a tho ta a. A zung zo a mu leh tur chuan Numami sama maimawm ril kai chuat chu tihfai pahin inchung lamte chu a han thlir a, khawilam maimawm ril nge maw lo tla le, ti rilru chungin a mu leh ta a. Khawvar lawm ni awm taka choak hram duai duai chu a ning ngei mai, an saruang rim lah chu a harh hnu pawhin a la hre reng lehnghal.

Chumi tlai lama Muantea college bang chuan phur fe hian, “Duat, Saktea inluah bul lawkah khan inruak tha deuh mai a awm a, kan insawn mai dawn nia, helai hi nuamlo i ti bawk sia,” a rawn ti lut sauh sauh a. Numami hmel chu a han tim deuh a, chutah, “a…., Bawih, a buaithlak mai mai, kan lut chauh a insawn chhuah lehnghal chu hautak pawh a hautak a lawm, nuam kan ti chhawm ve mai ang,” a lo ti bah niaih a. Muantea chuan hnial a’n tum uk na a, chutia Numami berin a tih chuan tha a ti leh ta zawk a, insawn kual vel mah a buaithlak tehreng nen. “Hrehawm i ti lo ang maw?” a bialnu chu ngaihtuah zetin a kuah hle hle a, ani chuan”kan awmrei ang a, nuam kan ti ve mai ang, thenawmte pawh an fel a lawm..”

Khawvar hma deuhin a harh a, a bialnu chu kuah a han tum a, a lo awm si lo. A zung emawni le, ti nuah nuah chungin mutthilh leh tumin a inlukhup a, a chhing leh ta siai siai a. Choak hram bawkin a tiharh leh a, khua a lo var leh tan tawh a ni. A han inlet a, Numami chu a lo la awm hauh lo! Rang zetin a inperh tho a, room atanga a chhuah rual chuan choka leh sitting room inrina chhuat lawnga Numami lo mu reng chu a hmu ta a.

“A lum em a lawm, i hnar ring bawk sia, khawlum lai chuan chhuat lawnga mut hi nuam ka ti ve hrim hrim.” Muantea chuan a bialnu chu mak tih hmel zet hian a thlek vawng vawng a, han thinrim viau nachhan vak tur awmin a hre chiah bawk si lo. “Chhuatah pawh ni se, khalai chhuat ber kher, a balh tehreng nen, maimawm rilte i kai teuh kha.” Numami chuan, “ka’n inbual fai ang e,” tih pahin bualin ah chuan a lut ta daih a. A taksaa bawlhhlawh kai, maimawm ril chauh ni lo te chu a thianfai mawlh mawlh a, zan lama a awmdan ngaihtuah let a tum chuan mutchhuakin a rawn zem a, engmah a ngaihtuah let thei lo.

“Khaw’nge kan bawngsa leisa kha?” Muantea chuan fridge a hai rak rak a. “Chhunah ka ril a tam lutuk a, ka ei daih. Ka rai no a niang, thil ka rawp thei lutuk,” nui hawr hawr chungin Numami chuan a rawn ti a. “A vai khan i ei zo vek maw?”  Numami thil ei tlem thin zia a hriatchian em avangin mak a ti hle a ni. Chumi tlaia chaw an han ei leh pawh chu Muantea chuan a ei ve hman mang lo. Numami chuan a hapin a hap zo duak duak a ni ber. Muantea’n mak tih hmel deuha a lo en a hmuh chuan, “KAN heh ti raw…”

Muantea chuan a bialnu awmdanah chuan engemaw diklo a awm a nih a ring tlat a, a awm a nuam thei tawh lo. “Ka rai no a niang” a ni thei lo, a la reilo lutuk. Lum tih vang pawh nise khalai chhuat remlo leh bal lai berkherah khan engvangin nge a lo mut le? A hma zan pawh khan maimawm ril a lo kai nuaih tawh bawk. Vawiin tlai an chawei lai khan a mumanga saruang tawih rim ang deuh kha a hre lehnghal. An sa dahthat te kha kg 1 aiin a la tam mah a nia, engtin nge a ei zawh theih?

A bialpa chu a muhil tawh emaw a ti a ni ngei ang zawimuangin a tho them them a,  heti tak maia mut a duh hi chu a lawmawm ngawt mai. “Numam, khawiah nge i kal dawn?” A aw chu a vin lek lek a, rinhlelhna a inphum tel bawk. Mahse muangchanga Numami rawn hawi phei, pawnlam light engin a chhun a han hmuh zet chuan thinrimna leh rinhlelhna aiin a rilru chu hlau leh thlabarin a khur thei hial a ni.

Numami sam thur bu leh a mitmeng, vai pathian mitmu tiat zeta meng dum kul mai a hmuh chuan a te chhuak lo chauh a, mahse a mipa rilru huaisenna  sawmkhawm hram hram in Numami bana va kaih pah chuan a ko mawlh mawlh a. Chutah Numami chuan a ban lo vaipersak pahin keimah emaw min la ti cheu elaw, tih leh tlanchhuah a rual ta mai. Dan hman rual a ni lo a, choka lama a ri rawk rawk chu hriain a va tlan phei a, chhuar chung kawngka inhawng huau ah chuan a han dak a, a tawp a hmu pha tlat lo. Han luhkhung tur chuan a huaisenna in a tlin bik lo a ni ang, phone a phawrh a, “Saka, hmanhmawh deuhin lo phei  vat teh.”

“I hrelo maw, helai building-ah hian kum thum chuang in khawsa a ni a, engtin nge i hriat loh theih?” Muantea chuan thinrim tak leh rinhlelhna mitmeng nen a thianpa chu a chhukmelh run a. Ani, a thianpa Isaka lah chu a Muantea ai mah chuan a beidawngin a hlauthawng tih a hmelah a lang reng mai. A chala thlan bawl tawk tawk chu huih fai pahin, “ka hre lo, ka hrelo takzet a ni, fiamthuin ‘khulai flat khu a hrang a ni hrim hrim ang, an luah reilo thei e mai’ kan ti mai mai thin a, tuma’n thutak a nih pawh kan ring chuang lo..,” a ti bah niaih a. Midang han pun lah chu mualphothlak dawnin an hre bawk si, beidawngtakin an thu ngawt ngawt ringawt phawt mai a ni.

Zing khawvar hnaih tawh a Numami aw ngei maiin, min chhan rawh, min chhan r’u a ti ri an hriat chuan an tho rual dun thawt a, aw lo chhuahna lam an han ngaichang a, a reh leh hmak bawk si. “Inchung lam te khi han enchhin ang hmiang,” Muantea aw a hlauhthawnna lo ri chhuak chuan Saka pawh a tikhur thei dawn hial mai.

Inchunga chhoh an tum lai mek chuan chauh hmel zeta rum ri an han hre leh a, “inchungah a ni, lo tlan rawh.” Muantea chuan an inchunga parawl pakhat awm ve chu a mitthlain a han hmu a, a va chak dawn lo rua em, a ti rilru a. Chutih lai chuan a rawn rum leh kawk a. Saka chuan, “inchung a ni lo, inhnuai kudam-ah khuan a ni,” tih leh tlanthlak a rual a. An zu thlen chuan a hmaa inkalh reng thin kawngka kha inkalh loin a lo inkhar ringawt a, an han nam hawng thuai a, a thim kher mai.

Lut hmasa zawk nih chu an hreh hle a ni ang, an han inen leh he haw phawt a, a neitu chan changing Muantea chu penlut hmasaah a tang a, an phone lah chu a eng nep khawp lehnghal. “Muante, min chhan…. raw…” chu aw lo chhuahna lam chu an han en chuan bungraw hnawk nuaih karah hian Numami chu a lo mu kawm ngal a, a meng pual ru a, a chilphuan a tla buah mai bawk a, a rim chu tawrhhar tak a ni.

An han insingsak fel a, Numami khuma an han muttir fel chuan khua pawh a lo var tawh a, an awmzel dan tur chu ngaihtuah thiam a har ta khawp mai. “Saka, i inah kan rawn awm ve phawt mai ang, he in hi a thalo a ni, a rang thei ang bera chhuahsan a ngai.” Saka pawh chuan a thiante harsatna chu a hrethiam khawp mai, hmana ‘a hrang’ an lo tih fiamthu thin kha a tak ngei a ni tih a han hriat chuan awih har a tiin mak a ti kher mai. “Ni e, ka inbul ami pawh kha kan be nghal thei tho a lawm.”

Pakhatin bungrua a thiarchhuah laia lo awmpui tu nih ringawt pawh nuamlo khawpin Numami chu a rum ngul ngul reng a. A ka atang chuan tuihnang rimchhe zet hi a chhuak duah duah rng bawk nen a bula awm a hrehawm kher mai.

Bungrua an lakchhuah zawh chuan Numami chu kuah chunga chhuahpui an tum a, an beidawng chiang hle. An pahnihin thatawpa an pawh pawhin an pawt tho zo  lo. “Duat, helai chu a hrehawm e mai, hmun nuam deuh ah kan insawn dawn nia, nangpawhin nuam lo i tih kha, lo kal rawh le,” tia Muantea’n a thlem pawh chuan a tang kawh tlat a, “helai hi kan in a ni a, nuam ka ti ber, hmun danga kal ka duh lo” a ti bur mai si a, an beidawng dun hle.

Muantea’n kaihthawh tuma a han pawt leh chu thawklehkhatah a rawn tlawh leng lawp a, chutah a rawn dingchhuak a, aw chher chhuaiin, “ka in atang hian engvangin nge hnawhchhuah min tum,” tiin a rak tuar tuar a, a tawp lamah phei chuan Bengali ngialngan tak hian a ang bual bual a, kut sai ngar ngarin Muantea leh Isaka chu a kawk a, an hlau dun kher mai.

“Ka Numami a ni tawh hauh lo, eng ramhuai hmei emaw a nih hi” Muantea aw chu beidawnna in a khat a. Isaka chuan, “Pastor ka’n phone  ang a, midang hrilh zau loa lo kal turin ka’n ngen tawp mai ang e,” tiin a phone chu a hmet zui mawlh mawlh a. Pastor lo thlen an nghah chhung pawh chu rei an ti dun  kher mai.

Khua a thim leh tep tawh tih chuan Pastor leh mi pakhat hi an rawn thleng a, thil awmdante an han sawi hnu chuan pastor chuan Numami chu  luchunga kutnghatin  tawngtaisak a han tum a, a tawngtai tan chiahtih chuan namenloin a sarak leh ta chiam a, a tal buan buan bawk a. Mipa pathum chuan an dawmbet a, pastor chu a lo tawngtai reng bawk a, a zal ve tial tial a, engtin tin emaw an inhnukchhuak thei ta hram a ni.

Chumi zan chuan Numami chu Pastor-te inah chuan a riak a, pehhel deuh taka a chhungte hrilhin pastor chuan a tukah Mizoram lamah a thawn chho ta a ni. Chutah chuan a la tawp mai lo a, hun kan neih chuan Chu thlarauin Mizoram thlenga a umzui dan leh an inluah lo hran tan nachhan Bengali nupa inthah dan leh a nupui thlahrang chanchin kan la ziak leh dawn nia.


7 comments:

  1. Replies
    1. Min lo chhiarsak a, ka lawm hle mai.

      Delete
  2. ngaihnawm thin hle mai..., he tiang lam hi i ching riau.. ka rawn entawn leh mai thei che a ni..haha..

    ReplyDelete
  3. lab ah keimah chiahin ka awm a, ka chhiar a, thawm a rik hlekin ka hawi nghal sek mai. haha. Ngaihnawm lutuk. I ziak thiam. A mitthla char char theih alawm. Movie te pawh a ang. Keep it up. Ka nau kha lo duat la :-)

    ReplyDelete
  4. A ngaihnawm hle mai. Han chhunzawm leh thuai la tha tur... :)

    ReplyDelete