Ka thu leh hla thenkhat ka vawmkhawmna hmun a ni. I peih chuan chhiar ve ta che.

Thursday 12 December 2013

BUAINA



(Sangate thian za ho an lo lut a)

Sanga: (lo luh pahin) Kan upa tulh tulh a, Krismas te hi a ho telh telhin ka hria.

Mawia: Dik chiah, halpuah hal an khap tawh bawk si.

Ruata: Kumin chu nuam deuhin hman tum ang u.

Liana: Engtin nge kan han tih vak chuan ang le…?

Mawia: Tlang thing phurh leh bawngthlah tih vel kha a nuam mawle..

Ruata: Engtin emaw danglam deuhhlekin hmang ila, nakinah pawh kan la sawi fo tlak turin.

Sanga: Engloin a tha ang, mi tibuai ang u.


Midang zawngin: Enga? I mawl ‘mi? Tun laiah arpa pawh an insual duh tawh lo a nia. Changkang lo e mai.(an ti nak nak a)

Sanga: Engtin emaw danglam deuh hlek, hriat reng tlaka hman kan duh chuan mi tibuai ila a tha berin ka hria. Keini thian za ho hi kan inkhawm tlut tlut a, thenkhat phei chuan ‘pa lo hlawm e’ te pawh min tih thin hi. Chuvang chuan kan pa ve zia hi hriattir ngei an ngai a ni.

Liana: Nang hi i ti tak tak roh emawni le?

Sanga: Ti tak tak e,  hriatreng tlak leh sawi hat thamin kan che dawn a lawm. Kan tihbuai tur pawh ka hre sa.

Midang ho: Tu’nge, tu’nge, Tumaw?

Sanga: Nakinah ka hrilh ang che u. Lo ka’ r’u kan inah chhuak phawt ila, kan rel tha dawn nia.

Midang ho: Va ho mai mai thin e, sawi tha mai mai la(tih nak nak pahin an chhuak a)

(Urlawk zan: Hmun pakhatah nula tlangval an lo awmkhawm laih laih a, a then an lam a)

Sawma: Mer, Chicks hi an va la tlem ve..

Mary: An lo la kal dawn chauh a lawm. Drinks kha kan ngah tawk maw?

Sawma: Tam lutuk, Hriata ka dahthattir a lawm.(pindana awm hriata chu koin) Hriata, stock kha rawn phawrh tan la.

Hriata: (In tur vel rawn ken luh pahin) Rm-a rawn hruai saw a va khal hmel ve.

Sawma: Hey, i rilru lo seng buai vak duh suh. Ka hauh daih tawh aw…

Hriata: Naaa, i va duham tak e aw, Dawngi a rawn kal dawn tho sia… Bakah Rm-a saw engtin nge i tih dawn

Mary: Rm-a saw chu ka lo buaipui ve thung  ang e, hahha.(Rm-a chu koin a hui phei a, zu a pe nghal a.)
(Chutih lai chuan kawngka an rawn kik a)

Sawma: Chu chicks an rawn thlen belh a nia, kawngka va hawn teh u.(Kawngka an va hawn chuan Sangate thian za ho an rawn inzui lut a) Hmel ho mai mai chu(h). E’nge maw an rawn tih ve dawn le(ama hriat phak tawk lekin a phun sup a)

Mary: Awi, kan thalai hruaitute teh hlawl chu! Lo kal r’u, engnge in duh ve tehmial a.(Hriata khan an zu um vel a lo thukru deuh tat tat bawk a)

Sawma: Biakin kawng in hai a ni lo maw? Nge biakinah hlimna khawp in hmu ta lo zawk?

 Sanga: A dik ve ve a, a dik lo ve ve bawk.

Rm-a: Pathian thu min rawn barh luih in tum lehpek em ni?

Mawia: Buaina siam turin kan lo kal a ni.

Sawma: (A inlek phek a, pawr fein) Enga i sawi a?

Ruata: Nangmah hi kan tihbuai tum i ni lo.

Liana: Mahse kan tihbuai tum ber chu helaiah hian a awm a ni.

Rm-a: Tumaw, keimah maw?

Sanga: Nangmahni khuahkhirhtu Setana tibuai tur leh chhanchhuak tur che uin heath hian kan lo kal a ni.

Hriata: Kan lawm e, chhan kan ngai lo e.

Ruata: Biakina kan inkhawm hian kan hlim khawp mai, mahse Setana hian keini ho chauh hlim taka kan awm hi pawi a ti lem lo; a chhan chu thalai tam tak a thuhnuaia dah theih a neih tlat vang che u a ni.

Sawma: Chutia biakina in hlim tho chuan va inkhawm mai ula, min rawn tibuai lo hian. In inkhawm lai kan tibuai ngai bik che u em?

Mawia: Nangmahni ni loin nangmahni tibuai tu che u hi a ni kan tihbuai dawn a, kan cho chu ni.

Liana: Ti khan hlim takin awm ula, keini pawh ti hian kan lo tel ve ang e; Mahse Setana a duh anga a chet chu kan phal tur a ni lo ang.

Sanga: Setana hian hlim taka kan awm hi a lo phal khawp mai, Nangni leh keini pawh. Mahse a thik tham, a duh loh zawnga kan awm hi a remti lo mai a ni. Mihring kan nih chuan hlim chu kan duh vek a, mahse kan hlimna hian Pathian nge Setana a tihlawm? Nangni ngei pawh hian in ngaihtuah chian chuan Setana tilawmtu nih tawp mai chu in duh hauh lo ang. Zaninah pawh hian hlim taka awm turin kan duhsak che u a ni, mahse in hlimna kha tu lawmzawng nge tih ngun takin in lo ngaihtuah dawn nia.

Mary: In titha hle mai, awm ve reng ula, eiturte kan siam dawn nia.

Mawia: A chakawm khawp mai, mahse hetianga nangmahni anga hun hmang mek hi engemawzat an awm si a,  kan kal leh zel a ngai a ni.

Ruata: Ti khan hlim tak leh him takin lo hmang rawh u.(An chhuahsan ta dam dam a)

Sawma: Boruak an rawn ti nep vek a lawm, tuiawm loh zo vek.

Rm-a: An thusawi kha a dik ka ti khawp mai.

Hriata: Khatianga an rawn ti ngam hrim hrim kha an fakawm ka ti.

Te-i: Inkhawm tlut tlut ho hian min hmusitin min en liam vel emaw kan tia, kan lo ring dik chiah lo a ni.

Mary: Kei chu an zingah khan kal ve zel ka chak tlat.

Sawma tih loh, midang zawngin: Kei pawh… lo kal r’u zui ve ang u. Hetia awm mai mai ai chuan hlimna tak tak kan nei zawk ang. Party boy Reuben-a te in lamah an kal hrim hrim.(An ti nak nak a, an chhuak ta a)

Sawma: (amahin a thu ngui nghiai a) Kan plan ang chu a va ni lo chiang ve. Hlimna kan zawng a, hlim pawh kan hlim thin. Kha’ng thalai hruaitute khan ka neih loh ang hi e’nge an neih bik le. Hlimna kan duh ve tho an ti a, hlim pawh an hlim ve…. tho. An hlim…, keimah ai hian an lo hlim daih zawk emawni le? Zu leh sa, nulat tlangvalna tel lo hian engtin nge hlim taka an awm theih? Engtin nge kei aia an hlim zawk daih theih le? Zanin ah ngei hian ka zawt chhuak tur a ni.


(A TAWP TA DER MAI. A KHAMAWM LOH HLE MAI)

No comments:

Post a Comment

KRISMAS HLAWHTLING

Short Sermon te, Sermon te Christmas thuchah hrim hrim bakah ṭhalaite chuan Christmas a lo hnaih hian bonus kan dawng ṭhin. Zilhna leh fuihn...