10-06-13: Bawih, hmannia doctor pain a chiu dawn che a, i lo
ngur chher chher kha i la hria em? A hlau lutuk che a, ‘bawihte bawihte’ ka tih
ang deuha pai deuhin ‘boyte boyte’ a tih ve ringawt kha, kan inmelh a, kan
nuihsawh vel kha, kan tawng a hrethiam ve miah silo a tiraw, chiu leh a tum che chuan kan rel vel tawh dawn nia J
Nangmah ang chi naute an rawn hruai kha an chiu khan a tap nasa tiraw, ek te a cheh vel kha, a dawih reuh e. Nang kha chu kan chiutir hmasak ber che pawh khan i khuh kherh kherh ringawt kha a nia, i huaiin i tuarchhel bik e. Khami tum khan ui dang lian pui pui kha an lo kal hnem sia, a te ho kha chuan an hlau a, an mei an khup zul zul hlawm a, nang lah khan ui lian lian kha mei hem vat vat chung khan i pan vel a, keimah zawk khan ka lo hlau zawk mawle.
Hmanniah kan chhuah lamin stray dog pakhat i um vak kha, a tlanchhe nasa tiah tiah tiraw, kan intihtheih dun vel zia kha; Mahse kan haw leh lamin a thiante ho nen min lo hual khup khup mai kha chu a, a chi lo khawp mai. An territory chhungah chuan an inti huai ve riau a, an boss ber ni awm tak phei kha chuan keimah chawp khan min rawn hap a tum a, a khabe ah tak ka’n pet dak awrh kha, khati chung pawh khan an la tlanchhe
Khawlum lutuk vanga i hmul kan met kawng chiah kha chu i inhmeh lo ve khawp mai, a hmu apiang che khan an nuih che a, ‘stray dog a ang’ an ti thul, a then lahin, “in va ti khawngaihthlak tak,” min lo ti vel, a lum i ti lutuk ka khawngaih vang che a mehtir kha kan ni reng sia tiraw. Khatia miin nalh lo tia an nuih luai luai lai che khan ka hmangaihna leh ka duhna che hi a pung thur thur zawkin ka hria, chubakah a hmaa chhuat dai laia bawk phek thler reng kha khum lamah i rawn mu chho ve leh peih ta a, nuam e.
Tu pawh hi i nelin i zuan nghal thuak thuak zel mai a, mi hian an ning ang che tih ka hlau thin. Hmanniah pawh Mizoram House kawtah khan mi pakhatin tui bottle-a a vaw lai che ka rawn hmu hman vuai a, a hmain engtin nge i lo tih ka hre lo; Khatia alo vua che kha ka sa phat a, “engvangin nge i vuak ringawt a?” ka rawn tia, ani khan, “min seh a,” a lo tia, kei lah khan hmu miah si lo khan, “a seh bawk loh che kha,” ka’n ti ve ringawt a, i seh chu ka ring chiah lo a, mahse hetia mi i’n zuan a, i han chhaih vel leh i han liak vel hi ui ngaina lo tan chuan ‘min seh a tum’ tih mai theih tur hi a ni thin a, fimkhur a tha aw, Bawiha.
cd0073l;l;;’(aw… hei i chanchin ka ziak mek a nia, min lo tibuai suh). Thil tih laklawh laia infiam i duh hian a hiahin min rawn hiat vak thin a, ka ban a pilh phung tawh hi. Hahahha, ka type laklawh laiin min lo tibuai chhen a, a hmaiah ka chhem thut a, sin deuhin a bauh a, ‘miau’ a ti a ang lutuk.(kut lehlamin amah chhaih pah a ngai a, kut khingkhatin ka type J)
Tun lai chu bauh ve zeuh zeuh i ching tawh a, ka hau zen zen duh lo che a, mahse zanlai muttui lai tak maia i’n bauh thut mai thin hi chu lungphu i ti thalo ang tih a hlauhawm khawp mai. Tun ni thum chhung vel phei chu duh aiin i bauh ngun mah mah, i bauh zawh chiah lah hian hauh hleihtheih loh tur hian inthlahrun hmel tawkin min rawn melh a, nimin phei kha chuan i chaw ei lai khan i bauh thut a, nangmah pawh kha i inring hman loin ka hria, ka nui tawp. I bauh vak vak chuan thenawm vai hoin an ning ang a, an complaint ang a, min hnawtchhuak daih mai ang, insum hram hram tur aw.
I zawi kan tia, doctor kan entir ve che a, doctor lah chuan harh an lo la ti em em zui che, hahha. Tlema i nguai deuh anga a lan hian ka ngaih a tha lo zel. I muhil tur zawi velte hi ka khawngaih tlat zel che. Harh teh harh teh. J
No comments:
Post a Comment