A changtute: Hmachhuani-
Nula fel
Engzami-
Nula pharvar
Lal
Josh-a: Tlangval theuleu
Ma’ntluangi-
Nula pharvar
Hauthuamluaia-
Ma’ntluangi u tlangval
Pu
Mazara- Hmachhuani pa
(Hmachhuani amahin a lo lang a, hmun a phiatfai vel a)
Hmachhuani: I pianthar a i hlim chuan kut beng rawh. I pianthar a i hlim chuan i
nunin a lantir ang a …….(a zai rat rat a)
Ma’ntluangi: (Lo luh pahin) Awi awi awi Lalhmachhuan, i hla sak mai mai chu(h).
C.R kan nih lai min tihrechhuak; Mahse ka lungleng lo, hmmm, ho e…. Hei zanin chu lo kal ve tawh rawh aw..
Hmachhuani: Awi, min tiphu tep a lawm,
lo leng rawh Ma’ntluang.
Ma’ntluangi: Hmm, ka lo len reng hi…. Mawh, zanin chu lo ‘par’ ve tawh rawh.
Hmachhuani: A.., zanin chu hlazir zan a lawm.
Ma’ntluangi: Ho thei, keipawh ka kal dawn tho chu. I duh chuan hlazir banah
pawh ka rawn lam mai ang che. Athuhrimah
vawikhatmah i lo kal ve duh ngai lo reng
reng, thian tak takah min ngai lo a niang.
Hmachhuani: Awi, Ma’ntluang, chutiang a ni lo. Hei kan inkawm reng a lawm.
Biakin ah te kan inkhawm ho thei a, zaninah pawh hlazirnaah lo kal ve zawk la….
Ma’ntluangi: Naaa, hlazir leh par? Khawi zawk nge ka thlan ang aw, huuuu hu!
Hmachhuani: Athuhrimah in party hian e’nge in tih thin a?
Ma’ntluangi: Hahthlak, kan laaaammmmmm!
Hmachhuani: Hmm, Biakinah i lam ngai bawk si lo a.
Ma’ntluangi: Huiham…! Awi ka phone a
ri(phone a la chhuak a) hallo.
Lal Josh-a: (phone atangin) Yo yo…..
Ma’ntluangi: Awi, thing champ thin lo teh, Lal josh.
Lal josh-a: Khaw’nge i awm a? Pi Manleti dawrah ka rawn kal a, i awm bawk si
lo.
Ma’ntluangi: Hmachhuani te inah ka leng….. E’nge min zawn reng a?
Lal Josh-a: Ka zawng reng bawk lo che. Hmachhuani chu min lo biak teh.
Ma’ntluangi: Hmela, lerh reng reng suh, ka
hnuk ang che aw…
Lal Josh-a: Lo phei vat la a nih chu, ka C.K a ni mai aw…
Ma’ntluangi: I zak chai na nge, ka C.K ve thei reng aw… Min lo nghak ringawt rawh.(Hmachhuani lam
hawi pahin a ding a) Awi, thiannu ka phei phawt mai ang, a lo C.K leh duh tak
tak mai ang. Zanin chu i lo kal lo ang maw?
Hmachhuani: Aw Ma’n, ka lo kal lo phawt
mai ang. Ka pa a nuam bawk si lo a, hlazir ban ve leh haw ka duh. Awi, Lal
josh-a kha Engzami nen khan an inngaizawng emaw ka tia…..
Ma’ntluangi: (Chhuah pahin) Bin theks, hahha. Kan la sawi tha dawn nia, nih
phawt.
Hmachhuani: Aw a nih phawt mai(amahin a phun zui mawlh mawlh a) Aw.. a chang
chuan hriatthiam a va har thin tak em.
Mi chuan hlim deuhin khawvel an chen a, Pathian ngaihsak awmin an awm lo a,
keini aiin an hlim a, keini ai aiin an hrisel zawk bawk si. E’nge hetia tha
deuha lo awm ve ringawt hi a tulna le? (puanzar khar a ni.)
(Engzami leh Lal Josh-a an lo lang a, kalchungin an
titi)
Lal Josh-a: (Lo luh pahin) E’nge Mazara Status kha i like vel kher a?
Engzami: Hmmm, Pathian thu a nih
kha… Ka chang duhlai a nia, ka like ve nih kha. Nang pawh Ma’ntluangi thil post
reng reng i lo like hmasa ber ziah a lawm.
Lal Josh-a: Ka chang duhlai, huu hu….. Ka va’n hrilh ngun tawh che,
Ma’ntluangi te chu naupan tet atanga ka thian a nia, nang chu ka bialnu,
hrethiam em? Khawile muah muah …….(kuah deuh chuk chuk, hehhe)
Engzami: Khawmaw ka ning… (a nui har har a.) Zanin hi khaw’nge kan tih
dawn.
Lal Josh-a: Eng chu maw..?
Engzamai: Mawl suh, Friday Night a nih hi…
Lal Josh-a: Naaa, ka pi damlo riahpui a ngai…….
Engzami: Bum thei, kan thlim che anga a ni mai.
Lal Josh-a: Hei, khatia i tih chuan ka rawn phone chhen ang che.
Engzamai: I pi damlo chu enkawl tha hle la a ni mai, i fel chuan ka la duat
leh ang che(a nui hawr hawr a)
Lal Josh-a: (Phone a chhang a) Hello
Ma’ntluangi: (Lang lo lam atangin) Khaw’nge i awm a, ka rawn phei nghal a, i
awm tawp loh hi.
Lal Josh-a: Hei, ih, ka chhuak leh lawk, aw, ka rawn phei nghal aaang….(phone
a tawp a)
Engzami: Tu’nge a?
Lal Josh-a: Damdawiinah chuan ka kal nghal a ngai a nih chu. Kal pahin ka
thlah phei nghal mai ang che.(an chhuak ta a)
(Ma’ntluangi a lo lang a)
Ma’ntluangi: I pianthar a i hlim chuan kut beng rawh. I pianthar a i hlim chuan
i nunin a lantir ang a ….. awi ka hlasak mai mai chu(h). Hmachhuani vang vek.
(dawhkana phone awm chu a rawn ri a) U, i Phone…………….
Hauthuamluaia: (a lo lut a, phone a la a): Hallo, hallo…. Aw, a tawp hman.
Ma’ntluangi: U, i va thing ve a, engati nge mi pakhatin ka thlalak a lo post
kha i lo like vel a?
Hauthuamluaia: Midum nen in lakdunna kha maw? Nangmah i ni tih ka hre hleinem, ka
zah mahnak laia. Khatiang khan khawilai midum nge i lo lakpui hman a, zahpuiawm
lutuk?
Ma’ntluangi: Hmannia kawmthlangnu panhnah la ka zui khan………
Hauthuamluaia: Silchar-ah khan maw, saaaaala! Silchar-ah panhnah lain vawikhat i
kal ve dek dek a, inkuah chualin midum thla i lakpui nghal a, ‘Mizoram chu kan
thing e, party na tur a vang’ i’n ti vel chhen a, zahthlak lutuk.
Ma’ntluangi: Ninawm min hau reng mai, ka unfriend nghal dawn che.(a chhuak tau
nghawng nghawng a)
Hauthuamluaia: Panhnah la tur te kha i lo zu zui leh ringawt ang e.(amahin a phun
zui a) Tunlai nula ho tak hi chu aw….. An lo in ang vek a nih hi…. Nupui pawh
hi kan nei ngam dawn emawni le, min fawr san reng mai ang tih te pawh a
hlawhawm e a…
Hmachhuani: (kawngka kik pahin) In awm em…?
Hauthuamluaia: Awm e, lo lut rawh u, tu’nge ni?
Hmachhuani: (lo luh pahin) E in awm maw, Thuamluai ‘oh’ U Thuamluai.
Hauthuamluaia: A, in ‘U’ kher a ngai hleinem(a nui vel hak hak a) hei kan awm chu
a nih hi.
Hmachhuani: Ih, buhfaitham ka rawn khawn a..
Hauthuamluaia: E a ni maw, ngawirawh aw.. khaw’nge kan buhfaitham bawm kha a awm
kha le…(ring takin) Mami khaw’nge buhfaitham bawm hi
Ma’ntluangi: (langlo lam atangin) Ka hre mai mai lo, buhfaitham ka ei lohna a
rei tawh.
Hmachhuani: In gas bur sirah khan in dah thinin ka hria.
Hauthuamluaia: (a zawng ruk ruk a) E a nih hi, heta hi a awm e.(buhfaitham an
inpe vel a)
Hmachhuani: A nih ka kal lehnghal mai ang, khawn tur ka la nei a, zanin
hlazirna ah kan inhmu dawn nia.
Hauthuamluaia: Aw a nih phawt le(amahin a phun leh ta bul bul mai) Aw… tun lai
nulate hi an lo in ang vek lo a nih hi. Nupui atana tha tak tak pawh an lo tam
dawn a nih hi..(a harhchhuak thut a) yess, zanin hlazirnaah kan inhmu dawn nia
a ti. (Ring tawkin/ Chhuah pahin) Mami, ka nu, chaw ei ang u, hla zir a ngai a
nia…
(Pu Mazara amahin a lo lang a)
Pu Mazara: I pianthar a i hlim chuan kut beng rawh…. I pianthar a i hlim
chuan i nunin a lantir ang a..(‘hmm hmm’ in a sa hmm hmm a, chutih lai chuan
Hmachhuani a lo lut a)E, mate i khawn zo tawh a ni maw?
Hmachhuani: Aw khawn zo chiah. Pa, i luna chu e’nge a an?
Pu Mazara: A…., a zia deuh a ni mai. Chhuante, ka bulah hian lo thu teh.(Hmachhuani
a thu a) Hei, i nu awm loh a chin chu tihian kan pahnihin kan awm a ni mai a,
kei lah ka chakvak tawh lo si a, hetiang dinhmunah hi chuan mi zah te hi kai a
har a; Amaherawhchu nang i lo fel hlauh a, tihian kan khawsa chho ve zel chu a
nia…
Hmachhuani: Ka pa, e’nge sawi i tum?
Pu Mazara: Ni e, mate tun lai chhanah chuan nula chhuanawm leh fel ber pawl i
ni tih pawh ka hria a; Mahse kha vawiina i thiannu lo lengte kha, in thusawi
leh tawngri kha ka lo hre vek a ni. He khawvelah hian sualna hi a ngampa tawh em
em a, mifel leh mitha te pawh hi a zahin a hlau miah lo a, nangpawhin
fimkhur tak leh Pathian tih taka i nun i
hman hi a pawimawh em em a ni.
Hmachhuani: Ni e ka pa, ka hria a lawm. Ka theih tawk chuan ka nun hi Pathian
tan ka vawng thianghlim ve a sin.
Pu Mazara: Nang ang fanu ka nei che hi ka lawm takzet a ni. Tun lai thalai
nuamtawlna hi chuan rei a daih dawn lo reng reng a, tihian nang chu fel takin
awm la, nakinah Pathianin pasal tha deuh a la pe mai ang che.
Hmachhuani: Pasal neih lampang pawh ka ngaihtuah lo.. Pasal! Awi ka pa zanin
hla zir a ngai, hawh chaw ei tawh ang…(chaw ei turin an chhuak ta a)
(Ma’ntluangi leh Lal Josh-a an lo lang a.)
Ma’ntluangi: Khaw’maw i phone kha lo la teh.
Lal Josh-a: E’nge mawni le…..
Ma’ntluangi: Rawn la ringawt teh. (a phih thlaksak a, a hmet zui mawlh mawlh a)
Awi… Lal Engzami hi thla thum ka be tawh lo i ti maw? En rawh, dialled number
ah a chung berah a awm hi i hmu em? ‘Pi Engi’ tiin i la save zui, ka hrethiam
vekk…. Engzami bulah chuan keipawh hi Pi Tluangi ka ni ang a.. (a tin uaih uaih
a)
Lal Josh-a: Aw… ka pi number min rawn dil a nih kha…..
Ma’ntluangi: Daw suh, ngawi chipcham rawh, ka lip ang che.
(Chutih lai tak chuan Engzami a rawn lut a.)
Engzami: Awi awi awi…………. Lal Joshua, kha kha maw i pi dam lo chu?
Ma’ntluangi: Eng a? Nang hian hetah e’nge rawn tih ve tur i neih a?
Engzami: Nang hian ka bialpa bulah hian e’nge i lo tih zawk a?
Ma’ntluangi: I bialpa maw?
Engzami: Ni e, ka bialpa a nia, kei hi a bialnu ka ni. Zaninah hian a pi
damlo riahpui turin kan inthlahfel deuh chauh a nih kha..
Ma’ntluangi: Kan inthen tawh, thla thum kan inbe tawh lo a tih si. Zaninah pawh
hei a birthday party kan nei dawn mek a nih hi.
Engzami: (inhnit deuh help hlep) ka va’n hrethiam lo ve. Ma’ntluangi chu ka
thiannu, naupan tet atanga ka kawm tawh a nia, nang hi ka bialnu i ni, min ti
bawk si.(Lal Josh-a kawh pahin) Hmel awrh i chak lo ang(a tlan chhuak nghawng
nghawng a)
Ma’ntluangi: (za lo zet a nuih pahin) Naupan tet atanga i thian maw ka nih.
Thla khat pawh kan la inkawm lo in ka hre sia.
Lal Josh-a : Ma’n, min hrethiam rawh, tiang hian ka la awm ngai miah lo a sin…(kuah
mai a tum a)
Ma’ntluangi: (vin tawkin) Min hnaih suh…. (a tlanchhuahsan ve ta daih a)
Lal Josh-a: (amahin): Aw…, hlimawm dawn viau emaw ka tia, ka lo in ngaihtuah
chiang lo a ni(a chhuak ve ta hnu hnu a)
(Hmachhuani leh Hauthuamluaia hlazir bang an lo lang
a)
Hauthuamluaia: Zanin kan hla zir thar chu a nalh reuh khawp mai ti raw….
Hmachhuani: Engtin maw i tih?
Hauthuamluaia: Zanin i kawr hak chu i inhmeh khawp mai.
Hmachhuani: Hehe, i va’n tilawmawm.(sawi zui mai tur an van dun hle)
Hauthuamluaia: I pa chu e’nge a an deuh
tawh a?
Hmachhuani: A zia a ni mai, a lu saw na a ti leh riau thin a. Lo kan ve la(a
nui vei hman hman a)
Hauthuamluaia: Thingpuite kan hlawh dawn te chuan……
Hmachhuani: Tehreng mai, lo kal rawh, hei kan thleng a ni mai a
lawm(thuthlenga thuin an inrem fel a)
Hauthuamluaia: Ti daih ila vawiin tlai i lo kal hma leh ilo kal hnu khan ka rilru
a inthlak hlawk a sin.
Hmachhuani: Awi engtin, Buhfaitham lamah thahnem i ngai ta deuh em ni?
Hauthuamluaia: Naaa, chutiang lam a ni lo… I lo kal hma lawk khan ka nau ka lo
zilh a, kan naute pawh hetiang hi an nia,
tun lai nula zingah hian nupui tlak pawh an awm tawh dawn lo a nih hi,
tih rilrute ka lo pu hman a.
Hmachhuani: Chuan….
Hauthuamluaia: I lo lan takah khan tunhma a(chutih lai tak chuan Pu Mazara a rawn
lut a)
Pu Mazara: E, Mamte in lo bang tawh a ni maw, Tu’nge ni i thianpa chu?
Hmachhuani: Aw, hei kan lo thleng
chiah. Hau ‘oh’ U Thuamluaia a nih hi.
Pu Mazara: E, a ni maw, ka lo enchiang mang hleinem.
Hauthuamluaia: Pu Mazar, kha i lo thochhuak peih a ni maw? E’nge i an a?
Pu Mazara: Hei ka tha e, ka han indim rih deuh mai mai a nia. I va fel ve,
kha i lo len a.
Hmachhuani: Nia a hranpaa intlawh hi a har a, hei zanin chu hlazir banah ka rawn rim ‘oh’ ka rawn tlawh ve thei hram
che a nih hi.
Pu Mazara: A lawmawm nasa a nih chu. Hei nangni chu kan thalaiah pawh a kul
ataia inhmang leh mifel in ni a, Matei pawh hi ka hrilh fo thin. Sualna hi a
ngampa tawh si a, mifel tak takte pawh hian fimkhur leh Pathian tih taka nun in
hman a ngai takzet a ni. Pathian hriat loh chuan hlimna tluantling hi a awm lo
reng reng tih hi hriat tlat tur a nia.
Hauthuamluaia: A dik khawp mai, Setana hian kohhran hruaitute Pathian
rawngbawltute pawh hi a hlau lo, an inchhungkhur thlengin a luhchilh zel mai
zawng a nih hi.
Hmachhuani: Thingpui ka va lum ang e aw..
Pu Mazara: Ngawi teh, keichu ka mu mai ang e, ka la indim loh chuan.. Tikhan
lo inkawm tawh u.(a chhuak a)
Hauthuamluaia: A nih leh le, i tha leh thuai ang chu. (Hmachhuani lam hawi pahin)
Thingpui chu lum lo mai rawh.
Hmachhuani: Engati maw, thingpui in chakin i lo leng emaw tia?
Hauthuamluaia: Nichina ka sawi lai kha…
Hmachhuani: Eng maw(a ti hu a) E, ka hre leh si, engtin nge i rilru chu i
thlak a?
Hauthuamluaia: Hmachhuan, hei engemawchen chu thalaiah te rawng kan lo bawl hoin
kan lo inhrechiang sa viau a; Mahse vawiin tlaia i lo lan takah khan, ih,
englo, tunhmaa ka la en ngai loh ang chein ka lo en ta tlat che a, nula zingah
nupui tlak an awm tawh lo hial tura ka ngai kha ka lo tidik lo a ni tih ka
inhrechhuak .
Hmachhuani: E’nge i sawi awmzia chu?
Hauthuamluaia: Aw…., nangmah hi nupui tlak chu i ni tih ka hrechhuaaaakk,
tunhmain hetiang zawng hian ka lo la en ngai lo che a.
Hmachhuani: Awi, aaaaa, nangma nupui
turin maw?(a lai kual vel)
Hauthuamluaia: Hmachhuan, i pa sawi ang khan hei thalai, mi ngaih ah chuan mifel
tak anga lang kan ni ve mai a; Mahse Setana hian min thlem ve reng a, kei hian
khawilai khawvel nula emaw va ngaizawng ta i la ka insum thei bik kher lo ang.
Nangpawhin chutiang chiah chuan thlemna hrang hrang i tawk ve thei a ni…..
Chuvang chuan ih, Hma, kan thlemna hi in dopui tawn turin kan pahnih hian tangrualin,
ih, inkawp mai ila tiin ka sawm duh che a ni.(tren trennnn)
Hmachhuani: Ih, U Thuam, nia, ka pa sawi ang khan kei chu thianghlim tak leh
Pathian tih reng chunga hun hman hian hlima tluantling min thlen ang tih hi ka
ring tlat a. Chutianga ka bulah englai pawha thianghlim tak leh inthlahdah loa
Pathian i tih reng theih dawn chuan i sawmna chu, ih… ka pawm thei ang.(weinch)
Hauthuamluaia: Ka va lawm em, Hmachhuan.
Pathian hre reng chungin hun hmang ila, nakinah chhungkaw hlimtak ka la din
dawn nia aw…(han inkuah deuh vang vang mahse a pawi lem dawn emawni le.. heheh)
Hei, a lo tlai leh duai tawh mai, thingpui pawh ka in tawh lo mai ang, thingpui
aia hlu ka in tawh tho. A nih phawt le…
Hmachhuani: Chuti teh thut tur maw, a nih, tawngtaina ah kan inhre reng dawn
nia. Mangtha tha le..(amahin) aw Lalpa, nangmah nena kaldun zel dan tur min
hrilh ang che.(mu turin a chhuak ve ta a)
THLA 3 HNU AH CHUAN……
(Pu Mazara amahin a lo lang a.)
Pu Mazara: I pianthar a i hlim chuan kut beng rawh…. I pianthar a i hlim
chuan i nunin a lantir ang a..(‘hmm hmm’ in a rawn sa lut hmm hmm a) Mate, khaw’nge i awm… lo kal lawk tehhhh…
Hmachhuani: Aw, pa heta hi ka awm(a rawn lut a)
Pu Mazara: Mate, lo thu teh(a thut fel chuan) Hei naute ena ka en lai chein
pasal nei rual ilo ni ve reng tawh mai.
Nizana kan Palai inleng neih chungchangte pawh kha sawidun ila ka ti a ni. Amah
Hauthuama pawh hi tlangval fel leh Pathian tih mi tak a niin ka hria a, a kawm
pawh in inkawmngeih viau a ni lo’m ni?
Hmachhuani: Ni e pa, kan inkawmngeihin kan inngaina khawp mai. Pathian ka
rinna kawnga min tichaktu leh minpui theitu tur niin ka hria a. Ih…
Pu Mazara: Chu ngei chu ka duhthusam a ni, mate, ka chhuang khawp mai che, i
that lai hunte thianghlim takin i hmang a, tunah chuan Pathianin pasal tha tak
a pe dawn ta che a ni. Palai lo kal leh hunah chuan kan sawi rem thei tawh ang
chu. Khaw’nge i ni te inah ka va leng ang e.(a chhuak ta a)
(Hmachhuani’n thil vel a remfel lain Ma’ntluangi a lo
lut a)
Ma’ntluangi: Awi thiannu, ka U i ni tep tawh
Hmachhuani: A, miin an hria ang e.
Ma’ntluangi: Hmm, an la hre vek dawn tho a lawm.(Thutak zawkin) Thiannu, kei chu
ka rilru a hah e mai….
Hmachhuani: E’nge ni ta, Ma’ntluang?
Ma’ntluangi: Bad news pathum a awm..
Hmachhuani: Eng?
Ma’ntluangi: Lal Josh-a leh Engzami kha an lo la inthen tawp hleinem, a rukin a lo kawp char char a, Engzami chuan
Lal Josh-a fa a pai.
Hmachhuani: Aw, a va zia lo ve thiannu; Mahse i tan chuan thenna hun tha a ni
mai lo’m ni.
Ma’ntluangi: Mahse…
Hmachhuani: E’nge mahse?
Ma’ntluangi: Thiannu, Lal Josh-a fa chu
ka lo pai ve tho sia lawm…. Chu aia rilru hahna pawh a la awm, a va hrehawm tak
em….
Hmachhuani: E’nge la ni cheu….
Ma’ntluangi: (thutak lehzual zawkin/ insut deuh hruih hruih pawh a pawi lo) Lal
Josh-a kha HIV positive a nia.
Hmachhuani: (chi-ai)E’nge awmzia, chutiang a ni thei dawn em ni?
Ma’ntluangi: Ni e, thudik a ni ngei a lawm. Thiannu, hlimna hi a va rei lo tak
em.. Kei aia hlim kha an awm ka ring ngai lo a; Mahse tunah chuan kei aia
lungngai hi an awm bik dawn em ni. Thiannu, nang chu pasal i nei ang a, i la
hlim dawn chauh a ni si a, hmanah khan mawl ka lo ti thin che a, keimah hi a
mawl zawk chu ka lo nih hi.
Hmachhuani: Thiannu, beidawng lutuk mah ta che, Pathian chuan tunah ngei pawh
khan a la pawm duh reng che a lawm. Ni e, he khawvel hlimna hi chuan rei a daih
thei lo reng a ni. Mahse A lami hawi a, i inchhir chuan Ani’n a lo pawm leh
ngei ang che.
Ma’ntluangi: ’ Intihhlimna chang pawh hre lo, mawl lutuk’ kan lo tithin che a;
Mahse hlimna tluantling chu i lo nei zawk reng si a nih hi. Khawngaihtakin min
tawngtaisak ta che….(Hetih lai hian pawn lam atangin heihi chhiar tur, a
chhiartu hi mipa ni thei se, aw thum lampang per chhuaih lo, aw thum tliang
deuh: He khawvelah hian hlimna zawngin i
tlan thin maw? Hlimna chu i hmu ngei ang; Mahse chu hlimna chuan chatuan a daih
lo a, he khawvel awmchhung pawh hi a daih hek lo. Hlimna zawnga i tlan a nih
chuan hlimna tluantling Lal Isua hnenah hian rawn tlan lut ve ta che…)
Chuan midang ho zawng kha rawn lut se, I pianthar a i hlim chuan tih hla kha action
nen sak ni se, hit viau ang
I peih mai mai mang e aw hahahaha a ngaihnawm hrep lehnghala :) hairehai
ReplyDeleteHaha, ka peih lo(hman lo) chung chung kan kohhran thalai hoin intihsiakna ami tur, tiin min rawn ziahtit a, an intihsiakna tur an thulh leh sia, blog cheimawi na'n ka hmang ta mai.
Deletechhiar ve chiah...ngaihnawm leh pek e..
ReplyDeleteThnx, U sate...
Delete