VAWIIN TLAI KA RILRU (Kuthlei thil) !

Thut ngawt ngawt aiah chhu zawt zawt mai ang. Ka chanchinbu chhiar tur lah chu crossword an thai duh avangin an la bo ta daih lehnghal a, mikhual an lo la thleng lo bawk nen, tihtur chai a awm lo.

High School kan kal lai khan ka lehkhazir peihlo hian hetianga thu ho tak tak, engmah ngaihtuah lawk pawh awmlo a ziah vel mai mia hi  ka ching thin a, nuam ka ti phian. Kum engemaw zat chu ka lo chawlhsan  tawh a, hei tunah ka chhunzawm leh ta  a ni- a  nawm dan  a lo la ngai reng mai.

Khatih lai, lehkhazir peihloh vanga
ka thaikual vel mai mia lai kha chuan  a tlangpuiin zan  a ni thin a, thla a en loh pawhin  arsi a pe iar a, lei hrik a hram chiah chiah bawk thin a, kha’ng  vel sep rawtui chung khan ka ziak thin a ni a; Tunah erawh chuan  tlai khaw uap deuh churh hnuaiah , vaiho an ui ke tang chiau vak vakna karah Mizoram House Ballygunge reception counter-a thu chungin ka ziak a ni.

Nichin lawk khan hmeichhe pa sarih an lo thleng a,  khum ruak awm tawh miahlo chungin kan han hnawh lut leh hram a nih kha- thil mak pawh va ni suh. Miin, “chhuatah tal kan mu mai ang, kalna tur dang kan hre chuanglo”, an tih tlat chuan tihngaihna a vang thin hle reng a ni.

Hetiang hunah hian kan Care taker kalchhuak ta Pu Do-a kha ka ngai thin. Keini’n rem ngaihna thlawt kan hriat tawh loh ho, bungrua nena kawta an thut nghuk lai pawh khan nui sungin a vei turh turh thei reng mai a. Chutah phone call a’n dawng ngei a, airport atangin emaw, train station atangin emaw an rawn bia ni ngei tur a ni. An han inbia an han inbia a, a tawpah chuan, “lo phei phawt ula, kan inhnawh nawk nawk thei mai ang” kha a ti leh duam thin. Engtin chuan a hnawh dawn ni maw tia ka lo thlir laiin zan lamah hi chuan engtin tin emawni an in lamah te riah tirin a remfel ve leh mai thin bawk a,  ka fakin ka ngai thin ngawt mai.

Khualbuk han nghah chawt takah chuan Isua pian laia khualbuk vengtu te nen te khan achang chuan kan lo intehkhin ru leh veng veng thin nia. Josefa leh Mari a lo hnar mai te pawh kha demawm lutuk lohin ka’n hre vei thul.

A chang chuan a buaithlak reuh thin- Room leh Dorm zawng zawngah kan inhnawhkhat tawh a,  chutih laiin mikhual an lo thlen belh leh a, kan lo chhanna tur chu thlenna tur a awmloh thu kha a ni mai a,; Mahse engtin tin emaw pute an han bia a, khawi khawiah emaw a awmsa te sawn in an lo ruahmansak leh a, a tira lo hmachhawna thlenna tur a awmloh thu lo hrilhtu kha chu misual melhin min melh tawh mai thin a, nuam duh vaklo. Hetiang letling deuh chiah- a awl reng emaw kan tih a kan pek, lo awl leh ta si lo (ang) te pawh hi thil nuam  a ni lo.

Chuvangin keini ang duangin khum ruak  a awm, kan tih ve ngawt te kha a lo ruak miahlo thei a, a khat vek tawh, kan tih hnu ah pawh a lo la thlen belh teuh theih thin a lo nia. Mi vengva chin tan chuan min kal pelha a thu hmel deuh biak chat kha a fuh zawk maithei!

Hei tunah tlai lam dar 5 a ri leh tep tawh a, mikhual hi an rawn in-pangawzial tup tup ang nge, khawvar lam arsi ang pheuh pheuhin an rawn lang dawn, tih lah hriatlawk a ni lo a, a hnuhnung zawk khi chu duhthusam zawk chu a ni lo thei lo.

Thil dang daih- Kumin chu khawlum lutuk kha a reilo a,  zia khawp mai, ruahtui tam vang emawni dawn ni, achhan lampang chu ka hrelo a, mahse ka lawm a ni. Hei tunah pawh a la uap deuh nain  a thlasik khua  ve deuh tawh a, fan pawh on loin ka thu mai mai thei a ni.

Nakin lawkah mikhual an lo thleng leh ang a, drugs addict piangthar hlim emawni, rui polite emawni zawk te khan lo luh pahin Gate duty-te kha an chibai ang a, God bless you te kha an han ti thla ve leh zen ang a. A then lah sumdawng nu awng deuh liai luai, in hnawih paw tak tak kha an ni ang a, zawi deuh sapa khawiah nge savawm kan hmuh theih ang, ti tawk an awm laiin room-ah beer min serve thei em, rawn ti lawng lawng tawk pawh an awm leh ngei ang. Chumi sirah chuan sum neih vang ni miah lo, bazar tur leh nuamchen tura helai rawn kal an ni lo tih hriat hliah hliah, an hmel en mai pawha vairam chu sawi loh Aizawl pawh an kal zen zenlo ang tih hriat theih mai tur ang chi te kha  inthlahrung takin an lo ding khawr ve hlan ang a. A inthlahrunglo hoin engkim an tihkhalh zung zung ang a, kei lah chuan ka lo thlir liam leh vel mai mai emaw a ni leh bawk ang a, kan va mihringin kan va mihringlo hlawm thin tak em.

Sawlai putarte kuhva zuar pawh sawn a kuhva zawrh an dawr thin dan atang ringawt pawhin mizo mizia tamtak chu na hre ve tawh ngei ang; Mahse tunah tak saw chuan chutiang lam a ngaihtuahlo tih ka hre chiang. Niminah zurui chungin a duty a, bonus a dawng hlak a, tunah sawn zu a in chak bawk si, a in ngam bawk si lo a nih hlan hlan saw. Amah lah saw a tar tawhin a chaklo ve tawh sia, a khur deuh der der reng lehnghal a, ka khawngaih reuh e.

Awi awi awi, mi pakhatin Catherine-i ta tur vawksa rep a rawn dah. Catherine-i hi ka hmelhriat a lo ni lo chu a va pawi em, ka hmelhriat chu ni se a vawksa rep hi ka ei pui chiang ang chu, hmmm.

He nu ham ham chu leh! Dorm lo deuh a awm em, pawisa(room rent) chu a harsa lo a, a ti ham ham mai, ka’n chhang lawks/........... Ha haha, pawisa i ngah tho chuan five star velah thleng mai la, ka ti tep a ni.. Lungawi tak chuan chhuata mu turin a inziaklut ve leh mai bawk a.

Chhota Das-a hi engemaw a ziah le, ti niawm takin min rawn bih duk duk mai, kei lah chuan ka lo hup vel. Hup lo mah i la a hrethiam awm chai si lo a, hahhahha.

Chaklo tein fan ka on lawk, a lum lo a, a uap tlat. Ka zun lah chu a chhuak em em a, ka zun a chhuah ang huin zunin lam ka hawilo, zunin lam ka hawiloh ngaihtuahin ka rilru ah a lian, ka rilrua a len ngaihtuahin ka ziak ho, ka ziah hoh ang huin ka la thutak, ka lak thutak ngaihtuahin ka hmel a uang, ka hmel a uan ngaihtuahin ka hirha lo, ka hirha loh ang huin ka inkhawm thatchhia, hmmm, zung phawt ang.

Office chhung chu Pu Roy-a meizial rim hlirin a khat, toilet lah Das-a ek rim a lo nam huam bawk a, thawpik thlak.

Nizan vaiho diwali thil hal khu lutuk vangin ka hritlang zual leh deuh, ka khuh kherh kherh reng mai. Nizan khan Mizoramah vaihoin an hal ve ang em le? Kumhlui thlahzan vela hal hi an khap nasa sia, an khap loh chuan  thenkhatin, “vaiho pawh chuti khati”, an ti leh ngei ang. Kei chu hal nge hal loh tih lamah chuan ka buai vak lo. An haldan kalphung, a hmun hma vel hi a pawimawhin ka hria.

E taka, vawiin hi Ballygunge dry day a ni tak e, park Circus va kal zuai a ngai dawn a ni maw, pawilo exer tlem lak hlek a ni mai. Kal pahin puchka ka ei nghal bawk ang a,  remchana ka lei a ni zel mai ang chu.

Hmeichhe hmeltha ve deuh, ha bal deuh, sahdah heh hmel deuh a lo kal, kekawrbul chhing tawk a la ha zui. Vai hoin pawngsual ta se ka chhan lo ang chu ka ti lo a,; Mahse lo pawngsual ta pawh nise thil inhmeh tak a ni, ka ti ang. Kan incheidan hi kan fimkhur thlawt lo.

A va buaithlak thin tak, pre-paid taxi an la a; Mahse extra a dil belh a nih pek chu, ka’n sawipui chiam a,  cheng 30 chuan a tihniam ve leh mai bawk a,. Ka tanpui pa kha cheng 30 ka pe tihna a ni deuh mai (em le).

Chhota Das-a’n vaihla a ngaithla riai riai mai, eh riai riai tih chuan  a nalh hmel ve lutuk,  a ngaithla chhuai chhuai mai, dishoom dishoom.

Helai vawksa rep mawlh hi a ni mit la mai mai reuh chu, min ko hle mai. Bondel bazar ami Rajak-a zikhlum ngei mai nen khan chhum pawlh i la. Tomoto rawt nen a thau hi hmet kawi bawk i la, chaw rum deuh theh thawh nen, awi, ka tuar zo dawn lo!

Einj, hemi te pahnih hi an inngaizawng ta a ni chiang mai. Damlo rawn kalpui ve ve an nia, an awmna  a rei tawh a, an lo innelin an lo inhmelduh chho ta  a nih dawn hi. Kolkata an lo kal hma chuan apiang ve tih pawh an inhre awm si lo a, khuanu samsuih an ni ang em le, engmah lah hi kan hre si lo a. Tukin ka thawh hlim kha chuan vawiin tlaiah hian hetiang thu ropui hi ka ziak chhuak ag tih pawh ka hriat bik loh kha, hmmmmmmmmm!