Ka thu leh hla thenkhat ka vawmkhawmna hmun a ni. I peih chuan chhiar ve ta che.

Wednesday 23 May 2012

Zalenna(ekzam kan zo, huuuuu hu)



                Zalenna hi eng nen nge tehkhin chi ni ang aw? Tui tla, thih mai hmabak,  thawpik vek tawh emaw thawklehkhata chhanchhuah thut nen hian a dinhmun a in ang ang em? Vanneihthlak takin he dinhmunah hian ka la ding lo a, ka sawi thei mai lo. A nih leh thang-awk talchhuak dinhmun nen te hian in ang tak ang maw, hemi thu ah pawh hian thangah ka la awh miau loh avangin ka hrethiam hauh pek lo mai.
                Thil pakhat ka hriat chu rei tawh tak maiah khan a ni…..
                Engtik lai maha chanchinthar ngaithla ngai reng reng lo khan ‘chanchinthar ngaihthlak zawha lehkhazir chauh tur’ tih thurin nei ang hrim khan kan han ngaithla ve dauh dauh phawt a, a va han ngaihnawm duh thin em. Sunday zanah phei chuan bonus a la awm zui- chhungte inkhawm tur an chhuak sap sap a, lehkhazir chhuanlamin inah kan han awm ve a, chanchinthar an puang zo a, bonus-ah fiamthu in a rawn zui zat a, zir a har thin ngei! Nia, exam lai chuan vai lam te kha mittla lo chauhin kan thlir thin a nih tak kha.

                Kumtluana kan zir ni lo, kumtluana kan ah avanga chul ve rup tawh kan lehkhabu kha ekzam dawnah kan han sam ve nuap nuap a, pentuisena ‘PM’ tih kan lo chhinchhiah ve nialnual kha kan han zir a, a chang leh ‘pm(pawimawh)’ tih kan lo ziah tawh naah te khan lian tawkin OMIT tih kan han ziah hnan leh kuau a- a pawi ta ber chu kan OMIT kha kan ekzam zawhna siamtu lamin min rawn pawmpuia min rawn hriatpui ve ta thin lo kha a ni.
                Eng ang pawhin zir tlemin thiam tlem mah i la, ekzam boruak khan min phuar ve em em a, kan ekzam zo chu lehpek awm chuang lo lek khan kan thawveng tawh thin- kha kha a ni zalenna ka hriat ve chu.
                Ka hriatchhuah leh tak chu
                Hun engemawchen chawlh vang vang hnuah ekzam ka’n bei ve leh a, ka lehkha han zirte chu ka naupan laia ka thatchhiat ngai reng khan ka la thatchhia tithe ka hmuchhuak a, lunghnur tak a ruangin ka’n lungleng hlauh a! Tichuan tlemte thiam a tamtak ziah tumin tun ni nga kal ta chhung khan ekzam hall ka lut ve nitin a, vawiin(23-05-12) khan ka lo zo fel ve ta a. Ekzam hall atanga ka chhuak chiah chu naupan laia kan ekzam zo hlim kan thawven theih zia leh kan zalen theih zia kha ka ngaihtuah chhuak a, ka ngaihtuahchhuah nachhan chu ka ekzam zawh chiah vang leh hmana kan boruak tawn thin ang zalenna them kha ka dawn tel deuh vang a ni.
                (Ziah thui duah a chakawm viau nain ka zalenna ka hman sual hmain duhtawk hrih ang)

1 comment:

KRISMAS HLAWHTLING

Short Sermon te, Sermon te Christmas thuchah hrim hrim bakah ṭhalaite chuan Christmas a lo hnaih hian bonus kan dawng ṭhin. Zilhna leh fuihn...