Ka thu leh hla thenkhat ka vawmkhawmna hmun a ni. I peih chuan chhiar ve ta che.

Friday 6 April 2012

Keimah Isua



 “Kei Isua pawl, kei Isua pawl, Isua lama ka tan loh chuan ka tel duh lo. Isua pawla tan ka duh ber”

Khi  khi kum engemawzat liam ta, Good Friday tlai lam inkhawm bana Darlawng khaw naupang ho au dan a ni. E, Darlawng khawtlangah Isua lal ber rawh se’ ti te pawhin an au tak e.
              
Good Friday leh Easter Sunday hmang turin Darlawngah kan kal a, drama kan chang a- Isua an khengbet lai vel kha. Kei chu Isua lemah ka tang a
ni. Tlai lamah naupang ho nen kan infiam a, Cricket te kan khel ho a, a chunga ka han ziahlan tak khi kan boruak tawn vel chu a ni.
        
Kumin Good Friday zing ka tho chuan thil tamtak ka ngaihtuah a, ‘Passion of the Christ’ a lo chhuak fuh kher nen kum dangGood Friday a ka hun lo hman ve tawh dante ka chhuikir a, lung a leng rum rum mai.
           
Rawlthar thianzaho, harh leh chimawm rual kha kan ni a, thalai pawla kan tel tantirh kum a ni. Good Friday drama chang turin keini ho kha min thlang ve a, kei ber kha Isua lema chang turin min han ruat ta mauh mai a. Khami tuma ka lawm zia leh ka huphurh si zia kha.
          
Kan thianzaho ah ka hmelchhe ber a, ka zeiloin nula lamah phei chuan ka tla na lo ber a, Isua an khenbeh laia a sira lo tapder vel tura min thlan ka lo ring a; Mahse a changtupa ber dinhmun changtur khan min thlang ta tlat si a, nuam hrehawm ve tak chu a ni.
         
Chumi zana ka haw chu nasa takin ka inngaihtuah a, ‘Isua lema chang tlak hi ka ni reng em, engvangin nge min thlangtute hian min thlan? Ka nungchangte ka han ngaihtuah let a,  Isua lema chang tlak pawh hi niin ka inhre lo.
         
Han chham kual vel duah dan kha ka thiam lo, ‘I lema chang tura thlan ka ni a, keimah ka inen hi chuan, ka nungchang en hi chuan, ka ang lo sa phawt che; Mahse keimah ah hian nangmah lo lang ang che’
          
Khitiang deuh khian ka tawngtai ve tlut tlut  mai a ni.
         
Tichuan kan Biak Inah kan han chang ta a, nu ho an tap nasa ta mai. Easter Sunday-ah min request leh a, Easter-ah pawh chuan kan la inkhengbet ta chawt chawt a nih chu.

Tichuan a kum leh Darlawnga kan Corps thalaiin Good Friday kan han hman tumin kan chang leh ta a, hemi tum phei hi chuan hrenpereng nen chiah tak tak hian Darlawng khawlaiah Rome sipai hoin min vaw thal nasa mai a, ka pilh phengphung mai, bei nasa ve tak chu kan ni.

Chumi kum leh chiah chu a ni em kha aw, diary en loh chuan ka hre ta lo. Shillong-ah khi lemchan ngai bawk khi kan chang leh a, saruakin ka zu zangphar leh zawr bawk a ni. Hemi tum phei hi chuan nu pakhat hian kan chan zawhah tihtakzetin min rawn belchiang, ‘i na lo maw, i na miah lo maw’ a rawn tichiam mai a, ang ve fu ni tur a ni.

Khi’ng khi a nia, Good Friday a lo thlen apianga ka la ngaihtuah chhuah ziah chu. Kan channa hmun apiangah khan a tla na em em zel niin ka hria.

Kei mi tling lo leh laktlak loh takin khatianga ka changchhuak ve thei mai kha ka ngaihtuahin tun ang teh awra ka la chapo loh  vang kha a ni ta awm e!          
          


8 comments:

  1. ka chhiar chak bawk a, chhiar man a awm kher mai, chapo teh awrh tawh lo turin ka duhsak a che. VNH :)

    ReplyDelete
    Replies
    1. I va han tilawmawm teh awrh ve, madam!

      Delete
  2. A ngaihnawmin chhiar a nuam kher mai.

    ReplyDelete
    Replies
    1. Ts, min lo chhiarsak thin a, ka lawm e.

      Delete
  3. Kan thianzaho ah ka
    hmelchhe ber a, ka zeiloin
    nula lamah phei chuan ka tla
    na lo ber ''

    i chapo teh awr loh hi a......nge tunah i lo hmel a tha tawh deuh i tihna zawk??
    lol


    i ziak thiam kher mai, KZP KZP

    ReplyDelete
    Replies
    1. Ka lawm e. Hmel hi chu a tha hawrh reng mai, hehhe

      Delete
  4. I drama chan lai vel chuan ka awmlo remchang zel a.mahse,a taka rawn hmu ve ang tho niin ka inhria.i ziak tawi fel fiah famkim kuk mai.

    ReplyDelete
  5. Thu ziak i va thiam em,mitthla ah inchang lai awm vel te a ngaih ruat thei alawm.

    ReplyDelete

KRISMAS HLAWHTLING

Short Sermon te, Sermon te Christmas thuchah hrim hrim bakah ṭhalaite chuan Christmas a lo hnaih hian bonus kan dawng ṭhin. Zilhna leh fuihn...