Tuesday, 7 February 2012

Roll n0-13

            A hma pawh khan ka hmu fo che a, tleirawl chhe lo ve pangngai tak i ni tih bak kha ka lo ngaihven ngai lo; Mahse vawiina tui in tura i thiannu nen  min rawn kalpelh paha kan mit leh mit a intawn atang khan nangmahah khan englo a awm tih ka hria in ka hria, keimaha englo a awm vang zawk pawh a ni maithei. Khawiah emaw chuan engemaw chu a awm chiang a lawm.
1st Day(wednesday):Khawi sikulah emawni pawl engemaw zat kan zir kum a nih kha. Kan section a inang lo a, kan room piaha tui inna awmah khan tui in turin in lo phei thin a, vawiina i lo phei ka lo thlir lai che khan ka rilruah englo a lo awm thar ta. Chu englo chu nangmahah pawh a awm ve ngeiin ka ring, min rawn melh pah khan i nui deuh seih
tlat. Ka ngaihtuah let a, mawl ka inti hle- hmanni pawh khan step a ka tlusual lai min lo nuih ver ver tawh a, ka lo hrethiam lo a ni. Khatih lai te pawh khan nangmahah chuan englo a lo awm sa reng tawh a ni awm sia, zei lo min lo ti awm; Mahse vawiinah chuan ka hrethiam ve ta.  Chawhnu short break kan neih laiin nangmahin i lo phei a, nitin i tihdan pangngai a ni tih lam ka ngaihtuah lo, keimah hmu tura lo phei i ni tih ka ring nghet hmiah. Tukverhah bawk ti tihin ka rawn dak chhuak a, i lo hawi, ka nuih theihnghilh. I liam hnua i tukhum lama ka nuih mawizia kha min han hmu tak la aw… Mahse a hun lai khan ka lai lutuk a, ka lo nui hman lo a ni.
I romol eng hum chunga i phei kha mawi fahranin ka nuih che a sin- ka nui rei lo mai pawh a. In class room i luh dawnah khan  nui ar ar chungin mipa i be ta tlat a. Ka rilruah englo a lo awm leh ta, ka hriat ngai loh englo chu. A hmaa englo nen khan a inang lo, tuna englo hi chu thikthu a ni tlat. Nia, kha pa kha ka thik lutuk a sin, nangmah mitthla ka tum che pawhin kha pa bawk kha ka hmu leh thin. Geography-a ka thiam sa pawh ka theihnghilh vek a, ka stay back phah- kut insuih rialin kan haw dun ang chu tih ka lo suangtuah laiin.
Sikul ban veleh kan veng a mi ka thianpa, in section a awm te inah ka kal kawi nghal a, i hming ka zawt a, ‘tumaw, kan class-ah hmeltha an awm lo’ a lo ti. Baksam kir deuh, nui mawi tak, biangsum nei, fel hmel deuh, ka tih pawhin a hre thei lo. Ka hria tih pawh ka hriat lohin i mit veilam sir chung deuha khuavang i neih chu ka hrechhuak, ka thianpa chu a ngawi vang vang a, ‘roll no-13 kha a nih dawn chu’ a ti. I hming chu ka la hre ta lo phawt.
2nd Day: Nidangah chuan drill ni a nih loh chuan ka pheikhawk te hi ka nawt mai mai ngai lo; Mahse drill aia pawimawh a awm tlat, hma tawkah ka tho a, ka uniform ka buatsaih a, ka pheikhawk pawh a tle tha kher mai.
Devotion naah tlar hnung lam atangin ka rawn thlek vak vak che a, ka hmu mai thei lo che. Tawngtai laiin ka meng ru a, ding kang deuh ur ur chungin ka rawn zawng che a, tlar hma ber dawttuah ka hmu che, sam tawnna senin i sam i tawn. Drill ni a nih loh vangin sam tawnna dum kher i hmang peih vel lo tih ka hrethiam mai. I mizia ni tura ka rin chu ka lawm reuh tawp a, keimahin ka nui vur vur mai.
Short break-ah tui in tura in lo phei lo biak ngei che tumin ka lo ding chhuak a, i rawn chhuak phei miah lo. Nimina i biakpa pawh kha ka hmu miah lo a, class chhungah in thu dun ang a….. ka ngaihtuah zui ngam lo. I hmel mitthla ka tum a, ka thianpa hmel te a lo lang daih a, beidawng deuhin class-ah ka lut.
Lunch break-ah kan chhuak chiah tih in canteen-a i lut tur ka rawn hmu vuai che. Riltam tak leh nangmah hmu chak tak chung chein ka rawn lut ve ngam lo. I hmuh laia thil han ei vel kha ka zak tlat a lawm. Lunch break chhung zawng kan class kawtah ka ding a, canteen lam ka rawn hawi thla reng a, dar rik hnuah pawh i lo chhuak lai ka hmu miah lo; Mahse nimina i biakpa kha in class kawtah a vei a vei ka hmu a, ka ngaih chu a tha ve deuh ringawt!
Zan ka mut hmunah ka biak dan tur che leh ka sawi tur ka ngaihtuah nasa lutuk a, ka muhil thei lo. Zing lamah ka lo chhing sek a, ka mumangah zawng lianpuiin a lo man che a, ka lo tlanchhiatsan daih che. Ka harh hlawl a, a tak tak ni ta se ka tlanchhiatsan tho che ang em, tih te ka ngaihtuah mai mai.
3rd Day: Beidawnna leh phurna rilru inchawhpawlh nuaihin sikul ka thleng a, tui in tura in lo phei thin hun angah khan i thiannu chauh a lo phei. Tui intur kengin a lo let leh a, min zah vangin i rawn phei hreh ang a, i thiannu tui i suahtir vel a nih ka ring a, keimahin ka nui suk mai.
Lunch break-ah ka thianpain, ‘roll no-13 kha a pum a na a, a haw’, tiin min hrilh a, ka chhan dan ka hre tawh lo.
6th Day:Nimin leh nimin piah kha Inrinni leh chawlhni a nih vangin   school kan chawl a, ka ngai thei lutuk che. Min ngai ve dawn em a ka hriat avangin ka khawngaih hle bawk che, vawiinah chuan hlim takin ka siam tawh ang che bawihte……. School rawn kal la chu!
Ka nghak che a, ka nghak reng che a sin. I tui inna no tur te ka lo silfai lawk thin a, midangin an rawn hmang bal leh zel a nia.
Kar tluanin i rawn kal lo. Kum chanve chhung kha i awm leh awm loh hre miah loin sikul ka lo kai thin a, tunah chuan kar khat hi nangmah vangin a rei thei hle, tih ka hre ta. I thiannu ka zawt ang a, i dam lo a nih pawhin in inah tal ka rawn zawng chhuak ang che, tia rilru ka siam laiin ka thianpain, ‘ news kha i hria em’ a rawn ti lawng lawng a, phur lo deuh a eng thil nge tih ka zawh chuan phur fe in. ‘roll no-13 kha’ a ti leh ringawt a, thil awmzia ka zawt a, min han hrilh chiana ka chhan dan kha ka hre mumal tawh lo.
13th Day: School kawtah kan drill thap thap a, chumi zawh ah zirtirtute’n uniform an rawn check, sir in ka zawn a rawn thlen chuan, ‘ i pheikhawk a va khawro em em ve, i tin a sei bawk si, engvangin nge i kawr te hi i nawh mam loh’ a ti tun tun a, kei chuan zawi sapin, ‘ka star an ru daih a’ ka lo ti!

3 comments:

  1. Van ngaihnawm reuh eeee..kan school kal lai min ti hrechhuak.Star deuh kan biak ngam si loh an hmel kan hmuh a kan lungawi ve em2 lai te kha...

    ReplyDelete