Friday, 3 June 2011

TUKIN KA RILRU.

        Vawiin chu khua a lum lehpek hle mai. Khaw vawt nuam tak kan beisei ngamlo chung leh khaw lum tuar tura kan inring sa deuh chung pawh hian duh ai chuan a lum mah mah zel mai zawng a nih hi. Hetianga a'n lum huam huam chang hi chuan kan naupan lai (ehh) kuthleiin thingkung kan lo kih ve ringawt te kha ka inchhir ve tep thin.
        Hetianga tun ang huna khua a'n lum viau hi chuan kan beisei neih chhun chu 'ruahsur se aw' tih hi a ni mai a. Chupawh chu kan khawvel sik leh sa buai zo tawh ah hian kan beisei thlawn fo mai. A dur khup khup a, a uap em em a, a veng leh duak a, a lum leh em em thin.
Lal hmei ang mai kan lo inring thlawn ve fo mai zawng a nih hi. Mahse upa pawhin khawchin leh nau chin chu hriat a ni lo an lo tih ve bawk kha.
      Hetiang teh hrepa khua a'n lum a, a'n uap tak tak hi chuan ramngaw leh nungcha humhalhna lama ka thawhhlawkloh zia ka ngaihtuah a, ka insit thar leh fo mai. Ramsa te hi a sa tui ti viau mah i la humhalh an lo va pawimawh em, ka ti deuh.
      Ka tum loh lamah ka pakai ta daih a. Hetia khaw lum ning a khawvawt kan thlakhlelh lai leh ruahsur ve tawh se aw, tia duhthu kan sam kan sam lai hian hmanni tlaia ka thil hmuh khan ka rilru a la peng nasa hle mai.
     Tlai thim hlim velah ruah baw hawk a rawn tla a, hna a tranga ka chhuak fel deuh chiah a ni a, tawmhulna zawngin ka tlana, chutih lai tak chuan ka sir thlang lampangah hian kutdawh pitar kebai, chak tawhlo tak mai hi hmun hul lam panin a rawn tawlh trawk tawk a, a tunu niawm tak hmeichhe naupang fere tak mai hian a rawn kai a. Kha thil khan ka rilru a khawih hle mai.
     Duhthu te kan sam a, ruahsur se aw, tiin kan iak kan iak a, mahse henglai khawlai kawngsira riak mai mai tan hi chuan malsawm ruah a ni ve hlek dawn loin ka hre ta.
     Ka ngaihtuah thui ta zel a, ruah a'n sur nasat a, tui a tlin nasat lai te hian khawiah nge an riah tak ang. Milian  leh neinung deuh ho lah hian ui tlukah pawh an ngai si lo. Hetiang ruah sur nasat nikhua hian an bathlar velah ui lo awm nise an hnawt kher lo ang a, mahse, he'ng kutdawh ho tan hi chuan an phal ngai miah lo. An hnawtchhuak rang thei khawp. A vawm hialin zu vawm duh a! An mihring puite an ni reng si a, siamtu'n duh taka a siam ve tho te chu.
    Hetiang vel hi tukin tuk puma ka ngaihtuahna luahtu chu a ni, nakin ah famkim deuh zawkin ziah ka la tum ang- ka rilru a khawih hle si a....

No comments:

Post a Comment