PATHIAN HNAIH

 Jakoba 4:8 Pathian hnaih rawh u; tichuan, anin a hnaih ang che u. Mi sualte u, in kutte sil fai rawh u; rilru bulbâl nei lote u, in thinlung tithianghlim rawh u.

Pathian kan hnaih dan tur kawng hrang hrang sawi tur a awm thei ang, tun ṭumah chuan he’ng Pathian hnaih dan kawng 3-  taksaa Pathian hnaih, thil tih hmanga Pathian hnaih leh thinlunga Pathian hnaih tihte hi i lo enho dawn teh ang.

KAN TAKSAIN PATHIAN KAN HNAIH TUR A NI: Kan taksain Pathian a hnaih theih dan awlsam tak kan hriat sa vek chu Pathian biakbuka inkhawm ṭhin  hi a ni mai. Mi ṭhenkhatin  ‘Biakin chauh hi Pathian biakna tur a ni lo,  thinlung lam hi a pawimawh zawk’ an ti ṭhin; chu chu thu dik em em mai a ni, amaherawhchu miin Pathian biakbuka inkhawm sawi hnawmna atana hetiang thu hi a sawi a sawi a nih chuan a sawitu chu han belchiang ila en reng reng pawha taksa leh thinlunga Pathian  hnaih lo a ni tih hriat deuh an lo ni duh khawp. Kal bu deuh luk luk chunga, ‘inkhawm inkhawm a ni lo, thinlung lam a pawimawh zawk’ ti chi hi veng tinah kan kawl furin ka ring

.  Mahni ṭheuh lo inen ta ila, hrisel lohna leh engemaw vanga in lama theih tawpa Pathian pawl ṭhinte kan nih ngawt loh chuan ‘ka inkhawm thatchhiat deuh lai khan Pathian ka hnaih zawk’  ti chu kan vang viau maithei. Chuvangin Pathian hnaih tur chuan a step hmasa berah kan taksa hian a hnaih ve phawt a ṭha a ni.

          An sawi ṭhin hi kan hre maithei a, ‘naupangte hi an tet laia biakina an bengchhen loh chuan an len hnuah khawlaiah an bengchheng duh lutuk’ an tih hi. Naupan lai aṭanga biakina inkhawm ngai lo chuan an len hunah Pathian hnaih lo zawng leh chanchin nalh loh deuh deuh  nei zawngin an khawsa chho duh tihna a nih hmel.

Chuvang chuan, rinna lama kan dinhmun chu eng pawh lo ni sela Pathian biakbuka inkhawm hi kan theih tawkin i ngaipawimawh zel phawt mai teh ang u, vanrama seat kan chan phah theihna tur chhandamna chhar chhuahna chance hi biakin ah a tam a ni.

THIL TIHIN PATHIAN HNAIH RAWH : A dawt leh ah chuan thil tihin Pathian kan hnaih tur a ni. Thil tiha Pathian kan hnaih theihna tur awlsam takte chu bible chhiar leh ṭawngṭai tam a ni leh mai. Ringtu piangthar, Krista zuitu inti ve si hi Amah kan hnaih reng theihna tura thil ṭul em em mai Bible chhiar leh ṭawngṭai thlahthlam tak tak kan tam viau maithei.

Kan Pathian lehkhabu kan chhiar peih loh leh kan zir peih loh lutuk avang hian zirtirna dik tawk lo leng vel lakahte kan chiai a, kan buai ṭhin a ni. Engtin nge bible in a sawi tih hre turin kan chhiarin kan zir peih ṭhin lo a, chu chuan Pathian thu tak lam aṭangin min pawt hla fo ṭhin. Kan innghahna Bible hi chhiar ngun peih ila, thu thang vel mai mai leh zirtirna mak leh diklote’n min tichiaiin min hruai bo lo ang a, Pathian hnaihin kan awm reng thei dawn a ni.

Pawimawh em em chu tihtakzeta ṭawngṭaia Pathian chibai buk ṭhin hi a ni, thil dil ringawt lo deuh, Amah biaa, lawmthute hrilh leh pawla hun hman ṭhin hian Pathian chu hnaih a lo awl khawp mai. Chutiang tur chuan kan hun tam zawk thil tiha Pathian hnaih thei turin Bible chhiar leh ṭawngṭai i uar lehzual ang u. Mahnia awm a, hun awl neih lai hian thil ṭha lo ngaihtuah leh suangtuah a awl khawp mai, chu thil ṭha lo lama kan rilru a kalna tur hun ṭha tak chu thil ṭha zawk tihna remchangah han hmang hlauh mai ila Pathian chu kan hnaih leh zual sawt thei dawn a lo ni.

THINLUNG LAMA PATHIAN HNAIH : Inkhawm peih lem lo leh bible chhiara ṭawngṭai peih lem lote pawhin a ṭha a ni tih kan pawm tlan vek chu thinlung lama Pathian hnaih hi a ni. Thinlung lama Pathian hnaih chu a ṭha a ni tih kan hriain kan pawm tlang vek a, a nih leh engtin nge kan thinlung chuan Pathian kan hnaih theih ang? Kawng tam tak a awm thei ang a; Mahse tun ṭumah chuan inngaihtlawmna leh Pathian rin tlatna  te chiah hi lo sawi ila.

Pathian hnaih theihna atana pawimawh tak chu thinlunga  inngaihtlawmna hi a ni. Pathian hnaih tih hi Hebrai ṭawng chuan ‘Qirabat Elohim’ a ni a. Chuti chuan,  Jakoba bung 4 naa ‘Pathian hnaih rawh u’ a tih hi mihringte chaklo kan ni a, ṭanpui ngai leh puih ngai kan ni tih inhriaa inngaitlawm tak chunga Pathian beiseia va pan leh a laka va tluk luh hi a kawk e’ an ti a ni.

Naupang Sunday School kan kal lai, primary department vel kan nih lai a ni tain ka hria, Evangelist pakhat Pi Vanlalnghaki, a hun laia lar deuh kha rei tawk kan ruai a, kan khawtlang kha min chiah hneh khawp mai a, naupang te te pawh khan kan rilruin Pathian thu lam a hawi ṭhup mai a, mahni rualpui te tete nen ṭawngṭai rualna hunte hmangin kan vak ve del del ṭhin, khatih lai, Pathian lama kan rilru a hawi ṭhup laia kan nuna langsar tak pakhat chu inngaihtlawmna nun a ni. Naupang te te pawh khan thiam leh thiam loin kan practice ve nasa a, ka la hriat reng chu vawi khat chu kan awm khawm leh tel tel a, kan zinga lian ber leh huai ber khan, “kan ṭhianzahoah hian ka dawih ber,” a’n tiah, chutah midang khan, “keimah ka dawih ber,” an ti nghal sap sap a, a tawpah kei khan, “ka dawih ber,” ka’n ti ve a, min en deuh ṭhap a, an han inenkual leh a, kei kha a tak takah pawh ka lo dawih ber tak tak sia, “e, nang chu, a takah i dawih ber sa a, tun aṭang chuan a huai ber ni tawh rawh,” min tia, ka hnial ngam ta hlawm lo a ni. Chutiang deuh chuan Pathian hnaihtute thinlungah hi chuan engtin emaw tak inngaihtlawmna hi hmuh turin a awm zel niin a lang a. Mi chapo takte hi Pathian thuawih tak leh hnaih tak an nih rin a harsa ṭhin.

Mihring hian chau thei kan ni tih hi kan inhriat a ngai a, chu kan chau thei a ni tih inhriatna thinlung inngaitlawm aṭang chuan Pathian kan mamawhzia inhriain Amah kan hnaih theih phah ṭhin a lo ni.

Hla phuahtuin, “Ram tiam lam panin chak lo tak chungin nitin ka kal a,” a tih ang deuhhlek khan chak lo tak chung leh chau tak chung pawha Pathian phatsan loa rin tlat hi a pawimawh hle a ni. Mihring nunah chauhna te, rinhlelhna te a lo thleng ṭhin. Kan nunah hian beidawn rum rumna te kan tawk vek tawhin ka ring. Harsatna leh beidawnna karah pawh Pathian ring tlat thei nih a pawimawh hle mai. Joba ang kha kan ni thei chiah lo a nih pawhin Joba khan harsatna leh chhiatna namen lo tawk chung pawh khan Pathian a ring tlat a ni tih tal hi hre reng ila, min tichaktu a ni thei awm e.

Sam 73:28 ‘Kei atan erawh zawng Pathian hnaih hi a ṭha a ni; Lalpa Pathian chu ka inhumhimnaah ka hmang a, A hnathawh zawng zawng thu chu ka hrilh theih nan.’

(February, 2018 a ka Sermon atangin a tlangpui ka la chhuak a ni)