Ka thu leh hla thenkhat ka vawmkhawmna hmun a ni. I peih chuan chhiar ve ta che.

Friday 28 December 2012

Masi titi nawi


 Masi titi nawi

Thuhmahruai: Second hand kawrlum phiar, a hmaphel ngat kan va thing a,  cheng hnih velin kan han dawn hniam a, nuam kan va’n ti. Lungawi takin bus-ah kan han chuang haw vau vau a,  zan inkhawmnaa hak hun tur leh min lo thlir kiautu turte hmel nen kan mitthla rauh rauh tawh mai thin a ni.

Kan awmkhawm tel tel a, kan tleh del del a, Biakinah bawk kan lutkhawm leh dial thin kha a ni a. Kha vang kha a ni ta ang, naupan lai Krismas kha a lo nuam bik e, kan tih fo nachhan pawh hi. Kum a lo pung ve zel a, tleh del del lo a, kal fal nelh nelh te nuam kan lo tih tak hnua kan hlimna  hian kan pan lai Masi hlimna  kha a tluk thei meuh lo.

MASI KHAWHAR: Urlawk zanah dar 12 a ri tawh a, haw loh chuan ka pi Khumi’n min lo thlir min lo thlir tawh dawn tih kan hre bawk si. Kan han haw  a, kan veng kawngpui chhuk vel chu a khawharthlak tawk lekin a lo la reh lo a, a then an lo thim thiap tawh laiin a then an lo la ri laih laih a; Rilru khawlai lama la awm deuh run chungin kan han mu a, thlanmual tlang velah ri lang lang tawk an la awm bakah khawilai atangin emaw ring lutuk si lo, lung tileng tawk velin Krismas hla play ri a lo ri riai riai bawk a, hetiang hunah hian a khawharthlakin a lunglenthlak ka ti thin. Thiante kha engtin tak awmzui ang maw, tih mai mai te hi ngaihtuah veng veng awl tak a ni- nain eng thil ropui tak an tih bik hi ka ring lo leh hnuhnawh; Kan awm ho laiin kan che ropui lo thei e mai. Khai mah aw…

Saturday 15 December 2012

Ka Kalkat



Reilote emaw tih chhungin kumpuisul engemawzat a lo vei ve ta reng a; Thlenthlak tirha rawlthar sa pan thler thlawr ni thin kha T-Shirt hma a lo puar ta luah bawk nen, tleirawl tawih deuh leh hmuh taih ve deuh ho pawhin min U ta vek mai! Hmelin a zir loh vang leh hmulphurh chhiat vang nge, u Lalpaa boitlung te, u Aluaia te ho bula ka awm tam vangin ka senior hmel zawk tih pawh ka hrethiam tawh bik lo e.
Thlawk tep : Pawl ruk kan zir kum khan lengpui thlawhna tumhmun tur an laih zawl  en turin kan sikul naupang ho kha kal turin kan inbuatsaih a, kan phur hle; Mahse kal dawn tepah pawl sarih naupang ho chauh kal an phal leh ta si a, kan kal ve ta lo. Chumi atanga kum sawm a ral hnu, thlawhna chu sawi loh, a tumhmun ringawt pawh hi damchhungin kan hmu dawn lo a nih hi, ka tih rilruk tawh hnuah hmana kal ve an phal lohna lengpui airport ngei mai chu ka pan ve ta chhak chhak a, thlawhna tak taka chuang tur lehnghalin!

Thursday 22 November 2012

Kum hnih

(Facebook-a kan group 'Mawlhmuar' kum hnih tlin champha puala ka ziah hi dah mai mai teh ang. A hrethiam lo tan chuan a ho ang chu :P)




Mawlhmuar hi mihring chu nise  nausen lawmawm tak, ṭawngthei ṭantir ang vel hi a ni tawh dawn tihna a ni a, duat leh dawm a mamawh hun laitak pawh a ni awm e.(weinj)
Ka facebook khawih ṭantir ve kha thiam ka nei tlemin ṭhian lah ka la nei mang bawk si lo a, zir chawp ti tihin ‘poker’ an tih chu ka’n khel ve chhin a, ka inchhir ngai lohna tur leh ṭhian ṭha tamtak min pe tu thil ṭha ka ti a lo ni reng mai.

Saturday 27 October 2012

HMEI


“I hrelo maw, helai building-ah hian kum thum chuang in khawsa a ni a, engtin nge i hriat loh theih?” Muantea chuan thinrim tak leh rinhlelhna mitmeng nen a thianpa chu a chhukmelh run a. Ani, a thianpa Isaka lah chu a Muantea ai mah chuan a beidawngin a hlauthawng tih a hmelah a lang reng mai. A chala thlan bawl tawk tawk chu huih fai pahin, “ka hre lo, ka hrelo takzet a ni, fiamthuin ‘khulai flat khu a hrang a ni hrim hrim ang, an luah reilo thei e mai’ kan ti mai mai thin a, tuma’n thutak a nih pawh kan ring chuang lo..,” a ti bah niaih a.

2006, kum tir lamah khan Muantea chuan a zirna chhunzawm turin Kolkata khawpui a pan ve a, chutia hmundanga lehkha a han zir ve tur chu a phurin a hlim hle a, a hlim nachhan ber chu he khawpuiah hian a nun tihlim em em tu, krismas laia a tawn thar kha a awm tlat a ni. Phone bill pawh a heklo deuh ang chu.

Numami chu nula lerh a ni lo a, an venga a thiante phei chuan ngaihzawng neih nachang pawh hrelo, an ti fo thin. Mahse mihring pangngai, hmeichhe pangngai rilru pu a ni a, mipa ngaihsakna rilru nei miahlo chu a ni bik lo. Weekend ah thiante rualin hostel atanga chhuah phalna a’n la ve ngei a, a thiante ho chu an bialpa emaw, bialpa chiahlo an hmelhriat thar te emaw ina an riah bo laiin Mizoram House Girls dorm-ah a hun a hmangral bik ziah a, hrehawm tih chang a ngah ve thin.

Thursday 4 October 2012

Zawlkhawhermawii

Ka mitin hai tep che mahse ka thinlung hian a lo la hai lo khawp mai che. Kan intawh dawn khan ka kawchhunga naute, hmana che thin kha a che leh ta dat a! Ka mit zawng dem thei ka ni bik lo,  kum sawm chuang fe hnu ah chuan i sakhmel pawh a lo dang ve ta deuh; Mahse nangmah kha i la ni reng si a.
 
Khatih lai kha, ni e, khatih lai kan high sikul kal lai kha mitthlaah a lo lang thar leh uar uar a. Nangmah mitthla reng chunga ‘Zawlkhawhermawii’ tih hla zir manhla ka tih thinzia tak kha aw… Ka suangtuahna ramah khan vawi engzat fakau nge ka fawh che ka hre seng ta lo. A pawi ta ber chu ka fawh lai che i  hre ve ngailo leh min fawp let ve lo thin kha a ni.

Tunah chuan i tleirawl hmel duhawm tak leh biang tai tek te kha nula puitling hmelin a lo thlak ta a, kan intawh dawn a, lai kimki chawih chawih chunga min rawn sir nuih thin lai  ang nilo khan nulain tlangval an melh dan pangngaiin min nuih seih a, i lo la nui mawi ngang mai lehnghal a- Ka chhe leh ta.

Saturday 18 August 2012

Tuikhur lui


Tun angin miin phone an la lek sup sup lo a, facebook te phei chu a siamtute pawhin a hming pawh an la phuah lo ang.  Computer hming kan lamrik awm ka hre ngai lo a, thirhipthei erawh chu kan hria.  Thirhipthei chuan thir a hip thin a, perek hlui, tuihawk luankawr ami te kan hip chhuak nelh nelh thin. Tuihawk luankawra perek ringawt kan khamkhawp loh chinah tuikhur luiah kan kal leh nge nge thin.
Khatih lai khan kan tan chuan tuikhur lui chu lui pui tak mai a ni a, kan lui neih chhun a ni bawk. Mualpui lui, chite lui leh sihpui lui te kal rual kan la ni lo. A bul vel chu a tawn tawnin a la ngaw a, thingkung lian tak takin a hual vel a, kan kal chang chuan lasi te ramhuai te pawh kan hmu thin. Chu’ng kan ramhuai hmuhte chu a kal ve lo hnenah kan sawi a, ngaihnawm ti em em in an ngaithla a, kan kal loh tum a nih chuan a kalte chuan an hmuhdan chu a hmaa kan hmuh ang deuh  chiah chiahin an han sawi a, keini chuan hlau leh ngaihnawm ti takin kan lo ngaithla ve leh mai thin.
Lui pui tak mai a nih avangin a hnar atanga a mawng thleng zawhchhuak thei nih kha thil ropui tak

Monday 6 August 2012

Hlimna tluantling






A changtute:      Hmachhuani- Nula fel
                                Engzami- Nula pharvar
                                Lal Josh-a: Tlangval theuleu
                                Ma’ntluangi- Nula pharvar
                                Hauthuamluaia- Ma’ntluangi u tlangval
                                Pu Mazara- Hmachhuani pa

(Hmachhuani amahin a lo lang a, hmun a phiatfai vel a)

Hmachhuani: I pianthar a i hlim chuan kut beng rawh. I pianthar a i hlim chuan i nunin a lantir ang a …….(a zai rat rat a)

Ma’ntluangi: (Lo luh pahin) Awi awi awi Lalhmachhuan, i hla sak mai mai chu(h). C.R kan nih lai min tihrechhuak; Mahse ka lungleng lo, hmmm, ho e….  Hei zanin chu lo kal ve tawh rawh aw..

Hmachhuani: Awi,  min tiphu tep a lawm, lo leng rawh Ma’ntluang.

Ma’ntluangi: Hmm, ka lo len reng hi…. Mawh, zanin chu lo ‘par’ ve tawh rawh.

Hmachhuani: A.., zanin chu hlazir zan a lawm.

Ma’ntluangi: Ho thei, keipawh ka kal dawn tho chu. I duh chuan hlazir banah pawh ka rawn lam mai ang che.  Athuhrimah vawikhatmah  i lo kal ve duh ngai lo reng reng, thian tak takah min ngai lo a niang.

Hmachhuani: Awi, Ma’ntluang, chutiang a ni lo. Hei kan inkawm reng a lawm. Biakin ah te kan inkhawm ho thei a, zaninah pawh hlazirnaah lo kal ve zawk la….

Ma’ntluangi: Naaa, hlazir leh par? Khawi zawk nge ka thlan ang aw, huuuu hu!

Friday 3 August 2012

Fur khawthiang


                                                              



           Chawhma lama ruahsur vangin kawng leh khawlai vel a diak chiau pur a, kezungpui kara chirhdiak  rap chawr ngoh ngoh chungin daihnai luite kan pan a, chawtlang leh chi hraw keih pawlh bawrh bawrh chungin tlai hlauh vang ni miah lo khan hmanhmawh em emin kan tawlhthlu thla zawt zawt a, dawntial leh nghate chhaiin tlaini kan vuiliam ve leh mai thin.
           Tlaiah thosilen chhia leh eng eng emaw hmanga  kan nghate man chu kan han insem ve ngei mai a. Mi pali velin sangha te takte te panga vel theuha kan insem kha chuan hlawhtling kan inti ve em em a, kawtchhuahah hlado chham em lo mah i la, a kal ve lote bula insawitheih kha nuam kan ti thin ngei.
          Engemaw changa kan sangha man, zana kan han kang khawm hluai mai te kha chu ropui ve thin tak zawng a ni. Zankhat U Buata te ina kan sanghate leh chakai vel kan kanro rim kha ka hnarah hian a la cham fo thin.
           A chang leh rawtuai khawrh tur kan zawng a, mi rawtuai kan khawrh ru emaw kan tihte kha kan huan chhung ami te a lo ni a! Vangvat leh thosi karah khan kan ei duh vang leh tui kan tih vang ni miah lo khan thiam leh thiam loin rawtuai nge mautuai tih pawhkan hriat loh kha kan han khawrh a, hnuai lamah vangvatin puar lung khawpamin lo zuk laiin lu lamah thosi a lo ‘vi’ ve reng bawk a, thosi seh nge thak vangvat zukna tih ngaihtuah hman lo lekin kan kut me in nghawng vel kan han hiat ngei mai a, a va vual tha duh thin tak.
            Tlai haw pahin hlum so kan hual kha kan han cho haw ngei mai a, ngaih a thain lung a va awi thin em. Zanriah eikhamah thereng man tur zawngin kan tlan kawi zawr zawr a, phingphihlip a chhuah hlauh phei chuan dam man a awmin lawm kha a va kim thin em.
             Hun liamin kum a vei a, kan dawntial man thinna luite te chu luikawr a lo chang zo ta a, vangvat hmuh lohna pawh a kum a kum a lo ni ta. Rawtuai kan hmuhte pawh naupan lai hmuh ang kha ni ta lo riau te’n kan hria a. Leilung mawina thlir hman lo leka buaiin kan hmanhlel a, zotuithiang luan lohna hmunah riahrun kan lo rem ta bawk.
             Mahse thildanglam ve lo pakhat a lo awm a- ka hmuh khat leh khat loh ah a buai lo a, ka ngaihven leh ngaihven loh a ngaihtuah hek lo. Amahin a hunte ah a nihna angin a lo la inherchhuak reng thin.
          Chu thil hmana kan pan lai nun min hriatchhuahtir zawktu leh hun engemawchen ka hriat tawh loh ‘lunglenna rau’ min rawn pe thar lehtu chu lungchim takin ka thlir vawng  vawng a, “aw fur khawthiang, Mizoram a ni emaw, vairam a ni emaw i mawina leh duhawmna hi a kiam chuang lo a nih hi,” ka ti ta a ni.
         

Friday 6 July 2012

Khengbettu diktak



Isua Krista chu nang leh kei min chhandam turin kan sualna leh bawhchhiatna avangin hrehawm tinreng tuarin kalvari tlangah khenbehin a lo awm tawh. I nundan leh chetziain Isua tawrhna chu i belhchhahin  nangmah ngeiin Isua chu i khengbet nawn fo thin tih i hria em?

(Tlangval pathum an lo lang a)
Tlangval 1: Ninawm e……, inla strick vel hlawm lutuk a

Tlangval 2: Engtikahmah an tireh tak tak chuang lo ang. Ho eeeeeee mai a, an peih reih tak tak    chuang awm lo e mai.

Tlangval 3: A ninawm a nih hi, ti r’u hetilaiah hian i thu phawt teh ang
u.

(Nula pahnih- Rosy leh Bti an lo lut a)

Tlangval 1: Rosy, i inkhawm dawn e law?

Rosy: Ka inkhawm dawn a, min hmuh reng hi.

Monday 18 June 2012

DUMDUMTEA


                                    
Changtute:       
                          Dumdumtea: (gold fish tlangval)
                          Senpuii: (gold fish nula)
                          Buanga: (chawngzawng)
                          Minglim: (nghalim nula)

Senpuii: Awi ka ning lutuk, hetiang bur chep lutuka inkhung reng hi. Kan tui lah hi hei an rawn thlak theihngilh lehpek dawn a niang, ka ning ka ning ka ning….

Dumdumtea: Sp, tuar hram hram teh, an la rawn thlak ve mai ang. Chubakah kan awmna hi sawisel fo tur pawh a ni lem lo, keimahni tan liau liau a siam a nia, a hmingah pawh sap hming ngat a nia an phuah, hetiang hi nungcha dangte hian an nei ve miah hleinem.

Senpuii: Hmm, eng saphming mah a nei lo ang, palang khawrpum chep lutuk a nih hi.

Dumdumtea: A nei a lawm, fish bowl an tia, hetiang hi nungcha dangin anmahni pualin an nei ve miah hleinem.

Senpuii: Ho lutuk, fit bol e bol lo e; Keichu sangha ka nia, luia awm tur ka ni. Tlanchhuah dan ngaihtuah ang.

Dumdumtea: Bawih, khawngaihtakin khatiang khan tawng tawh suh. Khawiahmah kan chhuak thei lo a, chhuak tur pawh kan ni lo. Hei min neitupa hian min duat em em a, nitin chaw tha tak tak min pe reng a, hetah chuan sangha lian leh ral lakah kan him bawk si, chhuah thu chu sawi tawh lul suh.

Senpuii: D, enteh kan chhuak ngei tur a ni,  heta tang hian kan chhuak ang a, lui nuam deuh ah kan pahnihin kan liluh dun vel thin

Wednesday 23 May 2012

Zalenna(ekzam kan zo, huuuuu hu)



                Zalenna hi eng nen nge tehkhin chi ni ang aw? Tui tla, thih mai hmabak,  thawpik vek tawh emaw thawklehkhata chhanchhuah thut nen hian a dinhmun a in ang ang em? Vanneihthlak takin he dinhmunah hian ka la ding lo a, ka sawi thei mai lo. A nih leh thang-awk talchhuak dinhmun nen te hian in ang tak ang maw, hemi thu ah pawh hian thangah ka la awh miau loh avangin ka hrethiam hauh pek lo mai.
                Thil pakhat ka hriat chu rei tawh tak maiah khan a ni…..
                Engtik lai maha chanchinthar ngaithla ngai reng reng lo khan ‘chanchinthar ngaihthlak zawha lehkhazir chauh tur’ tih thurin nei ang hrim khan kan han ngaithla ve dauh dauh phawt a, a va han ngaihnawm duh thin em. Sunday zanah phei chuan bonus a la awm zui- chhungte inkhawm tur an chhuak sap sap a, lehkhazir chhuanlamin inah kan han awm ve a, chanchinthar an puang zo a, bonus-ah fiamthu in a rawn zui zat a, zir a har thin ngei! Nia, exam lai chuan vai lam te kha mittla lo chauhin kan thlir thin a nih tak kha.

Saturday 21 April 2012

Ehem Chhass



“Sawlaia mi sawn min lo biak rawh, a ti”
“A hnap a nih mai chu a!”
Mi angin ‘ngei ngei tlang’ te nei ve lem lo mah i la, ,Mualpui tlang leh Suankual tlangah khan kan che ve hle thin; Sunday tlaiah phei chuan kan kal ngei ngei.
Thianzaho kan inzui tham tham a, hausak deuh tlai chuan wai wai bawm kan ak lang tat thin. Chutah keimahni ang rual vel bawk tleirawl thianzaho an lo kal ve dal dal bawk a. Kan han melh kual dan dan a, duhzawng kan hmuh fuh chuan, ‘zui ang’ tih kha a ni leh tawp mai.
Khatih lai khan keini ang rual leh keini aia upa deuh tawhte ah pawh khan inchhai tan dan style dang tehchiam kha awm hek lo, Mualpui tlang atanga Suankual tlang thleng kan zui chuan Thiani te ho pawhin engemaw  ‘awm’ a awm a ni tih an lo hre ve thuai a, ralrelin an inhrilhru tan sep sep mai. Keini lam pawh kan awm mai mai bik lo, eng ralthuam nge kan hman ang, kan sipai zingah hian tu’nge ral do tura kan tirhchhuah ang, tih relin kan inrawnkhawm ve mam mam reng bawk a. Hetianga mahni buai buaia buai chung hian mit lam indawrna chu nasa takin a kal mup mup reng bawk a, nuam thei mup mup ngei.
Kan lo rel lawk tawh angin thianite zinga a hmeltha ber chu tu emaw ber tan kan va ‘biak’

Friday 6 April 2012

Keimah Isua



 “Kei Isua pawl, kei Isua pawl, Isua lama ka tan loh chuan ka tel duh lo. Isua pawla tan ka duh ber”

Khi  khi kum engemawzat liam ta, Good Friday tlai lam inkhawm bana Darlawng khaw naupang ho au dan a ni. E, Darlawng khawtlangah Isua lal ber rawh se’ ti te pawhin an au tak e.
              
Good Friday leh Easter Sunday hmang turin Darlawngah kan kal a, drama kan chang a- Isua an khengbet lai vel kha. Kei chu Isua lemah ka tang a

Monday 26 March 2012

KA THIANPA


Buai hnu a piang a ni tih zawng chauh hi sawi teh ang- a dang nen. A tarmit vuah power tam zia nge kan sawi hmasak anga a tarmit hnuaia a men dan, tih pawh hi ngaihtuah fe tham a ni. En thuak chuan pro pastor, nupui la hmu lawk lo tur hmel hi a pu a. En chian chuan a biangsum puar pep a a nui lai te pawh a hmuh theih thin. A biangsum hi khuar loa a puar tlat nachhan hi ama sawi dan chuan an makpa a chhun a ni awm e; Mahse a hrechiang te chuan a thil in thin vang a nih an ring deuh zawk.
Mi angin chanchin ropui sawi tur leh chhuan tur a nei lo a, thiamna lamah belh tlak a ni hek lo. A chanchin sawi tur awmchhun chu a chetchhiatna leh a chet thin thu tih vel chauh hi a ni awm e; Mahse amahah hian chhuanawm tih leh ngaihsan deuhna lai ka nei a, a chanchin ka ziahna chhan tak pawh hi a ni. Chu a chanchin chhuanawm ve deuh chu englai pawha a hlim reng mai leh

Wednesday 29 February 2012

Mera Fiamthu

❤ Driver senior tawh deuh pakhat hian a nupui damdawiinah a kalpui a, doctor-te chuan zai a ngaih tur thu an lo hrilh a; An haw lam chuan an vengte'n engnge in an a, an lo ti sap sap a, chupa chuan 'a engine down a ngai', a ti hmuk!

❤ Hman lai hian mawm: Pasaltha rualkhat hi an ramchhuak a, sai padawp lian zet mai hi an kap a, sawi ve reng rengah tiin a pum chuan tuaingawt tiat lekin an rep sawng a, a hang

Tuesday 7 February 2012

Roll n0-13

            A hma pawh khan ka hmu fo che a, tleirawl chhe lo ve pangngai tak i ni tih bak kha ka lo ngaihven ngai lo; Mahse vawiina tui in tura i thiannu nen  min rawn kalpelh paha kan mit leh mit a intawn atang khan nangmahah khan englo a awm tih ka hria in ka hria, keimaha englo a awm vang zawk pawh a ni maithei. Khawiah emaw chuan engemaw chu a awm chiang a lawm.
1st Day(wednesday):Khawi sikulah emawni pawl engemaw zat kan zir kum a nih kha. Kan section a inang lo a, kan room piaha tui inna awmah khan tui in turin in lo phei thin a, vawiina i lo phei ka lo thlir lai che khan ka rilruah englo a lo awm thar ta. Chu englo chu nangmahah pawh a awm ve ngeiin ka ring, min rawn melh pah khan i nui deuh seih

Tuesday 24 January 2012

Kan naupan laia kan infiamna

Kan naupan laia kan infiamna leh kan intihhlim ve na thenkhat kha thluaithlum kual vak loin ziakchhuak dawn teh ang:-
  1. In-bihruksiak: In bihruksiak ah hian tihdan chi hnih kan nei a, in dapa awih leh awih loh a ni. In dapa awih ah kha chuan a changtu(a zawngtu) khan min hmuh kim hmaa kan dapa hman chuan a chang nawn leh thin. A pangngai zawkah  chuan min hmuhkim vek hunah a hmuh hmasak ber kha a chang ve leh mai thin. In dapa kan tih hian achang chuan a ngai an chang nawn tlut tlut thin a, a phakar deuh chuan an chhungte’n an koh miah loh pawh hian, ‘eih ka lo haw nghal’, an tia, an haw daih thin.
  2. In-thengkah: Pawl pahnih ah kan inthen a, kan indo lem a ni deuh ber. Lehlam pawl kan hmuh chuan ‘theng mawia’ kan tia, anni’n, ‘ka pil hman’

Wednesday 11 January 2012

FACEBOOK.... kuch kuch hota hai!


Ziak lawksa loin a hmunah hian tichawp ve chhin teh ang. Tunlai thalai leh lai lo paw’n kan buaipui an fb chungchang vel leh a kaihhnawih tren trennnn——->  Fb a ka luh ve apiang hian kan thianpa pakhat hi a lo awm ngei ngei a, ‘Ka status kha lo like lawk teh’ a lo ti ve ziah bawk a. Ok tiin emaw, kk tiin emaw ka’n chhang liam ve puat a, a thil update ka’n en chuan. ‘ka lo ruih em vang a lo ni….. han ti mai i la(h)!’ tih vel mai mai hi a lo ni leh thin sia, tlawmngaih like in ka like sak ve leh mai mai thin a ni ber.
Kawng lehlama thlir chuan a nuam ve riau bawk  si. Kan status kan han update a, chunglam a rawn sen nghal tuar tuar a. Zotlangvala Balma like ur status tih ngawt ai chuan Mimmy joalene and 109 others like

KRISMAS HLAWHTLING

Short Sermon te, Sermon te Christmas thuchah hrim hrim bakah ṭhalaite chuan Christmas a lo hnaih hian bonus kan dawng ṭhin. Zilhna leh fuihn...