ISUAA TLUK LUH

‘Isuaa tluk luh’  kan tih hian, engtik hunah nge Isua hnenah chuan kan tluk luh ṭhin, mahni nun in en a, mahni inzawt pah chungin a hnuaia mite hi i ngaihtuah teh ang.

NUNPHUNG PANGNGAIA KAN NUN LAIIN: ‘Engtik laiin nge Pathian rin tlata Pathiana innghah tlat leh Amaha tluk luh reng hi harsa i tih ber’ tiin min zawt ta se la, ‘Nunphung pangngaia nun lai hian harsa ka ti ber’ tiin ka chhan ka ring. Heti hian kan ei a, kan in a, kan nung a, kan khawsa a, a kal pangngaiin hun a kal a, he’ng zawng zawng hi a tur ve reng, lo thleng ve tur hrim hrim emaw tihna te, thil nihphung pangngai anga ngaih mai na emaw, ngaia neiha a hlutzia leh Pathian hnena lawmthu sawi nachang hriat lohna te, Amah mamawh ngawih ngawihtu, a hnena tlu lut reng tur kan nihzia min ngaihtuahtir lotu a ni duh khawp mai. Inkhawm pangngaiin kan inkhawm ve reng, ṭawngṭaite pawh a pangngai te tein kan ṭawngṭai ve

reng; Amaherawhchu Pathian mamawhtu tak tak, mamawh ngawih ngawih rengtu kan ni tih inhriatna hi hetia nunphung pangngaia kan nun lai hi chuan neih a har duh khawp mai.

Naktukah a pangngai tein ni a lo chhuak leh ang a, nunphung pangngaiin kan nung leh ang a, tiin chutiang chu thil nih dan tur ve reng leh kan chanpual pangngai emaw tih mai a awl hle, Thufingte 27:1 ah chuan ‘A tuk lama thil lo awm tûr chhuang suh, Chu mi ni chuan eng nge a rawn chhuahpui dawn i hre si lo’ a ti a, kan hma lam hun hi kan hre lo a ni. Heti zawng hian sawi ta ila, tun aṭanga mit khap kar lekah pawh hian thihna leh harsatna tawk thei reng kan ni. Chuti a nih chuan eng lai pawh hian Pathiana kan tluk luh renga Amaha kan awm reng hi a ṭulin a ṭul takzet tihna a nih chu. Ro hman kan ni lo, da hman kan ni lo. Tun lai chu ka ro riau, tun lai chu ka da tlat te kan ti leh ngawt ṭhin. A rawngbawl tura thlan chhuah leh koh chhuah, eng lai pawha amah bel tlata amaha intulut reng tur kan ni tih hi kan hre reng lo fo ṭhin. Kan rawngbawlna kawng, ringtu nun kan hman chhohna kawngah  hian koh kan nih chhan hi chiang ila englai pawh hian ral doa duty reng, inring at reng tur Isua hnena tlu lut reng mai tur kan ni tih hi ka hre thei ngei ang.

LAWM LEH DINHMUN ṬHAT LAIIN : Kan nunah lawmna lam kan tawn tam a, thil khirh khan vak kan tawh loh hian ṭhenkhat tan chuan Isua hnena tluk luh reng leh Amah belh tlat reng hi a harsa ṭhin khawp mai. Hmanah loneitu pakhat  zirlaibuah kan zir ṭhin kha. Kha loneitu kha ramhuai pakhatin Pathian a phatsana a sawisel theihna atan thlemin a bei a, a chaw fun te, a hnathawhna hmanruate lo thuhruksakin a lo dahbo sak a nih kha; Amaherawhchu kha loneitu khan Pathian phatsan leh sawisel a hnekin Pathian a ring leh zual zawk tlat a, chutah chu ramhuaite chuan a thurawn dawn angin  a beih dan a han thlak ta a, chu loneitupa chu buh tam tak thar tiring malsawmnain a han vur ta tak tak a, a buh ei sen lohte chu zu ah thlawrin hlimhlawp bawlin a rui ta vel a nih kha. Kha thawnthu kha hringnun leh ringtu nun tilang fiah chiang em em tu a  niin ka hria.

 Engemaw result a chhuak a, kan lo pass a, fb leh whatsapp status vela ‘thank God’ tih han update zuai ang chi chu a har lo maithei; mahse dinhmun han ṭha deuh se, han hausa deuh ta ila tam tak hi chuan kan tlin lo chiang khawp ang, Pathian mamawh lem loa inhriatna hi neih awlsam deuh tur niin a lang tlat a ni. Matthaia 19:23-24 ‘Tin Isuan a zirtirte hnenah chuan, “tih tak meuhin ka hrilh a che u, mi hausa tan vanram luh chu harsa tak a ni. Tin ka hrilh leh a che u, mi hausa Pathian ram luh aiin sanghawngsei hriau benga luh tlang a awl zawk,’ a ti a.’ Chuvangin mi hausa takte’n Pathian an han bel tlat a, Pathian an han ring tlat hi chu an fakawm bik deuh hian ka hre ṭhin. An dinhmun angah ding ve ta ila Pathiana tluk luh fo chu sawi loh Pathian  lam ngaihsak peih lo leh eng atan maha ngai lem lo tur hi kan tam maithei a ni. Tam tak chu kan hausa lo hi kan tan chuan malsawmna, kan vanram kai theihna chhan berte pawh a ni maithei. Chutih laiin eng dinhmunah pawh ding ila Lalpaa tlu lut reng thei tur leh Amah bel tlat thei tura kan thinlung lam kan inbuatsaih chu a ngai khawp mai.

HARSAT MANGAN TAWH LAIIN: Harsat manganna engemaw tawh hian ringtu tan chuan Pathiana tluk luh leh Pathian belh a awlsam lai ber niin ka hria. Heihi ringtute kan vanneih bikzia tilangtu pawh a ni. Sam 145: 18-19 Lalpa chuan a kotu zawng zawngte chu a hnaih ṭhin a, tihtakzeta Amah kotu zawng zawngte chu, Amah ṭihtute duh chu a hlawhtlintir ang a, An au thawm a hria ang a, anni chu a chhandam ang. A va han thlamuanthlak em aw.

Harsatna kan tawk thin, midang hrilh ngam si loh, mahni tana rit em em si kan tawk a, tam takin tluk luhna tur an hriat loh vangin mahni nunna  an la. Midang tihbuai phahna atan ho deuha kan hriat, midang kan share ngam loh,  mahni chauha phurh atana rit em em si hi he hringnunah hian min delhtu tur hi a tam em em, keia harsatna kha i tan a ho viau maithei, i harsatna kha ka tan a lo ho leh viau maithei, chutiang chuan mihring chu inhrethiam thei lo tawn vek kan ni. Mahse, Lal Isua erawh chuan kan harsatna lian ber aṭanga te ber thleng hian min hriatthiampui em em vek a, kan tana rit hi Atan pawh phurh tham a ni zel a ni, min ngainep ve ngai lo, Amaha tluk luh hi a him a, a thlamuanthlak a, a mualphothlak ve loh bawk.

Engtikah emaw chuan engemaw avangin i la ṭap ang a, i la rum vawng vawng ngei dawn, in ṭhat lai hun a rei dawn lo’ a tih kha, ni ṭha lo te a lo thleng ang a, lawmna reng ka nei lo, kan tihna tur kumte pawh a lo la thleng dawn.  Harsatna engemaw tumah hriattir kan duh loh, midang hriat atana nep deuha kan hriat site pawh kan la tawk ang, chutih hunah chuan tu hnenah nge i ṭah dawn? Tu hnenah nge i harsatna i thlen dawn? Lal Isua hnena tluk luh nachang i hriat loh chuan mi vanduai tak, mi mal tak i ni dawn, Lal Isua hnena i tluk luh erawh chuan, nangmah chauh pawh ni mah la, i mal ngai lo ang, i mal lo e, Mali tih ang vel a ni mai. Mika 7:7- Kei erawh chuan Lalpa lam ka en ang a, ka chhandamna Pathian chu ka nghak ang; Ka chhandamna Pathian chuan mi ngaithla dawn a ni. Nangmah ngaithlatu, Lal Isua en tlat la, A hnenah tlu lut rawh.

Kan nunah harsatna kan tawk emaw, dinhmun ṭha takah dingin kan hausa a, kan hlim emaw, thil lian tham, harsatna leh hlimawm lam engmah tawk loin hringnun pangngai kan hmang mawp mawp emaw pawh ni se Lalpaa tlu lut a, Amah bel tlat tur kan ni tih kan hriat thar zel hi a va pawimawh tak em.

(2018 June thlaa CMCS inkhawma ka sermon atangin a chhiar nuam turin ka han la chhuak a ni.)