LAWMNA THUCHAH

 

Mizo Kristian ṭhalaiin Mizoram chhuahsana  nun bul kan ṭan dawn hian kan hriat reng tur, mahni kan inzawha kan inhrilh nawn fo tur thil pawimawh em em pathum a awm a. Chu’ngte chu:-

1)     Khawi aṭanga lo kal nge i nih?

2)     Hetah hian eng nge i tih?

3)     Khawiah nge i kal zel dawn? tihte hi a ni

Khawi aṭanga lo kal nge i nih?: I lo chhuahna Chhungkua, khawtlang leh kohhran hre reng ṭhin rawh-

              Ṭhalaite’n khuahkhirhna hnuai ata zalena,  mahnia nun kan hman hian tam takin kan zo loin kan chhiat phah

fo ṭhin. He khawpuiah ngei pawh hian chu chu kan hmu ṭhin. Nawmsipbawlna te, sualna leh i nun ti pelhe thei tur thlemna i hmachhawn hunah an neih zawng zawng i tana senga, nangmah hmangaih leh ngaihtuah em emtu i nu leh pa, i chhungte hre reng ṭhin rawh.

              Kan mi hmasa, ram pawna lehkhazirte chuan thiamna leh finna paw hawin, chhawr tlakin Mizoramah an let leh ṭhin. Tun lai ṭhalaite chuan ram pawna kan lehkhazirna hmun aṭangin hri ṭha leh chin ṭha lo te, Pathian awm rin lohna te, midum fa tih velte kan paw haw nawlh nawlh ta fo mai. Ram rethei leh la hnuaihnung angreng tak, inrelbawlna fel lo tak, thiamna leh dikna mamawh em em, nakinah ṭhangthar ṭha zawk an lo la chhuak ang a, kan ram a la changkang ve ang a, kan la ding chhuak ve ang, ti a beiseina nena thlir rengtu khawtlang aṭangin i lo chhuak a ni. Ka thiam ka finna hi ka ram tan ka la hmang ṭangkai ve ang tih ngaihtuah ran chunga nun hmang kan tam hunah kan ram, kan hnamin hma a sawn ang a, kan la dingchhuak ve ang; Ṭhalai tal maim ai, engmah ngaihtuah loa nung mai ma ikan tam chhung chu ‘ṭhangthar ṭha zawk’ an lo chhuah hun tur hi kan nghak kumkhua ang. Nangmah mamawhtu khawtlangin min lo nghak reng che a nia.

            Ram dangah, hnam dang karah, ṭhenrual leh chhungkhatte hmuh phak lohah i awm a ni a, Lunglen khawharna neuh neuh bakah  harsatna, buaina leh lungngaihna, mangannate’n a lo hmuah hun che a awm ang. Puitu nei lo, mal em ema inhriain, beidawn rum rum hun pawh I tawng chho ngei ang. Chutih hunah chuan i mal lo a, i tana ṭawngṭai reng ṭhin i rawn chhuahna kohhran an awm tih hre reng ṭhin rawh. Mal emaw i intih lai khan Pathian kohhran ho Pathian hmaah i tan an ding reng e.

Hetah hian eng nge I tih?: He khawpuiah hian eng ti tura lo kal nge i nih tih ngaihtuah fo rawh. Mahni awm chhan hre loa khawsa te an hlawhchham ṭhin a, buaina an tawk ṭhin. Anmahni bakah anmahni hnaihtu apiang an tibuai ̕ṭhin. Mahni awm chhan hre lo leh mahni tih tur ti loa mahni tih loh tur tite hian Mizo khawtlang leh hnam an tibuaiin an timualpho fo mai.

Mahni awm chhan hria apiangte khawtlang leh kohhranah mi ṭangkai an ni. Mizoram angin helaiah hian activities kan nei lo. Ka zirna hlawhchham khawpin kohhran ṭhalaiah ah ka’n inhmang teh ang pawh ti la hlawmchhamna tur i zawng hlawhchham zawk ang. Sunday tlaiah vawi khat i rawn inkhawm hian Ṭhalai Pawlah active ber pawl i ni nghal, chu chu i zirna tibuai khawp a ni lo tih nang leh kei hian kan hria. Helaiah chuan kan member active ber pawh hi Mizorama member hla tam tak aiin kan inkhawm khat hial maithei. Chutiang chuan i awm chhan dik tak ti chungin active member i ni thei tih kan inhriattir nawn a ni.

 

Khawiah nge I kal zel dawn?: Mizo khawtlanga langsar deuh deuh leh huau huau nikhuaa nuam ti fe fe, eng nge an tih zui tak kan hriat loh hi kan vai liam tam ta hle. Chutih laiin he laia an awm laia kan hriat mang loh hlawhtlinna an chan hnua kan hriat lar zui tak, kan chhuan zui tak viau an awm fo mai. Tuna helai khawtlanga lo lar viau aiin nakina i kal leh zelna tura i lar zui dan a pawimawh, chu chu ngaihtuah fo ṭhin rawh.

Khawiah nge I kal zel dawn, tih hian thil chi hnih rilrua hriat tur a awm, pakhat chu he khawvela i khawsak zui dan tur a ni, chu chu tuna kan sawi tak kha a ni. Pahnihna leh a pawimawh zawk chu he khawvela i tih tur i zawh hunah hian khawiah nge i kal  dawn tih hi a ni. He khawvelah chuan kawng hran hran kan la zawh darh vek dawn a, duhthlan tur a la awm ṭeuh thei; He khawvel piah lamah chuan kawng pahnih chiah zawh tur a awm thung tawh dawn. Hremhmun nge Vanram? Vanram kai turin i piangthar tawh em? Isua lal leh chhandamtu ah i pawm tawh em? I nunah Isua I nei tawh em?

He khawpuiah, he CMCS Ṭhalai Pawl Member i nih chhung ngei hian chu Lal Isua Krista chu lo nei turin kan duhsak che  a ni. Kan zinga i lo tel hi kan lawm em em a, kan ngaihlu em em che. Chuvangin kan neih hlu  ber Isua hi i nunah neihtir ve che a, a pawimawh ber nakina I kal zui zelna tur chinfelpui che hi kan duh a ni. Chu hun ṭha chu bawhpelh suh.


(Heihi nimin 03.09.2023 CMCS Thalai Pawl Member thar lawmna huna fuihna thu ka sawi a ni.)