HMAITHINGHAWNG

(Hmaituam chungin Rinawma a lo lang a, fimkhur takin engemaw a veh kual dûn dûn a)

Vanlaldika:         (Phone  a rawn be lût a, hmai tuam a hmuh chuan a phu zawk a) E he, tu nge ni? Eng nge I duh? Min chhan r’uuu(tlan chhuah a tum a)

Rinawma:            Ka pu, keimaah, keimah Rinawma(A hmai tuamna a phelh a)

Vanlaldika:         Hmela, min tiphu zawk a lawm. Eng nge khatia i hmaite i tuam vel a?

Rinawma:            Âw, nangma’n kan inthup  a ngai i ti sia.

Vanlaldika:         I va mawl e aw. Khatia I intuam ṭupte chuan an ringhlel daih zawk ang che chu.

Interview tur an lo thleng dawn tawh, inthlâk fel vat rawh. I chanpual, tuna kan rawih chhan che  kha I hre chiang em?

Rinawma:            Min lo hrilh nawn leh thuak thuah teh, a sawi dan tur tak kha ka theihnghilh leh deuh tawh.

Vanlaldika:         Nikum hmasa khan kan agency kaltlang hian Macau-ah hnathawk turin i kal a, kum hnih i awm hnuah i sum khawl tam tawk nen i lo haw a, i nu leh pa chenna tur in i sak ṭhatsak a, i kal leh dawn a, tunah hian i kal lehna tur vel buaipuia rawn leng angin i insawi ang. I hnathawhna chungchang an zawh che chuan, “a tir lamah chuan a hrehawm ve deuh a, a hnuah chuan a nuam lutuk,” i ti dawn nia.

Rinawma:            Aw le, ka sawi sual dawn chuan min melhrum mai dawn nia.

   (Nula pahnih hruaiin Feli a rawn lut a ) 

Feli:                       Traffic a jam a nasa lutuk a, rin aiin kan rawn thang rei. Ehe, Rinawma chu i dam maw? in in sak chu in zo fel tawh em?

Rinawma:            Eng in sak maw?(Vanlaldika leh Feli chuan an melh rum hrâwk a)

Vanlaldika:         E, lo ṭhu rawh u, lo ṭhu rawh u. Hei, Rinawma pawh hi foreign lamah kal leh a tum a, kan lo inbuaipui mêk a nih hi. Tikhan han inrem fel u la, thingpuite kan ko dawn nia. Pi Feli’n in lo kal tur thu te, ram pawnah hna thawh tur in duh thute min lo hrilh nual tawh a.

Nula1:                   Nia, facebook a post kha ka hmu a, hlawhte a ṭhat hmel  sia, kan chhungkua kan harsa bawk nen Pi Feli hi ka rawn be ve tawp a. Ani’n i duh chuan ṭhiante pawh lo hrilh ve rawh a tia, hei ka ṭhiannu hian a lo duh ve bawk a, a theih chuan kan pahnih hian kal dun kan duh a.

Vanlaldika:         E, a ṭhat hlauh chu. Ram pawnah hna in zu thawk ang a, in rawn hausa haw thûr thûr mai ang. Hei, Rinawma pawh hi nikum hmasa khan a zu kal a, sum tam tâwk nen a rawn haw a, nuam a ti teh a  nia.        

Nula2:                   Ka pu, chuan, facebook-ah khan  kal man tih vel kha chawi a ngai dawn lo in tia, kha kha tak tak a ni em?

Vanlaldika:         Aw, ni e, a hmun thlenga in kal man zawng zawng kan tum vek ang a, hlawh in neih a, in rawn hlawhtlin viau phei chuan kan agency in tih hmingṭhat man kan la pêk belh leh dawn bawk che u maw le. Hei Rinawma pawh hi keimahni aṭanga hlawhtling a nia, min tih hmingṭhat man vawiin hian pawisa kan pe dawn a ni.

Rinawma:            Ehe, ka pu, pawisa min pe dawn maw( Vanlaldika chuan a melh rum hrawk a)

Nula1&2:             Yes, a va ṭha dawn ve, engmah insên a ngai dawn lo nih chu.

Feli:                       Nichina ka hrilh che u kha hre reng u la, in zu kal tirh ah chuan nuam in ti nghal kher lo pawh a ni thei; mahse hlawhtling tur chuan in tawrh hram hram a ngai. In tân theihtâwp kan chhuah tih hria ula, harsatna eng pawh awm se la  keimahniin engkim kan rawn buaipui vek zel dawn a ni.

Vanlaldika:         Hmm, tikhan Room lehlamah sawn min lo va nghâk ula, in documents pawimawh leh thil ṭûl ang angte kan tifel dawn nia. (Nula pahnih chu an chhuak ta a)

Feli:                       Ka rawn hmu chhuak ṭha i ti lo maw? An hmel a ṭha bawk a, an tlawm thei lo hrim hrim. Khu lam chu i be fel tawh em?

Vanlaldika:         Aw, be fel e. Kolkata thleng i chhuk pui ang a, Airport ah Janmenjoy Das-a’n a lo nghak che ang a, pawisa pawh a lo hlan nghal ang che. Chuan, nang chu i rawn haw leh nghal thei ang.

Rinawma:            Ka pu, eng hna nge an thawh dawn a?

Feli:                       Hahaa, Rinawma hi khawia mi nge maw i chhar chhuah le? A mawl dan hi ka duh riau mai, hahahaa

Vanlaldika:         Rinawm, ngaithla rawh, i mawl vang hian kan chhawr atan chuan i ṭha viau; mahse i ṭawng sual leh ṭêp ṭhin, thil awmzia ka hrilh ang che a, chu chu vawng reng ang che. Keini hian hna thawh tur kan nei lo. Vairamah hmelhriat kan nei a, chumite chuan hnathawh tur an nei a niang, nula an duh a. Chumi tur chu kan zawnsak ṭhin. Nula kan zu thawn thla a, pawisa an rawn thawn chho ṭhin. Engtin nge an lo tih zui a, eng hna nge an lo thawhtir tih lam chu kan buaina tur a awm lo. Nang chu, helaiah i awm ang a, ram pawna hna thawk tur kan tirh dawn apiangin nangpawh i kal tawh thu leh tunah kal i tum leh mek thu i lo sawi ṭhin ang.

Feli:                       Mi engemawzat kan thawn liam tawh a, tumah an chanchin kan hre zui lo. Mahse, kan rintlak a,  hnathawk tura kan thawnte pawh an hlawhtling ṭhin a ni tih miin an rin theihna atana kan hmaithinghawng i nih hi, chiang em?

Rinawma:            (A phone a phawrh a) Chiang e, lo lût rawh u le. (Police uniform ha pahnih an rawn lut a)

Police1:                Tumah che suh u. Kawhmawh bawl tum hauh suh ang che u.

Police2:                Vawiinah hian mihring hmanga sumdawnna, human trafficking case avanga man in ni e.

Feli:                       Awi, ka duh thei lo, Vanlaldik, eng nge awmzia? Hetiang thil tenawmah hian i lo inhnamhnawih elaw? Ka chhuahsan dawn che.(Chhuah tumin a ding uaih a)

Rinawma:            Kha nu kha chhuahtir hlek suh u, a neitunu ber a nih kha, hei hepa nen hian man nghal rawh u.

Police1&2:          Yes Sir!(Handcuff an buntir a)

Vanlaldika:         Rinawm, Mawla, eng thil nge i tih? Eng nge a awmzia?

Police1:                Mawla a ni lo a, kan pu ber, nangni kan man theihna tur atana kan thluak bûr a nih hi. In sumdawnna tenawmzia leh in inthup thiamzia te, man mai in harsatziate kan hre si a, nangmahni kan man theihna tur atân leh nangmahniah a rawn intah luh theihna atân a mawl der a, kan man theihna tur che u a kan hmaithinghawng a nih hi, chiang em?

Rinawma:            Hmm, chiang viau tawh ang, kal ang u le.