PATHIAN NGAIHSAK

 

‘Sam 4:3 Lalpa chuan Pathian ngaihsak mi chu

Ama tan a dah hrang tih hre zawk rawh u’

 

Mizo ringtute zingah hian kan infuihna langsar tak, fel lo deuh nia kan hriatte kan zilhna lar tak chu ‘Pathian ngaihsak ve deuh rawh’ tih hi a ni awm e. ‘Ani hi chuan Pathian lam hi a ngaihsak lo ve lutuk a’ tihte pawh kan hmang rim viau. Pathian ngaihsak chu eng nge ni a, engtin nge Pathian kan ngaihsak ang tih lam chu inhrilh thar leh chiam ṭul turah ngai lo ila. Tun ṭumah hian keimahni nun kan lo inenletna atan Pathian ngaihsak hun tih lam sawi kan tum dawn a ni. Engtikah nge Pathian chu kan ngaihsak ang?

LAWM LAI LEH HLAWHTLIN LAIIN : Kan nunah lawmna lam kan tawn tam a, hlawhtlinna kan chan lai tak hi ṭhenkhat tan chuan Pathian ngaihsak leh belh tlat a  harsat lai a ni duh khawp mai. Loneitu leh ramhuai pakhat chanchin  zirlaibuah kan zir ṭhin. Chu loneitu chu ramhuai pakhatin Pathian a ngaihsak ṭhinna lak ata hruai pen tumin a thlemin a bei a, a chaw fun te, a hnathawhna hmanruate lo thuhruksakin a lo dah bo sak ṭhin a, harsatna hmangin Pathian sawichhiattir a tum a ni; Amaherawhchu  loneitu khan Pathian phatsan leh sawisel a hnekin Pathian a ringin a ngaihsak leh zual zawk tlat a, chutah chu ramhuaite chuan a thurawn dawn angin  a beih dan a han thlâk ta a,  loneitupa chu buh tam tak thar tirin malsawmnain a han vur ta tak tak a, a buh ei sen lohte chu zu ah thlawrin

hlimhlawp bawlin nuam a chên a, Pathian lam reng reng ngaihsak loin a hun a hmang ta a ni.

 Israel fate pawh khan ramtiam Kanan ram an han luh a, khawizu leh hnute tui luanna ramah nuam taka an han khawsak chiah kha chuan an sal tanna lak aṭanga hruai chhuaktu Pathian ngaihsak lo lêkin an hun an hmang leh mai ṭhin a nih kha. He kan ringtu nunah hian malsawmna te, hlawhtlinna leh lawmna te a lo thlen hian Pathian lak aṭanga min pên bo tirtu a ni duh châwk mai. Malsawmtu lam en lo a, a malsawmna ringawt kan en mai a hlauhawm hle a ni. A malsawmna kan dawn nasat zawh poh leh Pathian lam en a, Amah ngaihsak deuh deuh tur kan nihzia kan hriat thar fo a pawimawh hle mai.

HARSAT MANGAN  LAIIN: Harsat manganna engemaw tawh hian ringtu tân chuan Pathiana tlûk luh leh Pathian ngaihsak a awlsam lai ber a ni letling maithei. Tun laia ṭhenkhatin an ngamtlâkte an fiamna “a whatsapp Status-ah Pathian thu a hman chuan positive contact a nei hnai a, a hlauthawng tihna” an tih ṭhinte hian heihi chu a sawi fiah viauin ka hria. Kawng lehlamah chuan mangan laia belh tur leh belhtlak Pathian kan nei hi keini ringtute vanneihna tilang chiangtu pakhat a ni.

Amaherawhchu hetih mek lai hian he’ng harsatna hmang hian Setana hian ringtute hi nasa takin min bei ve reng mai. Ringtu nih vanga harsatna tawk ve lo tura inngaihna leh hriatthiam lohna hmang tein min bei ṭhin. ‘Ringtu ka ni si a, engati nge hetiang hi ka chungah a thlen?’ tih emaw, ani hi rawngbawltu a ni si a, engati nge hetiang harsatna hi a chungah a thlen tho si’ tih zawhnate hi kan nei ve fo awm e. He’ng zawng zawng chhanna hi kan sawi vek thei lo ang a; amaherawhchu he’ng harsatna karah pawh ringtute’n Pathian ngaihsak tlat chunga ke kan pên a, Amah en tlat chunga buaina kan hmachhawnna hian kan hriat phak loh rah duhawm tak a lo chhuah zawk ṭhin a, chu chu a tuartu leh a tawngtu tan mai ni loin, a lo hretu leh hmutu zawng zawngte hnenah a nih tawh zâwk ṭhin avangin, harsatna tawh lai aiin a rah duhawm tak chu a lo langsar tawh zawk ṭhin a ni.

2 Korinth 4:8 ah chuan heti hian kan hmu "Lehlam lehlama nêksawrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo;" Harsatna tâwk lo ringawt hi ringtu nun a ni lo a, harsatna kârah pawh hmalam pan, mangang tak chung pawha Pathian avanga beidawng loa hmalam pan zel nun hi ringtu nun diktak chu a ni.

NUNPHUNG PANGNGAIA KAN NUN LAIIN: ‘Engtik laiin nge Pathian rin tlata, Amah ngaihsak reng  hi harsa i tih ber’ tiin min zawt ta se la, ‘Nunphung pangngaia nun lai hian harsa ka ti ber’ tiin ka chhan ka ring. Heti hian kan ei a, kan in a, kan nung a, kan khawsa a, kan hna pangngai kan thawk a, kan zirlai pangngai kan zir a, a kal pangngaiin hun a kal a, he’ng zawng zawng hi a tur ve reng, lo thleng ve tur hrim hrim emaw tihna te, thil nihphung pangngai anga ngaih maina emaw, ngaia neiha a hlutzia leh Pathian hnena lawmthu sawina chang hriat lohna te, Amah mamawh ngawih ngawihtu, Amah ngaihsak reng tur kan nihzia min ngaihtuahtir lotu a ni duh khawp mai.

Hman deuha whatsapp vela an thu inthawndarh kha a ṭha khawp mai, pilot leh Kristian tlangval inbiakna emawni kha, an ziah dan chiah kha ka hre ta mai lo, hetiang deuh hi a nih kha- Pilot pakhat leh Kristian tlangval pakhat kha an ti ti a, pilot chuan chu Kristian tlangval chu zu in puiah a sawm a, chu Kristian tlangval chuan a lo hnial a, Pilot zawk chuan a duh loh chhan a zawh chuan Kristian tlangval chuan, “a nih leh nang thlawhna i khalh laiin zu i in ngai em?” tiin a zawt let a, chu pilot chuan, “aih, ka duty lai chuan ka in ngai lo,” tiin a chhang a, chutah, chu Kristian tlangval chuan, “kei chu Kristian ka ni a, englai pawh hian Lal Isua tana duty reng ka ni,” chuvang chuan duty laia zu in thei ka ni lo,” tiin a chhang a nih kha.

 Hetia nunphung pangngaia kan nun lai, harsatna leh manganna kan tawh miah loh lai, lawmna leh hlimna tharlam em em pawh a awm chuan loh lai, kan chhehvelah ringlotute an khawsak ngaia an khawsak mawp mawp lai, kan ṭhiante ngei ngei pawh an pharvar ngaia an pharvar reng lai  hian ringtute chuan Lal Isua tana duty reng kan ni a, Amah ngaihsak a, Ama tana nung reng tur kan ni  tih kan inhriat thar fo a va pawimawh em tiraw.

TUN HUN: Thuhriltua kan Pathian thu hriat lar tak ‘Ṭhalaite u, in ṭhat lai chen ula, in la naupan viau lai hian hlim rawh u’ tih thu hi tam tak chuan vanglai huna khawvel lam tlân vak tura min phalsakna, Pathian pawh ngaihsak loa nung vel tura min phalsakna ang deuhahte hian kan ngai ṭhinin a lang; Mahse Thufingte 27:1 ah chuan ‘A tûk lama thil lo awm tûr chhuang suh, Chu mi ni chuan eng nge a rawn chhuahpui dawn i hre si lo’ tih kan hmu a, ‘a tûk lamah, nakinah Pathian chu ka la ngaihsak ang’ tia intih lungmuan chi a nih lohzia kan hmu. He kan vanglai ngei hian kan chungah eng nge lo thleng dawn kan hre lo, kan rualpui, keini aia naupang tamtak an vanglai pawh hmang zo loin an liam tawh, keini pawhin kan liam ve hun tur kan hre lo, chuvangin tun hunah ngei hian i nun kha Pathian tan lo hmang la, Pathian ngaihsakna atan i hun lo hmang ta che.