A ROPUI BER CHHANDAMNA

 

(Pastor leh Kristian Missionary pakhat hi rawngbawlna hmunah an rawn inzui a)

Missionary:        Pastor, tuma’n kan thusawi leh kan thuhrilte an ngaihsakin an ngaithla duh bawk si lo a, engtin nge hetiang chuan kan rawngbawlnain hma a sawn theih ang le?

 

Pastor:                  Pathian hnenah ṭawngṭai ila, Ani’n a duh angin min hruai zel ang, a rawngbawl tura  A koh kan ni a, min thlahthlam hauh lo ang. (An kal ta zel a,  kalkawngah chuan kawngsirah damlo leh a buaipuitu pakhat hi an hmu a)

 

Missionary:        Ehe, saw mite saw kan rawngbawlna khuaa mite kha an nih saw. An damlo a va ang ve.

 

Pastor:                  (An bul an va thlen phei chuan) Chibai u, enga ti nge ni ta? Puih in ngai em?

 

Tlangval:              Hei,  khuaah kan haw dawn a, kawnga kan kal laiin ka nu hi a pum a na thut a,

kan chawl hrih a ni.

 

Pastor:                  A nih tak chu, a va zia lo ve, khawimaw, hei nachhawkna damdawite chu kan keng a sin, a ei thei ang em aw? (damlo chu an han en vel a)

 

Missionary:        Pastor, a mitmeng hi a harh lo riau mai, rin aiin a chauh hmel tlat.

 

Pastor:                  Tlangval, min lo hrethiam la, I nu hi kan ṭawngṭaisak I duh em? I duh loh chuan kan tilui miah lo che a nia.

 

Tlangval:              Duh tehreng mai, ka nu damna tur a nih phawt chuan engpawh ka duh. Khaw kar Kawnga kan kal lai hian a pum a rawn na thut a, darkar engemawzat mi lo kal ka nghak tawh a, tumah an lo kal thei bawk si lo a, ka mangang lutuk, khawngaihtakin min tihdamsak rawh u. In ṭawngṭai dam phawt chuan in thusawi zawng zawngte pawh ka ngaithlain ka awih zel tawh ang.

 

Pastor:                  (Damlo lu chunga kut nghatin a ṭawngṭai a) hmm, tikhan tui tlêm kha han intir teh u.(Tui chu an intir a)

 

Damlo:                 (Tui a lem zawh rual chuan) Aw, ka dam ta. Ka dam ta daih mai. Ka pum na a awm tawh miah lo. A va mak em! Pastor hian min tidam a ni.(Hlim leh lawm takin an inchibai a, an inkuah vel a)

 

Tlangval:              Pastor, kan va lawm tak em. Lo kal rawh u, kan rualin lo haw rawh u. Khuaah pawh tuman in thusawi an tibuai tawh lo che u ang a, in thusawi ngaithla duh lo tumah an awm tawh lo ang, ka nu in tihdam thu hi ka sawi ang a, I thusawi ngaithla turin khuaa mi zawng zawng an lo kal khawm vek mai ang. (khaw lam pan chuan an inzui haw ta a.)

 

Khaw mipui1:    (Nufa leh Pastor te lo kal a hmuh ve leh) Ehe, in va thang rei em em ve, harsatna in tâwk emaw kan tia, kan lo mangang a, zawng tur che u in kan lo kal hman ṭêp a lawm.

 

Khaw mipui2:    He’ng pastor te hian an lo tikhawmuang che u em ni a?

Tlangval:              Ni lo e, kan rawn haw kawngah ka nu hi a pum a na thut a, a kal thei tawh si lo a, mi lo kal nghakin kan chawl ta tawp a. Kan beidawn tawh hnuah Pastor te hi an lo kal a, pastor hian ka nu chu ṭawngṭaisakin a tidam a, kan lo ha wthei chauh a lawm.

 

Mipui3:                Eng a? A tidam a maw?

 

Mipui4:                Pastor in damlo a tidam thei maw?

 

Damlo:                 Aw, tidam e, min tidam chiang a lawm. Ka pum nat vanga ka mut reng lain ka lu a khawih a, min ṭawngṭai a, ka lo dam nghal a ni.

 

Mipui ho:            A va mak ve. Pastor in damlo a tidam thei, pastor in damlo a tidam thei(mak tiin an phun mur mur a.)

 

Missionary:        Khawngaihin lo ngaithla vek rawh u, vawiin tlaiah hetah hian pastor in thu a sawi dawn a, mi zawng zawng ngaithla turin lo kal khawm vek rawh u. Damlote lo hruai ula, pastor in a lo ṭawngṭaisak zel ang. Tunah chuan midangte hrilh turin va kaldarh tawh rawh u, vawiin tlaiah in vaiin in lo kal khawm vek dawn nia.

 

Mipuiho:             Ka pi dam lo ka hruai ang, ka u damlo ka hruai ang, ka ṭhian nu ka hrilh ve ang(an sawm tur sawi nawk nawk chungin an chhuak darh ta hlawm a) 

 

Tlangval:              Pastor, tunhma zawng khan I thusawi kha kan ngaihsak loin, kan chhaih buai mai mai ṭhin che a. Mahse a ngai reng khan thu I sawi char char a, tuman an ngaithla duh si lo a. Damlo I tidam thei tih chu lo hria ila hman aṭang khan kan ngaihsak che in I thusawi kha kan ngaithla tur a nia.

 

Damlo:                 Ni ngawt mai, hman aṭang khan lo ngaithla ila I thusawi kan ngaithlai, I thu kan lo awih daih tawh tur a ni.

 

Pastor:                  Ṭhiante u, vawiina in chunga Pathian thil mak tih kha a ropuiin mak in ti a, in ngaihsak viau a, a lawmawm khawp mai; Mahse chu ai chuan hmana in ngaihsak miah loh chung pawha ka lo sawi ka lo sawi ṭhin kha a ropuiin a mak zawk a sin. Khatih lai khan lo ngaithla ula, thil mak ropui ber hi in lo hriain in lo hmu tawh tur a nia.

 

Nu leh fa:            A ni maw? Chu thil mak leh ropui chu eng nge a?

 

Pastor:                  Thil mak ropui ber chu chhandamna hi a ni. Pathian, Isua chanchin ka sawi ṭhin kha inhria em?

 

Nu leh fa:            Aw, a hming I sawi ṭhin kha kan hria.

 

Pastor:                  Mihringte, sualna avanga boral mai tawh tur chu Pathianin min hmangaih em avangin a fapa Isua chu kan tuar ai tuar a, kan thih aia thi turin khawvelah a rawn tir a. Chu a thihna avang chuan keini misual thi mai tawh turte hi tihdam kan lo ni ta a, mifel kan lo ni ta a, chhandam kan lo ni ta a nih chu. Chu chhandamna chu mi zawng zawng tan a ni.  Makin a ropui a sin.

 

Tlangval:              A nih leh, Pastor keini tan pawh hian a ni ve tho tihna em ni?  

 

Pastor:                  Ni e, mi zawng zawng tan a ni. Mahse, kan tana tura thi Isua hi kan rin a, min chhandamna hi kan pawm a, Ama duh anga awm chu kan tih tur a ni.

 

Missionary:        Isua chuan pum na leh damlo a tidam thei chauh a ni lo a, thlarau boral mai tur hi min chhandam thei a ni.  Chu Isua chu a rin tlâk a, a zuitlâk a ni.

 

Damlo:                 In sawi zawng zawng kha la hrethiam vek hrih lo mah ila, Isua ringtu nih ka duh a, a chhandamna chu ka duh ve a ni. Ka pumna min tihdam vanga mak leh ropui titu kan khaw  mipui zawng zawng pawh hian vawiin tlaia in thusawi an ngaihthlak ve hunah a ropui ber chhandamna hi an chan ve ngei ka beisei.     



24.09.19