Kan chhung inkhawm ve..

Ram pawn, duh duh huna inkhawm theih lohna hmuna awm hian Mizorama inkawm tha peih vak lo tan pawh inkhawm chak riau chang a tam ngei ang. Mahse ram pawn, duh duh huna inkhawm theih tho na hmuna awm tan chuan inthlahdahna chance tha tak a ni ve hlauh thei. Zep thu cheng lo, keipawh hi helai kolkata khawpuia Mizo awm zingah hian inkhawm zinglo pawl tak chu ka ni ta mai awm e.

Zirlai naupang te tein in kan han luah ho a, chhungkua angin kan han awmkhawm ve dal dal a, nuam kan tiin khuahkhirh lem loha han tal vel chu nun pawh a lo inthlahdah deuh nge nge. Hetia, inthlahdah leh ho angreng taka nung e tilo hian biakin lama inkhawm ziahte paw’n an tih fo em em loh ‘chhung inkhawm’ hi kan hmang ve thin a; Nikum, zirna zo hoin min hawsan

Dumdumtea pual

Dt.11-01-13: Dumdumte, heihi i tan ka’n ziak ang e. I muhil ka tiharh ang che tih ka hlau sia, hla pawh ka ngaithla ngam lo, tunah pawh hian zawite te in ka type a nih hi. I muhil hmel hi a hmuhnawm ka ti,  nui deuh sang ang hian i lang thin a, i duhawmzia hi nangmah paw’n i hre lo hial zawk ang.

Kan laktirh che khan gram 700 vel lek i nia, ina kan hawn che pawh khan kan pawm reng che a nih kha. Vawikhat chhuatah kan dah che a, i kal terh terh a, ‘ai a kal thei mawle’ tia mak kan tih em em lai te kha a la rei loh tehreng nen tunah chuan thla thum i lo tling ve tep tawh a, kg 2 leh a chanve lai i lo ni ve ta bawk, harh lah i harh narawh e. I harh viau chang hian kan hau thin che a, mahse i han harh loh deuh hi chuan ngaih a tha lo a, i harh lai hi a ngaihawm leh thuai thin.

Masi titi nawi

 Masi titi nawi

Thuhmahruai: Second hand kawrlum phiar, a hmaphel ngat kan va thing a,  cheng hnih velin kan han dawn hniam a, nuam kan va’n ti. Lungawi takin bus-ah kan han chuang haw vau vau a,  zan inkhawmnaa hak hun tur leh min lo thlir kiautu turte hmel nen kan mitthla rauh rauh tawh mai thin a ni.

Kan awmkhawm tel tel a, kan tleh del del a, Biakinah bawk kan lutkhawm leh dial thin kha a ni a. Kha vang kha a ni ta ang, naupan lai Krismas kha a lo nuam bik e, kan tih fo nachhan pawh hi. Kum a lo pung ve zel a, tleh del del lo a, kal fal nelh nelh te nuam kan lo tih tak hnua kan hlimna  hian kan pan lai Masi hlimna  kha a tluk thei meuh lo.

MASI KHAWHAR: Urlawk zanah dar 12 a ri tawh a, haw loh chuan ka pi Khumi’n min lo thlir min lo thlir tawh dawn tih kan hre bawk si. Kan han haw  a, kan veng kawngpui chhuk vel chu a khawharthlak tawk lekin a lo la reh lo a, a then an lo thim thiap tawh laiin a then an lo la ri laih laih a; Rilru khawlai lama la awm deuh run chungin kan han mu a, thlanmual tlang velah ri lang lang tawk an la awm bakah khawilai atangin emaw ring lutuk si lo, lung tileng tawk velin Krismas hla play ri a lo ri riai riai bawk a, hetiang hunah hian a khawharthlakin a lunglenthlak ka ti thin. Thiante kha engtin tak awmzui ang maw, tih mai mai te hi ngaihtuah veng veng awl tak a ni- nain eng thil ropui tak an tih bik hi ka ring lo leh hnuhnawh; Kan awm ho laiin kan che ropui lo thei e mai. Khai mah aw…

Ka Kalkat

Reilote emaw tih chhungin kumpuisul engemawzat a lo vei ve ta reng a; Thlenthlak tirha rawlthar sa pan thler thlawr ni thin kha T-Shirt hma a lo puar ta luah bawk nen, tleirawl tawih deuh leh hmuh taih ve deuh ho pawhin min U ta vek mai! Hmelin a zir loh vang leh hmulphurh chhiat vang nge, u Lalpaa boitlung te, u Aluaia te ho bula ka awm tam vangin ka senior hmel zawk tih pawh ka hrethiam tawh bik lo e.

Thlawk tep : Pawl ruk kan zir kum khan lengpui thlawhna tumhmun tur an laih zawl  en turin kan sikul naupang ho kha kal turin kan inbuatsaih a, kan phur hle; Mahse kal dawn tepah pawl sarih naupang ho chauh kal an phal leh ta si a, kan kal ve ta lo. Chumi atanga kum sawm a ral hnu, thlawhna chu sawi loh, a tumhmun ringawt pawh hi damchhungin kan hmu dawn lo a nih hi, ka tih rilruk tawh hnuah hmana kal ve an phal lohna lengpui airport ngei mai chu ka pan ve ta chhak chhak a, thlawhna tak taka chuang tur lehnghalin!

Kum hnih

(Facebook-a kan group 'Mawlhmuar' kum hnih tlin champha puala ka ziah hi dah mai mai teh ang. A hrethiam lo tan chuan a ho ang chu :P)

Mawlhmuar hi mihring chu nise  nausen lawmawm tak, ṭawngthei ṭantir ang vel hi a ni tawh dawn tihna a ni a, duat leh dawm a mamawh hun laitak pawh a ni awm e.(weinj)

Ka facebook khawih ṭantir ve kha thiam ka nei tlemin ṭhian lah ka la nei mang bawk si lo a, zir chawp ti tihin ‘poker’ an tih chu ka’n khel ve chhin a, ka inchhir ngai lohna tur leh ṭhian ṭha tamtak min pe tu thil ṭha ka ti a lo ni reng mai.

HMEI

“I hrelo maw, helai building-ah hian kum thum chuang in khawsa a ni a, engtin nge i hriat loh theih?” Muantea chuan thinrim tak leh rinhlelhna mitmeng nen a thianpa chu a chhukmelh run a. Ani, a thianpa Isaka lah chu a Muantea ai mah chuan a beidawngin a hlauthawng tih a hmelah a lang reng mai. A chala thlan bawl tawk tawk chu huih fai pahin, “ka hre lo, ka hrelo takzet a ni, fiamthuin ‘khulai flat khu a hrang a ni hrim hrim ang, an luah reilo thei e mai’ kan ti mai mai thin a, tuma’n thutak a nih pawh kan ring chuang lo..,” a ti bah niaih a.

2006, kum tir lamah khan Muantea chuan a zirna chhunzawm turin Kolkata khawpui a pan ve a, chutia hmundanga lehkha a han zir ve tur chu a phurin a hlim hle a, a hlim nachhan ber chu he khawpuiah hian a nun tihlim em em tu, krismas laia a tawn thar kha a awm tlat a ni. Phone bill pawh a heklo deuh ang chu.

Numami chu nula lerh a ni lo a, an venga a thiante phei chuan ngaihzawng neih nachang pawh hrelo, an ti fo thin. Mahse mihring pangngai, hmeichhe pangngai rilru pu a ni a, mipa ngaihsakna rilru nei miahlo chu a ni bik lo. Weekend ah thiante rualin hostel atanga chhuah phalna a’n la ve ngei a, a thiante ho chu an bialpa emaw, bialpa chiahlo an hmelhriat thar te emaw ina an riah bo laiin Mizoram House Girls dorm-ah a hun a hmangral bik ziah a, hrehawm tih chang a ngah ve thin.

Zawlkhawhermawii

Ka mitin hai tep che mahse ka thinlung hian a lo la hai lo khawp mai che. Kan intawh dawn khan ka kawchhunga naute, hmana che thin kha a che leh ta dat a! Ka mit zawng dem thei ka ni bik lo,  kum sawm chuang fe hnu ah chuan i sakhmel pawh a lo dang ve ta deuh; Mahse nangmah kha i la ni reng si a.

 

Khatih lai kha, ni e, khatih lai kan high sikul kal lai kha mitthlaah a lo lang thar leh uar uar a. Nangmah mitthla reng chunga ‘Zawlkhawhermawii’ tih hla zir manhla ka tih thinzia tak kha aw… Ka suangtuahna ramah khan vawi engzat fakau nge ka fawh che ka hre seng ta lo. A pawi ta ber chu ka fawh lai che i  hre ve ngailo leh min fawp let ve lo thin kha a ni.

Tunah chuan i tleirawl hmel duhawm tak leh biang tai tek te kha nula puitling hmelin a lo thlak ta a, kan intawh dawn a, lai kimki chawih chawih chunga min rawn sir nuih thin lai  ang nilo khan nulain tlangval an melh dan pangngaiin min nuih seih a, i lo la nui mawi ngang mai lehnghal a- Ka chhe leh ta.